2 Коринфянэнгэ 2 - Библия - Пэ Балтитко Романи чиб (Романэс) 2019

¹ Палдава́ мэ россэндиндём пэ́скэ тэ на джав кэ тумэ́ нэвэ́стыр барэ́ пиридживипнаса.

² Ко́ли мэ яна́ва тумэ́нгэ баро́ пиридживипэн, кон жа исын одова́, кон адя́кэ-паць и обрадынэла ман, ко́ли на одова́-паць, конэ́скэ мэ яна́ва баро́ пиридживипэн?

³ И мэ чхиндём дава́-паць тумэ́нгэ дара́тыр (дарьятыр), со ке́ли мэ ява́ва, тэды, соб (кай) ма́нгэ тэ на пиридживав пал одолэ́ндэ, конэ́скэ трэй тэ радынэл ман, мэ зоралэ́с патя́ва дрэ тумэ́ндэ, со мири́ ра́дыма исын ра́дыма ваш сарэ́ тумэ́нгэ.

Примангэ́н Манушэ́нгэ

⁴ Пал баро́ пиридживипэн и дукхано ило́ мэ чхиндём тумэ́нгэ барэ́ ясвэ́нца на ваш дова́, соб (кай) тумэ́ тэ пиридживэн, а соб (кай) тумэ́ тэ уджинэ́н мири́ бари пшалы́тко паты́в кэ тумэ́.

⁵ Нэ ко́ли вари-кон яндя́ пиридживипэн вари-конэ́скэ, ёв яндя́ пиридживипэн на ваш ма́нгэ, а на ракири́ бут, сарэ́нгэ тумэ́нгэ.

⁶ Ваш кадасавэ́ манушэ́скэ ухты́лла (до́си) выракирибэн, со сыс лэ́скэ бутэндыр тумэ́ндыр;

⁷ соб (кай) тумэ́ пэ проти фэды́р тэ примангэн лэ́скэ и тэ подрикирэн лэс, соб (кай) ёв тэ на явэ́л стасадо́ пиридживипна́са.

⁸ Палдава́ мэ манга́ва тумэн тэ прилэ́н лэс ласкаса.

⁹ Пал-дова́ со мэ чхиндём, соб (кай) тэ пропатякирав тумэн, ци кандэ́на тумэ́ дро саро́.

¹⁰ А вари-конэ́скэ тумэ́ примангэна и мэ адя́кэ-паць примангава; пал-дова́ со, ко́ли мэ примангдём вари-со, мэ примангдём дава́ пал тумэ́ндэ пир Христосо́скиро право;

¹¹ соб (кай) на́лачхо тэ на пиризорьякирэл амэн, пал-дова́ со амэ джина́са, со ёв камэ́ла.

Павли́скиро Пиридживипэ́н дрэ Троа́да

¹² Ке́ли мэ явдём дрэ Троада тэ роспхэнав Христососкири бахталы́ зан (звесь), ке́ли Дэвэ́л псирадя вуда́р ваш мири́ буты́,

¹³ ма́нгэ сыс пхаро́ ду́хо (фа́но) пэ ило́, ке́ли мэ на латхём Титос, мирэ́ пшалэ́с, палдава́ мэ розяцёмпэ лэ́нца и гиём дурэды́р кэ Македония.

¹⁴ Нэ парик Дэвлэ́скэ, Саво́ ўса́ды (сак) лыджа́ла вучэ́с амэн дро екхипэ́н Христосо́са и пиридэла пир амэ́ндэ джиныбэ́н пал Христосо́стэ, саво́ амэ сунгаса (сунгаваса) сыр гудло́ кхандыпэн.

Збе́рдыма (Побе́да) пир Христосо́стэ

¹⁵ Пал-дова́ со амэ сам сы́рбы гудло́ тхув (дымо), со Христо́со янэ́ла Дэвлэ́скэ ваш одолэ́нгэ, савэ́ исын зракхнэ́ и ваш одолэ́нгэ, савэ́ хасёна;

¹⁶ ваш екхэ манушэ́нгэ дава́ исын мэрибнаскиро кхандыпэн, ваш явирэ манушэ́нгэ дава́ исын джиибна́скири сунг. Кон жа, тэды, исын лачхо́ пэ дава́?

¹⁷ Пал-дова́ со амэ на янаса дош Дэвлэ́скирэ лавэ́скэ, сыр бут мануша́ адя́кэ кэрэ́на, нэ амэ сарэ́ илэ́стыр, Кокорэ́ Дэвлэ́стыр ракираса Христосо́скирэ зорья́са анги́л Дэвлэ́скирэ якха́.