2 Коринфянэнгэ 10 - Библия - Пэ Балтитко Романи чиб (Романэс) 2019

Па́вли Затэрдёла пал Пэ́скиро Дынарибэ́н

¹ А мэ, Па́вли, кокоро́, манга́ва тумэн пир напхувитко ковлыпэн Христосо́скиро, мэ, саво́ сом ковлэ́-илы́тко тумэ́нца, нэ саво́ сом муршкано́, ке́ли мэ на сом тумэ́нца;

² мэ манга́ва тумэн, ке́ли мэ ява́ва, соб (кай) ма́нгэ тэ сыкавав муршыпэн дасавэ́-паць зорья́са, савья́са мэ думинава пэ́скэ тэ сыкавав вари-савэ́ манушэ́нгэ, кон ракирэ́ла, со амэ, хачи, кэра́са пир далэ́ свэто́скирэ-манушы́тко годы́.

³ Пал-дова́ со амэ дживаса пэ дава́ свэ́то, нэ амэ на марасапэ далэ́-свэто́скирэ годя́са.

⁴ И амаро́ марды́тко (оружыё), савэ́са амэ марасапэ, исын на далэ́ свэто́скирэ-манушытконэ́ годятыр, нэ амэ сам зоралэ́ Дэвлэ́скирэ зоралыпнаса, савья́са амэ пхагираса форо́скирэ рикирибэна;

⁵ хоханэ́ допхэныбэна и саро́, со пхутёла проти Дэвлэ́скиро дынарибэ́н; амэ пхандаса кажно годя́кири мы́сля, соб (кай) тэ явэ́л кандуны Христосо́скэ;

⁶ и амэ сам скэдынэ́ тэ чхувас хась (ка́ра) пэ кажно накандыпэн пало́ (после) дова́, ке́ли тумэ́ допхэнэна пэ́скиро кандыпэн.

⁷ Ци дыкхэ́на тумэ́ пэ манушы́тко муй? Ко́ли вари-кон зоралэ́с патя́ла дро дова́, со ёв исын Христосо́скиро, мэк ёв нэвэ́стыр тэ пиридуминэл пал дова́; лэ́скэ трэй тэ ґалёл, со амэ дасавэ́-паць сам Христосо́скирэ.

⁸ Нэ, ко́ли мэ буты́р ява́ва тэ шаравпэ пэ́скирэ правоса, саво́ Дэвэ́л дыя́ тэ дав васт, соб (кай) тэ барьёл тумаро́ патяибэ́н, а на ваш дова́, соб (кай) тэ чхував тэлэ́ тумэн, тэды ма́нгэ на явэ́ла ладжаво;

⁹ мэк дава́ тэ на здэлпэ тумэ́нгэ, со мэ камдём тэ дарьякирав (тэ страхакирав) тумэн лылэ́нца:

¹⁰ вари-савэ́ ракирэ́на, со мирэ́ лыла́ исын строга и зорьякирэна ду́хо (фа́но), нэ ке́ли ёв исын амэ́нца, нэ лэ́стэ маса́ исын бизорья́кирэ и лэ́скиро лав исын наджиндло.

¹¹ Мэк дасаво ману́ш тэ думинэл пэ́скэ, со, савэ́ амэ сам дрэ лыла́, сыр амэ чхиндям дур тумэ́ндыр, адасавэ́-паць амэ сам пир рэ́ндо, ке́ли амэ сам тумэ́нца.

¹² Палдава́ амэ́ндэ нанэ муршыпэн тэ дас чол (тими́н) пэ́скэ ци тэ припарувас (тэ зроўнина́с) пэс вари-савэ́ явирэ манушэ́нца; нэ кон дэ́ла чол и припарувэла пэс кокоро́ пэ́са, исын бигодякиро ману́ш.

¹³ И амэ на ява́са тэ шараспэ би меракиро, нэ пир ме́ра бутякири, сави́ Дэвэ́л выкэдыя́ ваш амэ́нгэ и сави́ доджа́ла кэ тумэ́.

¹⁴ Амэ на выджаса зорья́тыр, со амэ сы́рбы на догиям кэ тумэ́, пал-дова́ со амэ догиям кэ тумэ́ Христосо́скирэ бахталэ́ заня́са (звесяса);

¹⁵ и амэ на шарасапэ буты́р мера́тыр явирэ́-манушэ́нгирэ бутяса, нэ амэ́ндэ исын лачхо́ ужакирибэ́н, со, ко́ли тумаро́ патяибэ́н выбарьёла, то и амэ могинаса тэ кэра́с буты́ буты́р машки́р тумэ́ндэ, нэ амэ на пириджаса ме́ра, сави́ Дэвэ́л выкэдыя́ ваш амэ́нгэ,

¹⁶ тэды, соб (кай) амэ́нгэ тэ роспхэнас бахталы́ зан (звесь) пир рига́, савэ́ исын дур пал тумэ́ндэ, пал-дова́ со амэ на камаса тэ шараспэ бутяса, сави́ ужэ кэрды пир яви́р рига́.

¹⁷ А одова́, кон шарэлапэ, мэк ёв тэ шарэлпэ долэса, со Рай Дэвэ́л кэрдя́.

¹⁸ Пал-дова́ со на кодова́ ману́ш исын лачхо́, кон шарэла пэс, а кодова́, конэ́с Рай Дэвэ́л шарэла.