2 Коринфянэнгэ 13 - Библия - Пэ Балтитко Романи чиб (Романэс) 2019

Палатунэ́ (После́дня) Приракхибэна́ и Розячибэ́н Дэвлэ́са

¹ Дава́ явэ́ла три́то мо́ло мэ джа́ва кэ тумэ́. “Трэй дуй ци трин якхи́тка (свиде́тели), соб (кай) тэ чхувэ́н зор (тва́рдыма) пэ лав пир дава́ рэ́ндо.”

² Мэ пхэндём тумэ́нгэ ґарэдыр и мэ пхэна́ва анги́л какана́ (адя́кэ-паць, сыр мэ ракирдём, ке́ли мэ со́мас кэ тумэ́ яви́р мо́ло, какана́ мэ на сом тумэ́нца чачунэ́с) одолэ́нгэ, кон кэрдя́ грэ́хо анги́л и сарэ́ явирэ манушэ́нгэ, со ке́ли мэ ява́ва нэвэ́стыр, мэ на потангинава (на пожалинава) лэн.

³ Ци родэ́на тумэ́ допхэныбэ́н, со Христо́со ракирэ́ла пир ма́ндэ? Ёв исын на бизорья́киро ваш тумэ́нгэ, а Ёв сыкавэ́ла Пэ́скири зор машки́р тумэ́ндэ;

⁴ пал-дова́ со Ёв сыс примардо пэ трушу́л Пэ́скирэ бизоралыпнаса, нэ Ёв исын джидо́ Дэвлэ́скирэ зорья́тыр; пал-дова́ со амэ, чачэс, сам бизорья́кирэ дро екхипэ́н Лэ́са; нэ амэ ява́са тэ джива́с Лэ́са пир Дэвлэ́скири зор, сави́ исын дыны́ тумэ́нгэ;

⁵ пропатякирэн пэс, ци дживэ́на тумэ́ пир патяибэ́н; отпхэнэн кокорэ́ пэ́скэ: ци джинэ́на тумэ́ кокорэ́, со тумэ́ сан Христосо́скирэ? Ко́ли на адя́кэ, тэды тумэ́ на сан лачхэ́.

⁶ Ма́ндэ исын лачхо́ ужакирибэ́н, соб (кай) тумэ́ тэ джинэ́н, со тумэ́ сан лачхэ́.

⁷ Нэ мэ мангавпэ Дэвлэ́скэ, соб (кай) тумэ́ тэ на кэрэ́н чорипэ́н на ваш дова́, соб (кай) амэ́нгэ тэ сыкавас, со амэ прогиям пропатякирибэн, нэ соб (кай) тумэ́ тэ кэрэ́н пир чачипэ́н, – ничы́, ко́ли амэ и на ява́са приджиндлэ сыр лачхэ́.

⁸ Пал-дова́ со амэ́ндэ нанэ зор проти чачипэ́н, а пал чачипэ́н.

⁹ Палдава́ амэ радынасапэ, ке́ли амэ сам бизорья́кирэ, а тумэ́ сан зоралэ́. И амэ адя́кэ-паць мангасапэ Дэвлэ́скэ, соб (кай) тумэ́ тэ явэ́н бидошакирэ.

¹⁰ Палдава́ мэ чхиндём дава́, со, пака мэ на сом тумэ́нца; а ке́ли мэ ява́ва кэ тумэ́, ма́нгэ тэ на отлыджавпэ строгимаса тумэ́нца пир право, саво́ Рай Дэвэ́л дыя́ ма́нгэ тэ подрикирав тумэн, а над, соб (кай) тэ хас тумаро́ ило́.

¹¹ Палатуно́ лав, пшала́лэ: радынэ́нпэ, явэ́н бидоша́кирэ, подрикирэ́н екх екхэ́с, явэ́н екхэ́-годя́кирэ, явэ́н дро рама́нё (миро) екх екхэ́са.

¹² Пиридэ́н “рама́нё” екх екхэ́скэ свэнтонэ́ чамудыпнаса.

¹³ Сарэ́ свэ́нта пиридэна “рама́нё” тумэ́нгэ.

¹⁴ Мэк бахталыпэ́н амарэ́ Ра́скирэ-Дэвлэ́скиро, Исусо́скирэ-Христосо́скиро, Дэвлэ́скири ла́ска и паты́в и Свэнтонэ́ Духо́скиро кхэтаныпэ́н тэ явэ́н тумэ́нца. Ами́нь.