2 Коринфянэнгэ 12 - Библия - Пэ Балтитко Романи чиб (Романэс) 2019

Дэвэ́л Бахтякирэ́ла Павли́с Дыкхибнэ́нца и Сыкадыипнэ́нца

¹ Ѓа́да, нанэ ни сави́ льго́та ма́нгэ тэ шаравпэ. Нэ мэ роспхэнава пал дыкхибэна и сыкадыипэна ма́нгэ Ра́стыр-Дэвлэ́стыр.

² Мэ джино́м екхэ́ патяибнаскирэс дрэ Христосо́стэ (дэшуштар бэрш палэ, ци ёв сыс дро пэ́скирэ маса́, мэ на джино́м, ци дова́ сыс лэ́скиро ду́хо (фа́но), мэ на джино́м, Дэвэ́л джинэ́ла); адасаво́ ману́ш сыс ґаздыно́ кэ три́то болыбэ́н.

³ И мэ джино́м (джина́в) дасавэ́ манушэ́с, (ци ёв сыс дро пэ́скирэ маса́, ци дова́ сыс лэ́скиро ду́хо (фа́но) мэ на джино́м, Дэвэ́л джинэ́ла:)

⁴ со ёв сыс ґаздыно́ дро Болыбна́скиро Раё, и шундя́ дасаво, со нашты́ тэ пиридэл лавэ́нца, савэ́ манушытконэ́ уштэ́нца фэды́р тэ на выпхэнэн.

⁵ Кадасавэ́ манушэ́са мэ ява́ва тэ шаравпэ, нэ на пэ́са кокорэса, а екх со екхэ́ мирэ́ бизоралыпна́са.

⁶ Пал-дова́ со, ко́ли мэ камамас тэ шаравпэ, тэды мэ на ява́ва дылынэса. Пал-дова́ со мэ пхэна́ва чачипэ́н, соб (кай) ние́кх ману́ш тэ на подуминэл кучэдыр пал ма́ндэ далэ́стыр, со ёв дыкхэ́ла дрэ ма́ндэ и шунэ́ла пал ма́ндэ.

⁷ Соб (кай) ма́нгэ тэ на пхутёвав дивоскирэ дыкхибнаса, ма́нгэ исын дыны́ пхусады́ буст (колючка) дрэ лоч сы́рбы дына́ри (слу́га) налачхэ́стыр, соб (кай) ёв тэ мэнчынэл ман ваш дова́, соб (кай) ма́нгэ тэ на пхутёвав.

⁸ Палдава́ мэ и мангдём паты́в Ра́стыр-Дэвлэ́стыр трин мо́лы, соб (кай) Ёв тэ дурьякирэл буст ма́ндыр.

⁹ И Ёв пхэндя́ ма́нгэ: “Ухты́лла (до́си) ваш ту́кэ Миро бахталыпэ́н, саво́ сыкавэлапэ со най фэдэды́р, ке́ли мэ сом бизорья́киро!” Палдава́ ма́нгэ буты́р пир ило́ тэ шаравпэ мирэ́ бизоралыпнаса, соб (кай) Христососкири зор тэ заджа́л дрэ ма́ндэ.

¹⁰ Палдава́ мэ радынавпэ пэ́скирэ бизоралыпнастыр, со ман ладжакирэна; трэбиматыр, традыпнастыр, пхарэ́ джиибнастыр ваш Христосо́скэ, пал-дова́ со, ке́ли мэ сом бизорья́киро, тэды мэ сом зорало́.

Павли́скирэ Мы́сли пал Коринфянинэ́ндэ

¹¹ Мэ яцём дылыно́, тумэ́ зачхудэ ман: пал-дова́ со тумэ́нгэ трэиндя́ тэ шарэ́н ман; мэ на сом ни дро со фуеды́р кадалэ́ барэ́ Апостолэндыр, хоць мэ и адя́кэ-паць на сом мол ничы́.

¹² Чачэс, ґэртыка (знаме́нии), савэ́ допхэнэна, со мэ сом Апостоло, сыкадэ пэс барэ́ вырикирибнаса, дивэнца и зорья́са пир ди́вна бутя́.

¹³ Сыр жа тэды кэ тумэ́ тэ отлыджавпэ фуеды́р явирэ кхангирьендыр, апри́ч дова́, со мэ на яндём пхарипэ́н тумэ́нгэ. Примангэн ма́нгэ, со мэ выпхэндём дасави́ холы́.

¹⁴ Ѓа́да, мэ скэдыёмпэ тэ джав кэ тумэ́ три́то мо́ло. И мэ на яна́ва пхарипэ́н дрэ ловэ́ тумэ́нгэ, пал-дова́ со мэ на родава вари-сави́ льго́та тумэ́ндыр, а тумэ́ кокорэ́ трэй ма́нгэ. И на чхавэ́ скэдэ́на ловэ́ ваш дадэ́нгэ, а дада́ ваш чхавэ́нгэ.

¹⁵ Какана́ мэ фэды́р ява́ва тэ розмэкав пэ́скиро и тэ отдав пэс пал тумаро́ ило́. Ко́ли мэ кама́м тумэн бутэды́р, нау́што тумэ́ явэ́на тэ сыкавэ́н паты́в ма́нгэ кутэдыр (набутэдыр)?

¹⁶ А ко́ли тэ явэ́л адя́кэ, ци мэ яндём пхарипэ́н тумэ́нгэ? Нэ вари-кон пхэнэ́ла, со мэ сом мэндро, и мэ, хай, лыём вари-со тумэ́ндыр хохаибнаса?

¹⁷ Ци лыём мэ вари-со тумэ́ндыр пир вари-конэ́стэ, конэ́с мэ бичхадём кэ тумэ́?

¹⁸ Мэ мангдём Титос и бичхадём пшалэ́с лэ́са: ци лыя́ Тито вари-со тумэ́ндыр? Ци на кэрдя́м амэ дро екх ду́хо (фа́но)? Ци на псирдям амэ екхэ дромэ́са?

¹⁹ Ци думинэ́на тумэ́, со амэ, хачи, затэрдёваса пал пэ́стэ? Дава́ амэ ракираса анги́л Дэвлэ́стэ дро екхипэ́н Христосо́са пир сарэ́ рэ́нды ваш тумаро́ подрикирибэ́н.

²⁰ Пал-дова́ со мэ дарава, со, ке́ли мэ нэвэ́стыр ява́ва, мэ могина́ва тэ латхав тумэн адасавэнца, сыр мэ на кама́м, и тумэ́ могинэ́на тэ латхэ́н ман адасавэса, сыр мэ на кама́м: мэ дарава, со могинэ́на тэ явэ́н кошыбэна, зэвлыныпэна, холякирибэна, роспэрибэна пэ групки, гундякирибэна, пхутькирибэна, бизлады;

²¹ соб (кай) миро Дэвэ́л тэ на́ чхувэ́л тэлэ́ ман пал тумэ́ндэ, ке́ли мэ ява́ва нэвэ́стыр, и, соб (кай) ма́нгэ тэ на рова́в пал бутэ́ндэ тумэ́ндэ, савэ́ кэрдэ́ грэ́хо и на отрисинэ нажужыпнастыр, биладжаипнастыр, ладжавэ рэндэ́ндыр, савэ́нца ёнэ залэнаспэ.