1 Ximaske 4 - Библия - Пэ Балтитко Романи чиб (Романэс) 2019

Хоханэ́ Сыклякирибна́рья

¹ Ду́хо (Фа́но) маму́й ракирэ́ла, со дро палатуно́ (последнё) часо бут мануша́ мэкэ́на тэ патя́н, лэ́на тэ кандэ́н хоханэ́ ду́хи и тэ шунэ́н бэнгланэ-духэнгиро сыклякирибэ́н;

² кадава́ сыклякирибэ́н роспхэнэна дуемуитка хохаибнарья, савэ́ хасякирдэ́ сари́ ладж, сы́рбы вари-кон схачкирдя́ ла,

³ и адалэ́ мануша́ запхэнэна тэ лэнпэ, и тэ на хан саро́, со создыя́ Дэвэ́л ваш дова́, соб (кай) патяибнаскирэнгэ, и кон уджиндя́ чачипэ́н, тэ хан саро́ парикирибнаса.

⁴ Пал-дова́ со саро́, со создыя́ Дэвэ́л, исын лачхо́ и сашты́ саро́ тэ хас, ко́ли амэ парикираса пал хабэ́н,

⁵ пал-дова́ со саро́ хабэ́н ячэ́ла жужо́ пир Дэвлэ́скиро лав и мангипэ́н.

Пал Лачхэ́-Кхангирья́кирэ Дынари́стэ

⁶ Ко́ли ту явэ́са тэ сыклякирэс кадава́ упхэныбэ́н пшалэ́нгэ, ту явэ́са лачхо́ кхангирья́киро дына́ри Исусо́скэ Христосо́скэ, и ту явэ́са чарадо патяибнаскирэ лавэ́нца и сыклякирибнаса, саво́ ту пхэрдэ́с кэрдя́н кэ ко́нцо/яго́ро (сполниндян).

⁷ Ракхпэ магирдэ́ ракирибнэндыр, и пхурэ́-джувленгирэ парамысендыр, нэ сыклёв тэ дживэ́с дара́са анги́л Дэвлэ́стэ.

⁸ Пал-дова́ со, кон залэлапэ пэ́скирэ мускулэнца и масэнца, дава́ лэ́скэ зорьякирэла лэ́скирэ маса́-дава́ исын набаро́ лачхипэ́н, нэ кон дживэ́ла дара́са анги́л Дэвлэ́стэ, одова́ янэ́ла лачхипэ́н пир саро́ и дэ́ла наде́я дро дава́ свэ́то и дрэ дова́, со явэ́ла анги́л.

⁹ Кадава́ лав исын патяибны́тко, ёв исын мол тэ прилэл лэс,

¹⁰ ваш дава́ амэ и кэра́са дая́ буты́ и сы́рбы марасапэ, со амэ чхуваса наде́я пэ джидэ́ Дэвлэ́стэ, Саво́ исын сарэнгирэ-манушэ́нгиро Зракхибнари, нэ буты́р кодолэ́нгэ, кон патя́ла дрэ Лэ́стэ.

¹¹ Пхэн зоралэ́с дава́ манушэ́нгэ и сыкля́кир лэн.

¹² Мэк ние́кх тэ на дыкхэ́л вучипна́стыр пэ ту́тэ пал тыро́ тэрныпэн; нэ сыка́в пэс дэвлытконэса патяибнаскирэнгэ дро лав, дро джиибэ́н, дрэ паты́в кэ яви́р мануша́, дро ду́хо (фа́но), дро патяибэ́н, дрэ жужыма.

¹³ Гин Свэ́нто Чхиныбэ́н, подрикир манушэ́н, и сыкля́кир лэн кэ дава́ часо, пака мэ ява́ва.

¹⁴ Прилэ́ илэ́са тала́но, со исын дрэ ту́тэ, саво́ сыс дыно́ ту́кэ пророкэндыр, пир саво́ кэрдэ́ рашая́, ке́ли ёнэ чхудэ́ упрэ́ васта́ пэ ту́тэ.

¹⁵ Дыкх пал дава́, отдэ́ пэс пхэрдэ́с далэскэ, соб (кай) тэ явэ́л бицялы тыри́ буты́ ваш сарэ́нгэ.

¹⁶ Дыкх цямкэс пал пэ́скиро джиибэ́н и сыклякирибэ́н, кэр дава́ саро́ часо, ко́ли ту адя́кэ явэ́са тэ кэрэ́с, зракхэ́са пэс и кодолэ́ манушэ́н, савэ́ шунэ́на тут.