1 Petr 5 - Библия - Пэ Балтитко Романи чиб (Романэс) 2019

Дэвлэ́скиро Ѓу́рто

¹ Мэ, кокоро́ сом годэпхуро́ и пастырё (чхупна́ри), манга́ва тумарэ́ кхангирья́кирэ годэпхурэн и пастырен, пал-дова́ со мэ сом якхи́тко, сыр Христо́со пирилыджия пхарипэ́н, адя́кэ-паць ма́ндэ исын паш дрэ сла́ва, сави́ явэ́ла сыкады:

² ракхэ́н Дэвлэ́скирэ манушэ́н, савэ́ исын машки́р тумэ́ндэ, кэрэ́н дава́ на пир трэ́бима, а сыр трэй Дэвлэ́скэ и на пал дова́, со тумэ́ сорбы сан бокхалэ́ кэ ловэ́, а пал-дова́ со тумэ́ камэ́на дава́ илэ́стыр;

³ и на хулаинэн пэ одолэ́ манушэ́ндэ, савэ́н Дэвэ́л допатяндыя тумэ́нгэ, а сыкавэ́н пэс лачхэ́ рига́тыр.

⁴ И ке́ли явэ́ла Са́мо Барэды́р Пастырё (Чхупна́ри), Христо́со, тэды тумэ́ дорэсэ́на славакири коро́на, сави́ явэ́ла тэ зяинэл ве́чнэс.

⁵ Адя́кэ-паць, тэрнэ́ мануша́лэ, кандэ́н пэ́скирэ годэпхурэн, явэ́н ковлэ́-илы́тка екх кэ екх, на шарэ́н пэс екх анги́л явирэ́стэ, пал-дова́ со Дэвэ́л исын проти одолэ́ндэ, кон гинэ́ла пэс вучэды́р явирэндыр, а одолэ́нгэ, кон на шарэла пэс, Ёв дэ́ла васт.

⁶ Кандэ́н и бандён тэл зорало́ Дэвлэ́скиро васт, соб (кай) Ёв тэ ґаздэл вучэ́с тумэн дро Пэ́скиро часо;

⁷ чхувэ́н упрэ́ сарэ́ пэ́скирэ пхарэ́ ду́мы пэ Лэ́стэ, пал-дова́ со Ёв дыкхэ́ла пал тумэ́ндэ.

⁸ Явэ́н трезва (ны́рна), ракхэ́нпэ. Тумаро вэ́рго, на́лачхо, псирэ́ла сыр шчэр (ле́во), саво́ рыкинэла и родэ́ла, конэ́с тэ хал.

⁹ Тэрдён проти лэ́стэ зоралэ́ патяибна́са, джинэ́н, со адя́кэ-паць пиристрадындлэ тумарэ́ пша́ла, савэ́ дживэ́на пир свэ́то.

¹⁰ Нэ Дэвэ́л, Саво́ бахтякирэ́ла, и Саво́ кхардя́ тумэн дрэ вечна Пэ́скири сла́ва, ко́ли тумэ́нгэ и приявэлапэ набаро́ часо тэ страдынэл, Ёв Кокоро́ кэрэ́ла тумэн зоралэды́р и дэ́ла зор, соб (кай) тумэ́ тэ на кунинэнпэ дро пэ́скиро патяибэ́н;

¹¹ мэк тэ явэ́л Лэ́скэ сла́ва и зор пэ сарэ́ ве́ки. Ами́нь.

Палатунэ́ (После́дня) Паклоны

¹² Мэ чхиндём дава́ набаро́ лыл тумэ́нгэ пир Силуаностэ, саво́ исын чачуно́ тумаро́ пшал, сыр мэ думинава, соб (кай) тэ подрикирав тумэн, рипири тэ допхэнав, со дава́ исын чачуно́ Дэвлэ́скиро бахтякирибэ́н, дро саво́ тумэ́ зоралэ́с сан тэрдэ́.

¹³ Пиридэла “паклоно” тумэ́нгэ кхангири́, со исын дро Вавило́но, Сави́ выкэдыя́ Дэвэ́л, адя́кэ-паць, сыр тумэн. Адя́кэ-паць пиридэла “паклоно” миро чхаво́ Марко.

¹⁴ Пиридэ́н “паклоно” и чамудэн екх екхэ́с Христосо́скирэ ласкаса. Мэк тэ явэ́л рама́нё (миро) тумэ́нгэ сарэ́нгэ, савэ́ исын Христосо́скирэ. Ами́нь.