1 Petr 1 - Библия - Пэ Балтитко Романи чиб (Романэс) 2019

¹ Пэтристыр, Исусо́скирэ Христосо́скирэ Апостолостыр, манушэ́нгэ, конэ́с Дэвэ́л выкэдыя́, савэ́ лодэна и исын росчхурдынэ пир свэ́то, дро Понто, Галатия, Кападокия, Асия и Вифиния,

² пир Дэвлэ́скирэ-Дадэ́скиро задуминыбэн ваш дова́, соб (кай) тэ кандэ́н Исусо́с Христосо́с, Саво́ отмэкця́ грэ́хи Лэ́скирэ Духо́са, соб (кай) тумэ́ тэ явэ́н помакхнэ Лэ́скирэ Ратэ́са: мэк бахтякирибэ́н и рама́нё (миро) тэ явэ́н бут бут тумэ́нгэ.

Со́ Амэ Ужакира́са

³ Мэк тэ явэ́л бахтякирдо́ Дэвэ́л Дад амарэ́ Ра́скирэ-Дэвлэ́скиро, Исусо́скирэ Христосо́скиро, Саво́ пир Пэ́скиро баро́ тангипэ́н дыя́ амэ́нгэ яви́р джиибэ́н, ке́ли отджидякирдя́ Исусо́с Христосо́с мулэ́ндыр, соб (кай) амэ́ндэ тэ явэ́л джиды наде́я,

⁴ соб (кай) тэ явэ́л амэ́ндэ паш дро нэво́ джиибэ́н дро Болыбна́скиро Раё, саво́ исын ве́чно, намагирдо, бигрэхэнгиро, саво́ Дэвэ́л ракхэ́ла ваш тумэ́нгэ.

⁵ Пал савэ́ндэ Дэвэ́л Пэ́скирэ зорья́са явэ́ла тэ дыкхэ́л ваш зракхибэ́н, саво́ исын приготовиндло амэ́нгэ и явэ́ла сыкадо дро палатуно́ часо.

⁶ Пал дава́ радынэ́нпэ какана́, мэк вари-саво́ часо тумэ́нгэ приджалапэ тэ пиридживэс мэ́ньки и тумэн явэ́на тэ пропатякирэн разнонэ ригэ́ндыр,

⁷ соб (кай) дава́ пропатякирибэн тэ допхэнэл, со тумаро́ патяибэ́н исын чачуно́ и дрогэдыр сувнака́стыр, саво́ усае́кх исын хасибны́тко, мэк ёв тэ явэ́л пропатякирдо яга́са, тэды тумаро́ патяибэ́н янэ́ла тумэ́нгэ шарибэ́н и сла́ва, ке́ли явэ́ла нэвэ́стыр Ису́со Христо́со:

⁸ Савэс тумэ́ ние́кхвар на дыкхнэ́, нэ Ёв исын дро́го тумэ́нгэ, и Савэс кэ дава́ часо на дыкхнэ́, нэ тумэ́ усае́кх патя́на дрэ Лэ́стэ и пир дава́ тумэ́ адя́кэ древа́н радынэ́напэ, со нашты́ тэ пхэнас лавэ́нца, и Савэс тумэ́ прославиндлэ,

⁹ пал-дова́ со тумэ́ зракхэна пэ́скиро ду́хо (фа́но) пал тумаро́ патяибэ́н.

¹⁰ Кадава́ зракхибэ́н родэнас пхарэ́с и сыклякирэнас лачхэ́с проро́ки, савэ́ англэды́р пхэнэнас тумэ́нгэ пал бахтякирибэ́н, саво́ явэ́ла дыно́ тумэ́нгэ.

¹¹ Ёнэ сыклякирдэ́ миштэ́с тэ уджинэ́н, ке́ли и пэ саво́ часо (цы́ро) упхэндя Христосо́скиро Ду́хо (Фа́но), ке́ли Ёв ангилпхэнэлас пал Христосо́скирэ мэ́ньки и пал Лэ́скири сла́ва, сави́ явэ́ла коригэды́р (позжэ).

¹² Лэ́нгэ сыс сыкадо, со ёнэ дынаринэ́нас (служынэ́нас) на пэ́скэ, а тумэ́нгэ, пал-дова́ со тумэ́нгэ роспхэндлэ́ бахталы́ зан (звесь) Духо́скирэ зорья́са, а пал дава́ аж Янго́лы сыклякирэнас миштэ́с.

Трэй тэ Дживэ́н Свэ́нтэс

¹³ Ваш дава́ рискирэ́н пэ́скири годы́ тэ кэрэ́н лачхипэ́н, на совэн, рикирэ́н пхэрдэ́с наде́я пэ бахтякирибэ́н, саво́ явэ́ла дыно́ тумэ́нгэ, ке́ли явэ́ла Ису́со Христо́со;

¹⁴ явэ́н сыр чхавэ́, савэ́ кандэ́на пэ́скирэ дадэн, и на дживэ́н пир пэ́скирэ-масэ́нгиро тырдыпэ́н, саво́ сыс ґарэдыр дрэ тумэ́ндэ, ке́ли тумэ́ на джиндлэ́ сыр тэ дживэ́н;

¹⁵ нэ пал-дова́ со Ёв исын Свэ́нто, Саво́ кхардя́ тумэн, явэ́н кокорэ́ свэ́нта дро саро́, со тумэ́ кэрэ́на;

¹⁶ пал-дова́ со исын чхиндло́: “Явэ́н свэ́нта, пал-дова́ со Мэ сом Свэ́нто.”

¹⁷ И ко́ли тумэ́ кхарэ́на Дадэ́са Кодолэ́с, Саво́ шэра́ (ра́внэс) сэндякирэ́ла сарэ́ манушэ́н, на дыкхи́, кон ману́ш исын, тэды дживэ́н дара́са анги́л Лэ́стэ дава́ часо, пака тумэ́ дживэ́на пэ пхув;

¹⁸ джины́, со на рупэ́са ци сувнака́са, савэ́ усае́кх нанэ важнэдыр сарэ́стыр, тумэ́ сан выкиндлэ чхучэ́ (пустонэ) джиибнастыр, саво́ тумэ́ дорэснэ́ пэ́скирэ дадэндыр;

¹⁹ а тумэ́ сан выкиндлэ дрогонэ́ Христосо́скирэ Ратэ́са, Саво́ сыс сыр Свэ́нто Бакроро́, Конэ́стэ на сыс банг и дош.

²⁰ Христо́со сыс выкэдыно англэды́р, сыр яця́ свэ́то и Саво́ явдя́ дро палатуно́ часо ваш тумэ́нгэ;

²¹ пир Лэ́стэ тумэ́ лынэ́ тэ патя́н дрэ Лэ́стэ, Саво́ отджидякирдя́ Лэс мулэ́ндыр и дыя́ сла́ва Лэ́скэ, соб (кай) тумэ́ндэ тэ явэ́л патяибэ́н и наде́я пэ Дэвлэ́стэ.

²² Сыр тумэ́ лынэ́ тэ кандэ́н чачипэ́н, тэды тумэ́ выжужакирдэ пэ́скирэ дия́ ваш чачуны́ пшалы́тко паты́в, палдава́ сыкавэ́н паты́в екх екхэ́скэ сарэ́ илэ́стыр.

²³ Тумэ́ сан нэвэ́стыр бияндлэ, на тумарэ́ дадэндыр, а Дэвлэ́скирэ лавэ́стыр, саво́ исын джидо́, и саво́ ве́чнэс зракхэ́лапэ.

²⁴ Пал-дова́ со “кажно ману́ш исын сы́рбы чар, и лэ́нгири сла́ва исын сы́рбы фэлды́тка лулудя́ (цвэты), чар зашутёла и ла́кирэ лулудя́ отпэрэна.

²⁵ Нэ Дэвлэ́скиро лав ячэ́лапэ пэ сарэ́ ве́ки.” Адава́ исын дова́ лав, саво́ пхэндяпэ тумэ́нгэ.