1 Паралипоменоно 5 - Библия - Пэ Балтитко Романи чиб (Романэс) 2019

Рувимоскири Сэм΄я (Ири)

¹ Чхавэ́ Рувимо́скирэ, англатунэ́-Израилёскирэ чхавэ́скирэ, – ёв сыс англатуно́ чхаво́; нэ ке́ли ёв магирдя пэ́скирэ-дадэ́скиро чхуибэ́н, нэ лэ́скиро англатуныбэн сыс отдыно́ Ёза́скирэ (Иосифо́скирэ) чхавэ́нгэ, чхавэ́скэ Израилёскирэскэ долэса, соб (кай) тэ на гинэнпэ лэ́нгэ [Ёзаскирэнгэ] англатунэ́ бияныбнытконэнца;

² пал-дова́ со Юда сыс зоралэды́р пэ́скирэ пшалэ́ндыр, и тхагариса яця́ ёв, нэ англатуныбэн зачхиндло́ сыс пэ Ёзастэ (Иосифостэ).

³ Чхавэ́ Рувимо́скирэ, англатунэ́ Израилёскирэ-чхавэ́скирэ сыс: Ханохо, Фалу, Хецроно и Харми.

⁴ Чхавэ́ Иоилёскирэ сыс: Шэмаё, лэ́скиро чхаво́; лэ́скиро чхаво́ Гого, лэ́скиро чхаво́ Шымеё,

⁵ лэ́скиро чхаво́ Миха, лэ́скиро чхаво́ Реаия, лэ́скиро чхаво́ Ваало,

⁶ лэ́скиро чхаво́ Беера, савэ́с залыджия́ дрэ пле́но Феглафеласаро, Асирия́киро кра́ли. Ёв сыс тхага́ри Рувимлянэнгэ.

⁷ И лэ́скирэ пша́ла, пир лэ́нгирэ кхэри́тка ро́ды (пле́ми), пир лэ́нгирэ родоскиро зачхиныбэн сыс: шэрало́ Иеиэлё (Уиэлё), пало́ лэ́стэ Заха́рия.

⁸ И Бэла, чхаво́ Азазоскиро, Шэмаёскирэ-чхавэ́скиро, Иоилёскирэ-чхавэ́скиро. Ёв дживдя́ кэ Ароэро кэ Не́во и Ваал-Меоно;

⁹ а кэ васто́ко ёв дживдя́ кэ загиибэ́н пэ чхучи́ пхув (пустыня), сави́ гия́ рэка́тыр (лэня́тыр) Евфратостыр, пал-дова́ со кхэритка мурдала́ ското лэ́нгиро сыс бут пэ Галаадоскиро пхув.

¹⁰ Дрэ дывэса́ Сауло́скирэ лыджинэ́ ёнэ марибэ́н Агарянэнца, савэ́ хасинэ́ лэ́нгирэ вастэ́стыр; а ёнэ лынэ́ тэ дживэ́н дрэ лэ́нгирэ ша́тры, пир сари́ Галаадо́скирэ-васточно риг.

Гадоскири Сэм΄я (Ири)

¹¹ Чхавэ́ Гадо́скирэ дживдэ́ проти лэ́ндэ пэ Васаноскири пхув кэ Салха:

¹² дро Васа́но Иоилё сыс шэрало́, Шафано яви́р, пало́ лэ́стэ Иаанаё (Яанаё) и Шафато.

¹³ Лэ́нгирэ пшалэ́н лэ́нгирэ чэкарьятыр [лэ́нгирэ-дадэнги́рэ сэмэнцатыр-ю.о.] сыс эфта́: Михаило, Мешуламо, Шэва, Иораё, Якано (Иакано), Зия и Еве́ро.

¹⁴ Ѓа́да, сыс Авихаилоскирэ чхавэ́, Хуриёскирэ-чхавэ́скирэ, Иороахоскирэ (Яроахоскирэ) чхавэ́скирэ, Галаадо́скирэ чхавэ́скирэ, Михаилоскирэ чхавэ́скирэ, Ешышаёскирэ чхавэ́скирэ, Яхдоскирэ (Иахдоскирэ) чхавэ́скирэ, Бузаскирэ чхавэ́скирэ.

¹⁵ Ахи, чхаво́ Авдиилоскиро, Гуниёкирэ-чхавэ́скиро, сыс шэрало́ пэ пэ́скиро ро́до.

¹⁶ Ёнэ дживдэ́ кэ Галаа́до, кэ Васа́но и дрэ фо́рья, савэ́ сыс тэл зор лэ́стэ и дрэ сарэ́ фо́рья, савэ́ сыс трусця́л Сароно, кэ/жы́ко лэ́нгири ме́жа.

¹⁷ Сарэ́ ёнэ сыс пиригиндлэ дрэ дывэса́ Иоафамоскирэ, Юдэя́кирэ крали́скирэ, и дрэ дывэса́ Иеровоамоскирэ, Израилёскирэ крали́скирэ.

¹⁸ Чхавэ́ндэ Рувимо́скирэ и Гадоскирэндэ и дро паш кхэри́тко ро́до Манасия́скиро сыс мануша́ марибны́тка, мурша́, савэ́ лыджа́нас шчы́то и курта́ла, савэ́ мардэ́ лукостыр и сыс сыклякирдэ́ кэ марибэ́н, лэн сыс штардэша́ штар тысёнцы эфташэла́ шовдэша́ манушэ́н, савэ́ выгинэ́ пэ марибэ́н.

¹⁹ И мардэ́пэ ёнэ Агарянэнца: Иетуромоса, Нафишоса и Надавомоса.

²⁰ И дыно́ сыс лэ́нгэ васт проти лэ́ндэ, и отдынэ́ сыс дрэ лэ́нгирэ васта́ Агаряни и саро́, со лэ́ндэ сыс. Пал-дова́ со ёнэ дрэ марибнаскиро часо (цы́ро) кхардэ́ зоралэ́с Дэвлэ́с, и Ёв шундя́ лэн, пал-дова́ со ёнэ патяндынэпэ дрэ Лэ́стэ.

²¹ И лынэ́ ёнэ лэ́нгирэ кхэритконэ́ мурдалэ́н: верблюдэн пандждэша́ тысёнцы, тыкнэ́ мурдалэ́ндыр дуйшэла́ пандждэша́ тысёнцы, ослэн дуй тысёнцы, и шэл тысёнцы манушэ́н,

²² пал-дова́ со бут лэ́ндыр пынэ́ мулэнца, адя́кэ, сыр Дэвлэ́стыр сыс дава́ марибэ́н. И дживдэ́ ёнэ пэ лэ́нгиро штэ́то кэ пиритрадыпэн.

²³ Чхавэ́ Манасия́скирэ пашэ́-родыцо́стыр, дживдэ́ пэ доя́ пхув, Васаностыр кэ Ваал-Ермоно и Сениро и кэ/жы́ко бэ́рга Ермоноскири; и лэн сыс бут.

²⁴ И ґа́да, сыс лэ́нгирэ славутна шэралэ́ пэ стрэ́чы (поколении): Еферо, Ишы, Елиило, Азриило, Еремее, Годавия и Ягдиило (Иагдиило), мурша́ зоралэ́, мурша́ славутна, савэ́ сыс шэралэ́ пэ пэ́скирэ ро́ды.

²⁵ Нэ ке́ли ёнэ кэрдэ́ грэ́хо проти пэ́скирэ-дадэнги́рэ Дэвлэ́стэ и лынэ́ биладжакунэс тэ псирэ́н пала́л пал долэ́-пхувья́кирэ манушэ́нгирэ дэвлорэндэ, савэ́н традыя́ криг Дэвэ́л лэ́нгирэ мо́стыр,

²⁶ то тэды Израилёскиро Дэвэ́л ґаздыя́ ду́хо (фа́но) Фулоскиро, Асирия́кирэ-крали́скиро, и ду́хо (фа́но) Феглафеласароскиро, Асирия́кирэ-крали́скиро, и ёв традыя́ криг Рувимлянэн и Гадитянэн и паш ро́дыцо Манасияскири/о, и лыджия́ лэн дро Халахо, и дро Хаворо, и дро Аро, и пэ рэка (лэнь) Гозано, кай ёнэ дживэ́на кэ дава́ дывэ́с.