2 Коринфянэнгэ 11 - Библия - Пэ Балтитко Романи чиб (Романэс) 2019

Па́вли и Хоханэ́ Проро́ки

¹ Мэ камамас, соб (кай) тумэ́ мэк на́бут тэ вырикирэн миро бигодякирибэн; тэды вырикирэн и ман.

² Пал-дова́ со ма́ндэ сыс илэ́скиро хачкирибэ́н пал тумэ́ндэ Дэвлэ́скирэ хачкирибнаса, пал-дова́ со мэ дыём лав (ангрустякирдём тумэн) Екхэ́ Манушэ́скэ, Христосо́скэ, соб (кай) тумэ́ тэ явэ́н анги́л Лэ́стэ сы́рбы патывалы́ тэрнори́.

³ Нэ мэ дарава, со, сыр сап хохадя Ева пэ́скирэ фротыма́са, адя́кэ-паць, соб (кай) и тумари́ годы́ тэ на пошкодинэлпэ и, соб (кай) тумэ́ тэ на отрисён простонэ патяибнастыр дрэ Христосо́стэ.

⁴ Пал-дова́ со, ко́ли вари-кон яви́р, чачэс, явэ́лас кэ тумэ́ и роспхэнэлас пал сы́рбы явирэ́ Христо́стэ, конэ́с амэ на роспхэндям, ци ко́ли тумэ́ прилынэ́ яви́р Ду́хо (Фа́но), Савэс тумэ́ ґарыдыр на прилэнас; и тумэ́ прилэнас яви́р бахталы́ зан (звесь), сави́ тумэ́ ґарэдыр на приджинэнас, – дыкхэ́н: сыр тумэ́ локхэс прилэнас дасавэ́ манушэ́с!

⁵ И мэ гинава, со мэ ни дро со на сом тэлэды́р кадалэ́ барэ́ Апостолэндыр

⁶ И ко́ли миро ракирибэ́н исын нагожо, нэ ма́ндэ исын джиныбэ́н дро дова́, со мэ ракира́ва: тумэ́ ж кокорэ́ дыкхнэ́ дава́ пир саро́.

⁷ Нау́што кэрдём мэ грэ́хо, ко́ли мэ чхудём пэс тэлэды́р, соб (кай) тэ чхував тумэн вучэды́р, ке́ли мэ роспхэнавас Дэвлэ́скири бахталы́ зан (звесь) и мэ на лавас ловэ́ лэ́ндыр?

⁸ Мэ обкэдыём явирэ-кхангирья́кирэ скэдыибэна, со мэ лавас ловэ́ лэ́ндыр пал пэ́скири буты́, соб (кай) тэ дынаринав тумэ́нгэ. И ке́ли мэ со́мас тумэ́нца и ма́ндэ сыс трэ́бима дро вари-со, ма́ндыр на сыс ни саво́ пхарипэ́н тумэ́нгэ,

⁹ пал-дова́ со пша́ла Македониятыр дынэ́ ма́нгэ саро́, дро со ма́ндэ сыс трэ́бима, и мэ причхудём зор дро саро́ и мэ дурэды́р ява́ва тэ причхував зор, соб (кай) тэ на явэ́л ни саво́ пхарипэ́н ма́ндыр тумэ́ндэ.

¹⁰ И пир Христосо́скиро чачипэ́н, саво́ исын дрэ ма́ндэ, мэ на́ пирияча́ва тэ шаравпэ сыр биловэнгиро дына́ри пир Ахаякирэ рига́.

¹¹ Со́скэ адя́кэ? Ци тумэ́ на сан дро́га ма́нгэ? Дэвэ́л джинэ́ла, со мэ кэра́ва. А со мэ кэра́ва, мэ дурэды́р ява́ва тэ кэра́в,

¹² соб (кай) ма́нгэ тэ на дав саштыпэн (возможность/ваканцыя) одолэ́нгэ, савэ́ шарэна пэс, со ёнэ кэрэ́на адя́кэ-паць, сыр и амэ.

¹³ Пал-дова́ со кадалэ́ мануша́ исын хоханэ́ Апо́столы, начачунэ бутярнэ́, савэ́ выдэна пэс пал Христосо́скирэ Апостолэндэ.

¹⁴ И дава́ нанэ баро́ ди́во, пал-дова́ со на́лачхо кокоро́ выдэла пэс пал Янголостэ дудэ́стыр (свэто́стыр).

¹⁵ Дава́ исын набаро́ рэ́ндо, ко́ли лэ́скирэ бутярнэ́ выдэна пэс пал дынарье́ндэ пир чачипэ́н; нэ ёнэ дорэсэ́на пэ́скиро пир лэ́нгири буты́ дро ко́нцо (дро яго́ро).

Павли́скиро Мэ́ньки пир Апостолы́тко Буты́

¹⁶ Нэвэ́стыр мэ пхэна́ва: мэк нико́н тэ на думинэл пал ма́ндэ сыр пал дылынэстэ, прилэ́н ман адасавэса, саво́ мэ сом – сы́рбы дылынэса, соб (кай) ма́нгэ на́бут тэ шаравпэ.

¹⁷ А дова́, со мэ какана́ ракира́ва, дава́ исын на пир Дэвлэ́скиро чачипэ́н, а сы́рбы пир дылыно́ муршыпэн.

¹⁸ Пал-дова́ со бут мануша́ шарэнапэ пир далэ́-свэто́скирэ манушы́тко годы́, тэды и мэ адя́кэ-паць ява́ва тэ шаравпэ.

¹⁹ А тумэ́ ж сан годьварэ́ мануша́, и тумэ́ локхэс вышунэна дылынэн.

²⁰ Ци вырикирэна тумэ́, ке́ли вари-кон лэ́ла упралыпэ́н пэ тумэ́ндэ, ци дживэ́ла пал тумарэ́ ловэ́, ци обчорэла тумэн, ци пхутёла, ци марэла тумэн пир муй?

²¹ И мэ ракира́ва дава́ кэ мири́ ладж, со на ухтылдя амэ́ндэ зор ваш дава́; а ко́ли вари-конэ́стэ исын муршыпэн пэ дава́, то адя́кэ-паць исын муршыпэн и ма́ндэ на пир бари годы́.

²² Исын ёнэ Юды? Мэ адя́кэ-паць сом. Исын ёнэ Израилёскирэ? Мэ адя́кэ-паць сом. Исын ёнэ Авраамо́скирэ родо́стыр? Мэ адя́кэ-паць сом.

²³ Исын ёнэ Христосо́скирэ дына́рья? Пир миро бигодякирибэн пхэна́ва, со мэ буты́р сом дасаво: буты́р дрэ пхари́ буты́, дрэ фра́нсы (ра́ны) би меракиро, мэ буты́р со́мас дро штарибэ́н, и частэс мэ сом дрэ дар кэ мэрибэ́н.

²⁴ Юды мардэ́ ман пандж мо́лы пир штардэша́ пэкаибэна би екхэскиро.

²⁵ Трин мо́лы ман мардэ́ каштэнца, е́кхвар ман шулякирдэ барэ́нца, трин мо́лы мэ тасадёвавас пэ пхагирды́ па́рма (кораблё), мэ со́мас дывэ́с и рат пэ са́мо тэнибэ́н (дно) дро морёскири пани́:

²⁶ мэ со́мас бут мо́лы дрэ дрома́, дрэ дар пэ рэка (лэнь), дрэ розмарибнэнгирэ васта́, дрэ дар пэ́скирэ манушэ́ндыр, дрэ дар Юдэндыр, дрэ дар Наюдэндыр: дрэ дар дро фо́ро, пэ чхучи́ пхув, дрэ дар пэ мо́рё (дэрья́в), дрэ дар хоханэ́ пшалэ́ндыр;

²⁷ мэ бут кэрдём буты́ и со́мас залыно (залымо) пхарэ́ бутяса, со́мас бисоибнаскиро, бокхало. Ма́ндэ сыс труш (смэга); мэ постиндём пир шыл и би идякиро.

²⁸ Апри́ч далэ́ сарэ́ пиридживибэна рига́тыр, ма́ндэ со дывэ́с сыс пхэрдо́ мануша́ и мэ пхарэ́с думинавас пал кхангирья́кирэ скэдыибэна.

²⁹ Ко́ли вари-кон исын бигодякиро, тэды и мэ сом бигодякиро; ке́ли вари-кон кэрэ́ла грэ́хо, тэды и миро ило́ хачола пиридживипнастыр.

³⁰ Ко́ли ма́нгэ трэй тэ шаравпэ вари-со́са, мэ ява́ва тэ шаравпэ долэса, дро со мэ сом бизорья́киро.

³¹ Дэвэ́л и Дад амарэ́ Ра́скирэ-Дэвлэ́скиро, Исусо́скирэ Христосо́скиро – ґа́да, Ёв, тэ явэ́л бахтякирдо́, тэ явэ́л Лэ́скиро лав пэ сарэ́ бэрша́, джинэ́ла, со мэ на хохавава.

³² Дро Дама́ско Крали́скирэ Аретаскиро рикирэлас стрэ́га пир Дама́ско, ками́ тэ запхандэл ман;

³³ [дава́ стихо нанэ дрэ-р.с.], и пир фэнштра дро кхудо́ (корзина) ман змэкнэ упралэ́стыр и адя́кэ мэ насцём лэ́нгирэ вастэ́ндыр.