1 Petr 3 - Библия - Пэ Балтитко Романи чиб (Романэс) 2019

Рома́ и Лэ́нгирэ Ромня́

¹ Адя́кэ-паць и джувля́лэ, кандэ́н пэ́скирэ ромэн, со ко́ли вари-кон лэ́ндыр на патя́ла Дэвлэ́скирэ лавэ́скэ, тэды тумэ́ пэ́скирэ джиибнаса сы́рбы пирикэрэна лэн, со ёнэ би лавэскиро явэ́на тэ патя́н Дэвлэ́скэ,

² и ке́ли рома́ явэ́на тэ дыкхэ́н тумаро́ дэвлы́тко джиибэ́н, и дова́, со тумэ́ дэ́на паты́в лэ́нгэ и дарэ́н Дэвлэ́стыр;

³ мэк тэ явэ́л тумаро́ шукарипэ́н на дро балэнгиро закхувибэн и на дро сувнака́й, со исын пэ тумэ́ндэ и на дро барвало́ урибэ́н;

⁴ а мэк тэ явэ́л тумаро́ шукарипэ́н дро тумаро́ ило́, саво́ исын надыцьло (набицяло), пэ́скирэ штылонэ́ и ковлэ́-илэ́скирэ шукарибна́са, саво́ на кирнёла и исын древа́н шука́р анги́л Дэвлэ́стэ.

⁵ Пал-дова́ со адя́кэ-паць вари-ке́ли и свэ́нта джувля́, савэ́ндэ сыс наде́я пэ Дэвлэ́стэ, шука́р прикэдэнас пэс, нэ англэды́р сарэ́стыр ёнэ кандэнас пэ́скирэ ромэн;

⁶ адя́кэ-паць и Сара кандэлас Авраамос и кхардя́ лэс пэ́скирэ хула́са, а тумэ́ ж сан ла́кирэ чхая́, ко́ли тумэ́ кэрэ́на лачхипэ́н, тэды тумэ́ на дарэ́н нисавэ трашаибнастыр.

⁷ Адя́кэ-паць и тумэ́, муршалэ, дживэ́н и ґалён пэ́скирэ ромнен, пал-дова́ со джувлендэ исын тыкнэды́р зор и отлыджанпэ адя́кэ кэ ёнэ, сыр кэ бизорья́кирэ, кутякирэ́н (уважынэн) лэн, пал-дова́ со ёнэ лэ́на паш дро ве́чно джиибэ́н Дэвлэ́стыр, сыр и тумэ́. Кэрэ́н адя́кэ, тэды ни сави́ ва́нта (сцяна) на явэ́ла пэ дром тумэ́ндэ тэ мангэ́нпэ Дэвлэ́скэ.

Страдынэ́н и Кэрэ́н Лачхипэ́н

⁸ Явэ́н дрэ екх годы́ екх екхэ́са, подэн васта́ екх екхэ́скэ дро пхарипэ́н, тангинэ́н (жалинэн) екх екхэ́с, сыр пша́ла, малынэнпэ (дружынэн) и явэ́н ковлэ́-илы́тка,

⁹ на отдэ́н палэ фуипнаса пал фуипэ́н, ци фуй ракирибнаса пал дова́, со ракирэ́на фуипэ́н пэ тумэ́ндэ: а пэ яви́р мангэ́нпэ Дэвлэ́скэ, пал-дова́ со тумэ́ са́нас кхардэ́, соб (кай) тэ дорэсэн Дэвлэ́скиро бахтякирибэ́н.

¹⁰ Палдова́ со: “Конэ́скэ исын дро́го джиибэ́н и тэ дыкхэ́л лачхэ́ дывэса́, одова́ ману́ш мэк тэ обрикирэл пэ́скири чиб фуе́ лавэ́ндыр и пэ́скирэ ушта́ хоханэ́ лавэ́ндыр,

¹¹ мэк ёв тэ ракхэ́л пэс тэ кэрэ́л фуипэ́н, а мэк ёв тэ кэрэ́л лачхипэ́н; мэк ёв тэ родэ́л рама́нё (миро) и тэ причхувэл зор тэ латхэл лэс;

¹² пал-дова́ со Дэвэ́л дыкхэ́ла чачунэ́ манушэ́н и шунэ́ла лэ́нгиро мангипэ́н Лэ́скэ; нэ Дэвэ́л исын проти одолэ́ндэ, кон кэрэ́ла фуипэ́н.”

¹³ И кон дукхавэла тумэн, ко́ли тумаро́ ило́ хачола тэ кэрэ́н лачхипэ́н?

¹⁴ Нэ ко́ли тумэ́ злыджана пхарипэ́н пал чачипэ́н, тэды тумэ́ сан бахталэ́, на дарэ́н, мэк нисо́ тэ на трашакирэл тумэн;

¹⁵ а рикирэ́н дро ило́ Христосо́с сыр Свэнтыма и дэн паты́в Лэ́скэ, сыр Ра́скэ-Дэвлэ́скэ дрэ тумарэ́ илэ, уса́ды / сак (всегда) явэ́н скэдынэ́ тэ затэрдён лавэ́са, ке́ли вари-кон явэ́ла тэ пхучэл тумэ́ндыр пал тумари́ наде́я, нэ кэрэ́н дава́ ковлэ́ илэ́са и дара́са;

¹⁶ тэ явэ́л тумэ́ндэ лачхи́ паты́в, соб (кай) одолэ́ мануша́, савэ́ ракирэ́на проти тумэ́ндэ, тэ явэ́н ладжакирдэ́, ке́ли ёнэ нашукар отлыджанапэ кэ тумэ́ пал тумаро́ лачхо́ джиибэ́н дрэ Христосо́стэ.

¹⁷ Пал-дова́ со, ко́ли пэ дава́ исын Дэвлэ́скири во́ля, фэды́р тэ лыджас пхарипэ́н пал лачхипэ́н, сыр пал дова́, ке́ли амэ кэра́са фуипэ́н;

¹⁸ пал-дова́ со и Христо́со, соб (кай) тэ янэл амэн кэ Дэвэ́л, е́кхвар мыя́ пал амарэ́ грэ́хи, чачуно́ пал начачунэндэ, Лэ́скирэ Маса́ сыс отдынэ́ пэ мэрибэ́н, а Лэ́скиро Ду́хо (Фа́но) сыс рискирдо кэ джиибэ́н;

¹⁹ кадалэ́ Духо́са Христо́со гия́ и пхэндя́ лав одолэ́ духэнгэ, савэ́ сыс дро штарибэ́н;

²⁰ савэ́ вари-ке́ли на кандынэ́ Дэвлэ́с, и савэ́н Дэвэ́л вырикирибнаса ужакирдя саро́ дава́ часо, пака Ноё кэрэ́лас ковчэго (мохто́), дро саво́ загинэ́ на́бут мануша́, охтоджинэ (бидуе́нгиро дэш), савэ́ зракхнэпэ пане́стыр:

²¹ дава́ пани́ исын сы́рбы копия долэ́скэ, ке́ли амэ боласапэ и со зракхэ́ла амэн. Дава́ нанэ мэлалэ́-лоча́киро обморибэн, а тумэ́ дэ́на лав лачхэ́ патыва́са Дэвлэ́скэ пир Исусо́скирэ-Христосо́скиро отджидыипэн,

²² Саво́ ґаздыя́пэ дро Болыбна́скиро Раё и исын пир чачо́ васт Дэвлэ́стыр, и Лэ́скэ дынаринэна сарэ́ Янго́лы, Лэ́стэ исын сарэ́ правы и сарэ́ зорья.