1 Petr 2 - Библия - Пэ Балтитко Романи чиб (Романэс) 2019

Джидо́ Бар и Свэ́нто На́цыя

¹ Тэды мэкэ́н кажно холы́, фрэнтыма, дуемуиткима, зэвлыныпэ́н и кажна хоханэ́ лава́,

² а явэ́н тумэ́ сы́рбы бияты, савэ́ фэ́ни со бия́ндынэ, и тумэ́ тырдэнпэ кэ лавитко тхуд (Дэвлэ́скиро лав), соб (кай) тэ чалякирэнпэ лэ́са и тэ барьён кэ зракхибэ́н,

³ пал-дова́ со тумэ́ уджиндлэ́, со Дэвэ́л исын лачхо́.

⁴ Явэ́н пашылэды́р кэ Ёв, Саво́ исын сы́рбы джидо́ бар, Савэс мануша́ на прилынэ́, а Савэс Дэвэ́л выкэдыя́ сыр Дрогонэс Лэ́скэ,

⁵ и кокорэ́ тумэ́, савэ́ сан сы́рбы джидэ́ бара́, кэрэ́н пэ́стыр духовно кхэр тэ мангэ́лпэ Дэвлэ́скэ, соб (кай) тумэ́ тэ явэ́н свэ́нта рашая́, соб (кай) тэ янэ́н свэ́нто дыибэ́н, савэ́скэ явэ́ла радо Дэвэ́л пир Исусо́стэ Христосо́стэ.

⁶ Палдава́ исын пхэндло́ дро Свэ́нто Чхиныбэ́н: “Ѓа́да, мэ чхува́ва вэнглытко бар пэ Сио́но, Саво́ Мэ выкэдыём и Ёв исын дро́го Ма́нгэ: одова́ ману́ш, саво́ явэ́ла тэ патял дрэ Лэ́стэ, на явэ́ла тэ ладжал:

⁷ и адя́кэ Ёв исын дро́го ваш тумэ́нгэ, кон патя́ла, а ваш одолэ́нгэ, кон на патя́ла, Ёв исын бар, саво́ бутярнэ́ на прилынэ́, нэ саво́ яця́ шэралэ́ барэса, пал саво́ мануша́ обштавэнапэ и пэрэ́на;

⁸ пал саво́ мануша́ обштавэнапэ, пал-дова́ со ёнэ на кандэ́на Дэвлэ́скиро лав, пал-дова́ со адя́кэ лэ́нгэ сыс задуминдло.

⁹ Нэ тумэ́ сан выкэдынэ́ бияныпнастыр, кралитка рашая́, свэ́нта мануша́ Дэвлэ́скирэ миштыпна́стыр, соб (кай) тэ выпхэнэн лачхипэ́н пал Лэ́стэ, Саво́ кхардя́ тумэн калыпна́стыр дро дивно Лэ́скиро дуд (свэ́то);

¹⁰ тумэн, савэ́ на сыс Лэ́скирэ мануша́, а какана́ тумэ́ ячнэ́ Лэ́скирэ манушэ́нца, ґарэдыр тумэн на тангиндлэ (на жалиндлэ), акана́ исын Дэвлэ́скиро тангипэ́н кэ тумэ́.

Дэвлэ́скирэ Писха́рья

¹¹ Дро́га мирэ́! Мэ древа́н манга́ва тумэн, сыр манушэ́н, савэ́ наґара явнэ́ пэ дая́ пхув и савэ́ лодэна пир дава́ свэ́то: дурьён тумарэ́ лочакирэ камибнастыр, саво́ исын проти тумаро́ ди;

¹² и дживэ́н пир чачипэ́н машки́р Наюдэ́ндэ, соб (кай) одолэ́, кон ракирэ́ла чорипэ́н пэ тумэ́ндэ, со тумэ́ сан фуй, тэ дыкхэ́н тумарэ́ лачхэ́ рэ́нды и тэ славинэ́н Дэвлэ́с, ке́ли Ёв явэ́ла.

¹³ Кандэ́н кажнонэ́ ран манушэ́ндыр ваш Ра́скэ-Дэвлэ́скэ: ци крали́с сыр най упратунэдыр зорьякэ,

¹⁴ ци балунитконэс (правителёс), савэ́с кра́ли бичхадя́ тэ чхувэ́л ка́ра пэ одолэ́ манушэ́ндэ, савэ́ кэрэ́на фуипэ́н, и тэ шарэ́н одолэ́н, савэ́ кэрэ́на лачхипэ́н.

¹⁵ Пал-дова́ со пэ дава́ исын Дэвлэ́скири во́ля, соб (кай) тэ кэра́с лачхипэ́н и пир дава́ тэ явэ́н штыл ушта́ дылынэ́ манушэ́нгирэ, ке́ли ёнэ явэ́нас тэ ракирэ́н грэхи́тка лава́.

¹⁶ Дживэ́н сыр вольна мануша́; нэ тэ на явэ́л дая́ во́ля ваш дова́, соб (кай) тэ приучхакирэн грэ́хо, а дживэ́н сыр Дэвлэ́скирэ писха́рья.

¹⁷ Дэн паты́в сарэ́нгэ, сыкавэ́н паты́в пшалэ́нгэ и пхэнэ́н пир патяибэ́н дрэ Дэвлэ́стэ, дарэ́н Дэвлэ́стыр и кутякирэн крали́с.

Сыр Христо́со Страдындя́

¹⁸ Дынарья́лэ, кандэ́н и дарэ́н пэ́скирэ хуландыр, на со екхэ лачхэн и ковлэ́-илытконэн, нэ адя́кэ-паць и кодолэ́н, савэ́ биилыткэс (шылалэс) отлыджанапэ кэ тумэ́.

¹⁹ Пал-дова́ со дава́ исын лачхо́ Дэвлэ́скэ, ко́ли вари-кон пир пэ́скири паты́в ваш Дэвлэ́скэ пиридживэла мэ́ньки, пхарипэ́н на пир чачипэ́н.

²⁰ Пал-дова́ со, пал со тэ шарас тумэн кэ сла́ва, ко́ли тумэ́ мэнчынэнапэ, ке́ли тумэн марэна пал тумарэ́ грэ́хи? А ке́ли тумэ́ кэрэ́на лачхипэ́н и страдынэна пал дава́, тэды тумэ́нгэ явэ́ла бахтякирибэ́н Дэвлэ́стыр.

²¹ Пал-дова́ со тумэ́ са́нас кхардэ́ ваш дава́, пал-дова́ со и Христо́со адя́кэ-паць страдындя пал тумэ́ндэ, Ёв ячкирдя́ сыкаибэ́н (приме́ро) амэ́нгэ, сыр трэй тэ кэра́с, соб (кай) амэ тэ джас пир Лэ́скири шпэ́ра (слядо):

²² “Ёв на кэрдя́ нисаво́ грэ́хо, и на сыс нисаво́ хохаибэ́н дрэ Лэ́скирэ лава́”,

²³ пэ Лэ́стэ ракирдэ́ фуипэ́н, нэ Ёв ни пэ конэ́стэ на пхэндя́ фуй лав, и ке́ли Ёв страдынэлас, Ёв на страхакирдя вари-конэ́с, а Ёв саро́ допатякирдя Кодолэ́скэ, Кон исын Чачуно́ Сэнда́ри;

²⁴ Христо́со Кокоро́ Пэ́скирэ Масэнца ґаздыя́ амарэ́ грэ́хи пэ трушу́л, соб (кай) амэ тэ явас мулэ́ ваш грэ́хо и тэ джива́с пир чачипэ́н: Лэ́скирэ фра́нсы (раны) высастякирдэ тумэн.

²⁵ Пал-дова́ со тумэ́ са́нас хасибны́тка бакрэ́, савэ́ блэндынэнас, нэ какана́ тумэ́ рисинэ́ кэ тумаро́ Чхупна́ри (Пастырё) и кэ Кхангирья́киро Дыкхибнаскиро (Блюстителё), Саво́ ракхэ́ла тумаро́ ди.