1 Petr 4 - Библия - Пэ Балтитко Романи чиб (Романэс) 2019

Джиибэ́н Парудёла

¹ И палдава́, сыр Христо́со пирилыджалас пхарипэ́н дрэ лоч, адя́кэ-паць и тумэ́нгэ приявэлапэ тэ лыджа́н пхарипэ́н; пал-дова́ со кон злыджала пхарипэ́н лочаса, одова́ ману́ш мэкэ́ла тэ кэрэ́л грэ́хи,

² соб (кай) палатуно́ (последнё) часо, саво́ яця́пэ лэ́скэ тэ дживэ́л дрэ маса́, тэ дживэ́л адава́ ману́ш на пир пэ́скирэ-лочакиро тырдыпэ́н, а пир Дэвлэ́скири во́ля.

³ Пал-дова́ со ухты́лла (до́си) дова́, со тумэ́ англэды́р кэрэ́нас, сыр На́юды, савэ́ камэ́на тэ кэрэ́н: ке́ли тумэ́ рикирдэ пэс дрэ на́гожа рэ́нды (де́лы), дро на́лачхо камибэн дрэ маса́, дро пибэ́н магирибнаса, дро дылыно́ хабэ́н и пибэ́н би меракиро, дро биладжакуно мангипэ́н идолэ́нгэ.

⁴ Палдава́ ж адалэ́ На́юды дивинэна, со тумэ́ буты́р на праста́на кхэтанэ́ лэ́нца пэ на́гожа рэ́нды, и калякирэна тумэн,

⁵ нэ лэ́нгэ трэй явэ́ла тэ дэн отпхэныбэ́н анги́л Одолэ́стэ, Кон явэ́ла сыг тэ сэндякирэ́л джидэн и мулэн.

⁶ Ваш дава́ и мулэнгэ сыс пхэндло́ пал бахталы́ зан (звесь), соб (кай) ёнэ, савэ́ сыс сэндиндлэ, ке́ли ёнэ дживдэ́ дро манушы́тко лоч, соб (кай) ёнэ тэ дживэ́н дро ду́хо (фа́но), сыр Дэвлэ́скэ исын лачхо́.

Дэвлэ́скирэ Тала́ны ваш Лачхипэ́н

⁷ Нэ сыг сарэскэ явэ́ла ко́нцо (яго́ро): палдава́ ракхэ́нпэ и дживэ́н годьварэс, ке́ли тумэ́ мангэ́напэ Дэвлэ́скэ;

⁸ а буты́р сарэ́стыр сыкавэ́н паты́в екх екхэ́скэ сарэ́ илэ́стыр, пал-дова́ со паты́в зачхакирэла бут грэ́хи;

⁹ прилэ́н манушэ́н сарэ́ илэ́стыр, савэ́ явэ́на кэ тумэ́ би холямэ́ ракирибнаскиро;

¹⁰ дынаринэ́н екх екхэ́скэ долэ́ таланоса, саво́ тумэ́ дорэснэ́ Дэвлэ́стыр сы́рбы лачхэ́ кхэри́тка барыдыра́ тэ пиридэ́н манушэ́нгэ ра́зна Дэвлэ́скирэ бахтякирибэна.

¹¹ Ко́ли вари-саво́ ману́ш ракирэ́ла, мэк ёв тэ ракирэ́л Дэвлэ́скирэ лавэ́нца; одова́ кон дынаринэла, мэк ёв тэ дынаринэ́л пир зор, сави́ Дэвэ́л дэ́ла лэ́скэ, соб (кай) тэ барьякирэлпэ Дэвэ́л дро саро́ пир Исусо́стэ Христосо́стэ, Савэ́скэ тэ явэ́л сла́ва и зор пэ сарэ́ ве́ки. Ами́нь.

Пирилыджа́н Мэ́ньки Сыр Христо́со

¹² Мирэ́ дро́га! На дурьен ягитконэ́ пропатякирибнастыр тэ пропатякирэл тумаро́ патяибэ́н, дро дава́ нанэ нисаво́ ди́во;

¹³ а сыр тумэ́ пирилыджана пхарипэ́н, сыр и Христо́со, радынэ́нпэ, пал-дова́ со тумэ́ бут буты́р обрадынэнапэ, ке́ли отчхакирэлапэ Лэ́скири сла́ва.

¹⁴ Ко́ли обракирэна тумэн пал Христосо́скиро лав, тэды тумэ́ сан бахталэ́, пал-дова́ со Дэвлэ́скирэ-славакиро Ду́хо (Фа́но) згия пэ тумэ́ндэ: (одолэ́ мануша́ калякирэна Лэс, а тумэ́ славинэна).

¹⁵ Соб (кай) ние́кх тумэ́ндыр тэ на злыджал пхарипэ́н сыр замарибнари (умарибнари), ци чор, ци ману́ш, саво́ кэрэ́ла фуипэ́н; ци сыр ману́ш, саво́ исын ґа́лко кэ чу́жо миштыпэ́н;

¹⁶ а ко́ли тумэ́ пирилыджана пхарипэ́н сыр Христиани, тэды на ладжан, а славинэ́н Дэвлэ́с, пал-дова́ со тумэн кхарэ́на адя́кэ.

¹⁷ Пал-дова́ со подги́я часо, со явэ́на тэ сэндинэ́н манушэ́н дро Дэвлэ́скиро Кхэр, и ко́ли амэ ява́са пэ́рва мануша́ пэ сэ́ндо, тэды, со явэ́ла одолэ́ манушэ́нгэ, савэ́ на кандэ́на Дэвлэ́скири бахталы́ зан (звесь)?

¹⁸ И ко́ли чачунэ́ манушэ́скэ древа́н пхаро́ явэ́ла тэ зракхэлпэ, тэды, со явэ́ла надэвлытконэнца, и грэхитконэ́ манушэ́са?

¹⁹ И палдава́ мануша́, савэ́ пирилыджана пхарипэ́н пир Дэвлэ́скири во́ля, мэк ёнэ тэ отдэ́н пэ́скиро ди Лэ́скэ, Кон исын чачуно́, и Кон создыя́ лэн, и мэк ёнэ дурэды́р тэ кэрэ́н лачхипэ́н.