1 Ximaske 3 - Библия - Пэ Балтитко Романи чиб (Романэс) 2019

Дыкхибна́скирэ/ Пхурэдыра́ (Барыдыра́) дрэ Кхангири́

¹ Чачуно́ исын лав, ко́ли кон зоралэ́с камэ́ла тэ явэ́л кхангирья́киро барыдыро́ (епископо), адава́ ману́ш мангэ́ла тэ кэрэ́л лачхи́ буты́.

² Нэ кхангирья́кирэ барыдырэ́скэ трэй тэ явэ́л бидошакирэскэ, екхэ – ромнякиро ром, саво́ джинэ́л пэс тэ рикирэ́л дрэ васта́, годьваро́, тэ явэ́л лэ́стэ паты́в кэ пэ, саво́ прилэ́ла манушэ́н илэ́са, и тэ явэ́л лачхо́ сыклякирибна́скиро (учителё);

³ тэ на явэ́л матымари, тэ на явэ́л захало, нэ тэ явэ́л ковлэ́-илытко, тэ явэ́л раманёно (ми́рно), тэ на явэ́л ґа́лко кэ ловэ́,

⁴ саво́ исын хула́й пэ пэ́скиро кхэр, конэ́с чхавэ́ кандэ́на, лыджа́на пэс пир чачипэ́н;

⁵ пал-дова́ со, ко́ли вари-кон нанэ хула́й дро пэ́скиро кхэр, сыр адава́ ману́ш явэ́ла тэ дыкхэ́л пал Дэвлэ́скири Кхангири́?

⁶ Тэ на явэ́л кхангирья́киро барыдыро́ одолэ́ манушэ́ндыр, савэ́ наґара упатя́ндынэ дрэ Дэвлэ́стэ, кадава́ саво́ ману́ш могинэ́ла тэ запхутёл, и тэ пэрэ́л тэл сэ́ндо сыр на́лачхо.

⁷ Лэ́стэ трэй тэ явэ́л лачхо́ допхэныбэ́н машки́р манушэ́ндэ, савэ́ нанэ кхангирья́тыр, соб (кай) лэ́скэ тэ на попэрэл тэл холямо́ сабэн и дрэ налачхэскири фэлы́.

Мануша́, Савэ Помогинэ́на дрэ Кхангири́

⁸ Кхангирья́кирэ бутярнэнгэ (диаконэнгэ) адя́кэ-паць трэй тэ явэ́н чачунэ́, тэ на явэ́н ёнэ дуемуитка, тэ на пьен бут мол, и тэ на явэ́н ґалка (жадна) кэ ловэ́,

⁹ ваш дова́, соб (кай) ёнэ тэ ракхэ́н сыкадо патяибнаскиро гарадо́ чачипэ́н жужэ́ патыва́са, саво́ сыс сыкадо.

¹⁰ И адасавэ́ манушэ́н адя́кэ-паць англэды́р трэй тэ пропатякирэс, и ко́ли лэ́ндэ нанэ нисави́ дош, тэды ёнэ могинэ́на тэ дынаринэ́н (тэ служынэн).

¹¹ Адя́кэ-паць и лэ́нгирэ джувленгэ трэй тэ лыджа́н пэс пир чачипэ́н, тэ на бангякирэн никонэ́с хоханэ́с, тэ на пьен, и тэ явэ́н патяибнытка дро саро́.

¹² Кхангирья́кирэ бутярнэскэ трэй, соб (кай) ёв тэ явэ́л екхэ-ромнякиро ром, саво́ исын лачхо́ хула́й пэ́скирэ чхавэ́нгэ и кхэрэ́скэ:

¹³ пал-дова́ со одолэ́ мануша́, савэ́ шука́р дынаринэна, кэ ёнэ исын баро́ кутякирибэн и ёнэ муршканэ́с ракирэ́на пал патяибэ́н дрэ Исусо́стэ Христосо́стэ.

Баро́ Чораханыбэ́н

¹⁴ Кадава́ лыл мэ чхина́ва ту́кэ, и думинава, со мэ сыг ява́ва кэ ту;

¹⁵ нэ ко́ли мэ зарикиравпэ, соб (кай) ту тэ джинэ́с, сыр трэй тэ лыджас пэс дрэ Дэвлэ́скиро Кхэр, саво́ исын джидэ́ – Дэвлэ́скири Кхангири́, сави́ исын шэрало́ бар и фунда́менто ваш чачипэ́н.

¹⁶ И сарэ́ приґалынэ, со баро́ гарадо́ чачипэ́н исын дро амаро́ дэвлыткимакиро патяибэ́н: Дэвэ́л явдя́ дрэ манушы́тко лоч (плоть), Ду́хо (Фа́но) приґалыя Лэс чачунэса, сыкадя́ Пэс Янголэнгэ, пал Лэ́стэ роспхэндлэ́ машки́р сарэ́ манушэ́ндэ, дрэ Лэ́стэ упатяндыя свэ́то и Ёв сыс лыно́ упрэ́ дрэ сла́ва пэ болыбэ́н.