1 Паралипоменоно 29 - Библия - Пэ Балтитко Романи чиб (Романэс) 2019

Упхэныбэ́н Саламоноскэ тэ Чхувэ́л Кхангири́

¹ И ишчо (инкэ́) пхэндя́ кра́ли Дави́до сарэ́ скэдыибнаскэ: “Соломо́но, миро чхаво́, савэ́с екхэ́с выкэдыя́ Дэвэ́л, тэрно́ и набарэ́-зорьякиро, а буты́ дая́ исын бари; пал-дова́ со на ваш манушэ́скэ явэ́ла Кхэр дава́, а ваш Ра́скэ-Дэвлэ́скэ.

² Сарэ́ зорье́ндыр мэ скэдыём ваш Кхэр Дэвлэ́скиро мирэскиро сувнака́й ваш сувнакунэ́ предме́ты, и руп ваш рупувэ́ предме́ты, и харко́ма ваш харкунэ́ предме́ты, састы́р ваш саструнэ́ предме́ты, и вэш ваш вэшэскирэ предме́ты, бара́ ониксо и бара́ учхудэ, бара́ гожа и кажнонэ́ мастинэнгирэ (цвятэнгирэ), и люба дро́га бара́, и бут мраморо [мраморытка плиты-ю.о.];

³ и ишчо (инкэ́): пир миро дова́, со мэ отдыён пэс Кхэрэ́скэ мирэ́ Дэвлэ́скиро, исын ма́ндэ миро кучипэ́н сувнака́стыр и рупэ́стыр; и лэс мэ отда́ва ваш мирэ́-Дэвлэ́скиро Кхэр, упра́л сарэ́стыр, со мэ скэдыём ваш свэ́нто Кхэр;

⁴ трин тысёнцы тала́нты сувнака́й, сувнака́й Офирско, и эфта́ тысёнцы тала́нты жужо́ руп, тэ обчхувэн ва́нты дрэ кхэра́,

⁵ ваш кажно сувнакуно́ предме́то, и ваш кажно рупуво́ предме́то, и ваш кажно выкэрибэн, со кэрэ́ла спе́цо пир вастэнгири буты́. Ци камэ́ла ишчо (инкэ́) вари-кон тэ дэл ададывэ́с ваш Ра́скэ-Дэвлэ́скэ?”

⁶ И лынэ́ тэ дэн чэкарье́нгирэ барыдыра́, и барыдыра́ Израилёскирэ пэ ро́дыцы, и барыдыра́ пэ тысёнцы и пэ шэла́, и барыдыра́ пэ фэлатин крали́скиро.

⁷ И ёнэ дынэ́, соб (кай) тэ чхувэ́н Дэвлэ́скиро Кхэр пандж тысёнцы тала́нты и дэш тысёнцы драхмы сувнака́й, и руп дэш тысёнцы, и харкунэ́ дэшуохто тысёнцы тала́нты, и састы́р шэл тысёнцы тала́нты.

⁸ И конэ́стэ латхнэпэ дро́га бара́, то одолэ́ отдынэ́ и лэн дрэ кучипнаскири пиралы́ Ра́скирэ-Дэвлэ́скирэ Кхэрэ́скэ, пэ васта́ Ехиилоскэ Герсонитяниноскэ.

⁹ И радындлэпэ мануша́ зэвлыпнаскэ лэнгирэскэ, пал-дова́ со ёнэ сарэ́ илэ́стыр отдэнас Ра́скэ-Дэвлэ́скэ; адя́кэ-паць и кра́ли Дави́до древа́н радындяпэ.

Дави́до Барьякирэ́ла Дэвлэ́с

¹⁰ И бахтякирдя́ Дави́до Рас-Дэвлэ́с анги́л саро́ скэдыибэ́н, и пхэндя́ Дави́до: “Тэ явэс бахтякирдо́ Ту, Раё Дэ́вла, Израилёскиро, амарэ́ дадэ́скиро, векостыр и пэ ве́ко!

¹¹ Тыро́, Раё Дэ́вла, райканыпэн, и зоралыпэ́н, и сла́ва, и збе́рдыма (побе́да), и саро́, со исын пэ болыбэ́н и пэ пхув, исын Тыро́; Тыро́, Дэ́вла, кралипэ́н, и Ту сан вучэды́р сарэ́стыр, сыр Баро́ Рай, Саво́ хулаинэла.

¹² И барвалыпэ́н, и сла́ва Тырэ́ мо́стыр, и Ту хулаинэса пэ саро́; и дро Тыро́ васт зор исын зор и зоралыпэ́н; и дрэ Тыри́ зор тэ барьякирэс и тэ зоралякирэс саро́.

¹³ И акана́, амаро́ Дэ́вла, амэ парикираса Ту́кэ, и шараса славу́тно лав Тыро́.

¹⁴ Пал-дава́ со кон мэ сом, и кон мирэ́ мануша́ исын, со амэ могиндям адя́кэ тэ отдас куч предме́ты? Нэ Ту́тыр исын саро́, и Тырэ́ вастэ́стыр дорэсно, со амэ отдыям Ту́кэ,

¹⁵ пал-дова́ со чу́жа мануша́ амэ сам анги́л Ту́тэ и сыр мануша́, савэ́ явдя́м явирэ рига́тыр, сыр и сарэ́ амарэ́ дада́; сыр зэр (цень) исын амарэ́ дывэса́ пэ пхув, и нанэ ничи́, со ґара́ (длу́гэс) тырдэлапэ (исын ве́чно).

¹⁶ Раё Дэ́вла, Дэ́вла амаро́! Саро́ дава́ баро́ запасо, саво́ скэдыям амэ, соб (кай) тэ чхувас Кхэр Ту́кэ, свэнтонэ́ Тырэ́ лавэ́скэ, Тырэ́ вастэ́стыр исын ёв, и саро́ исын Ту́тыр.

¹⁷ Джино́м, миро Дэ́вла, со Ту спробинэса ило́ и камэ́са жужэилыткима; мэ жужэ́ (чыстонэ) илэ́стыр мирэстыр дыём саро́ дава́, и акана́ мэ дыкха́ва, со и Тырэ́ мануша́ адя́кэ-паць, савэ́ ада́й исын, радыма́са янэ́на Ту́кэ.

¹⁸ Раё Дэ́вла, Дэ́вла Авраамо́скиро, Исаакоскиро и Израилёскиро, дадэнги́рэ-амарэнгиро! Зра́кх дава́ пэ ве́ко, дава́ отлыджыибэн думкакиро, пэ илэ манушэ́нгирэ Тырэнгирэ, и ян ило́ лэ́нгиро кэ Ту.

¹⁹ Соломоно́скэ, мирэ́ чхавэ́скэ, дэ ило́ чачуно́, соб (кай) ёв тэ ракхэ́л припхэныбэна́ Тырэ́, отчхакирибэн Тыро́ и упхэныбэна́ Тырэ́, и тэ кэрэ́л саро́ дава́ и тэ кэрэ́л кхэр, ваш саво́ мэ кэрдём запасы.”

²⁰ И пхэндя́ Дави́до сарэ́ скэдыибнаскэ: “Тэ бахтякирэн сарэ́ амарэс Рас Дэвлэ́с, Дэвлэ́с амарэс.” – И бахтякирдя́ саро́ скэдыибэ́н Рас-Дэвлэ́с, Дэвлэ́с пэ́скирэ-дадэнгирэс, и пынэ́, и поклониндлэпэ Ра́скэ-Дэвлэ́скэ и крали́скэ.

Соломонос Помакхнэ

²¹ И яндлэ́ свэ́нта дыибэна́ Ра́скэ-Дэвлэ́скэ, и ґаздынэ́ цэ́ло схачкирибэ́н Ра́скэ-Дэвлэ́скэ, пэ яви́р дывэ́с пало́ (после) дава́ дывэ́с: тысёнцо тэрнэ́ гурувэ́н, тысёнцо бакрэ́н, тысёнцо бакрорэ́н лэ́нгирэ тхадунэ чхуибнаса, и бут свэ́нта яныбэна́ Ра́скэ-Дэвлэ́скэ сарэ́ Израилёстыр.

²² И ханэ́, и пинэ́ анги́л Растэ-Дэвлэ́стэ дрэ дова́ дывэ́с, барэ́ радыма́са, и дрэ яви́р мо́ло чхудэ́ крали́са Соломонос, Давидо́скирэ чхавэ́с, и помакхнэ лэс анги́л Растэ-Дэвлэ́стэ дрэ шэралэ́ барыдырэстэ, а Садокос дрэ рашастэ.

²³ И бэстя́ Соломо́но пэ троно Ра́скирэ-Дэвлэ́скиро, сыр кра́ли, пэ штэ́то Давидо́скиро, пэ́скирэ дадэ́скиро, и сыс мишто́ саро́ лэ́стэ, и саро́ Израилё кандыя́ лэс.

²⁴ И сарэ́ барыдыра́ и мануша́ дрэ зор, адя́кэ-паць и сарэ́ крали́скирэ Давидо́скирэ чхавэ́ поддынэпэ Соломоно́скэ, крали́скэ.

²⁵ И ґаздыя́ вучэ́с Рай Дэвэ́л Соломонос анги́л сарэ́ якха́ Израилёскирэ, и дыя́ лэ́скэ сла́ва кралипнаскири, сави́ на сыс англэды́р лэ́стыр ни екхэ крали́стэ пэ Израилё.

²⁶ И Дави́до, чхаво́ Есеёскиро, сыс крали́са пэ саро́ Израилё.

²⁷ Часо лэ́скирэ кралипнаскэ пэ Израилё сыс штардэша́ бэрш: дро Хевро́но сыс крали́са ёв эфта́ бэрш, и дро Ерусалимо сыс крали́са трия́нда трин бэрш.

²⁸ И мыя́ дро лачхо́ пхурипэн, бахталыи джиибнаса, барвалыпнаса и слава́са; и яця́ крали́са о Соломо́но, лэ́скиро чхаво́, пэ штэ́то лэ́скиро.

²⁹ Рэ́нды (де́лы) крали́скирэ Давидо́скирэ, англатунэ́ и палатуно́ (после́дня), чхиндлэ́ дрэ зачхиныбэна Самуилоскирэ, и дрэ зачхиныбэна Нафаноскирэ-пророкоскирэ, и дрэ зачхиныбэна Гадо́скирэ.

³⁰ Адя́кэ-паць и саро́ кралипэ́н лэ́скиро, и муршкипэн лэ́скиро, и ваканцыи (случаи), савэ́ кэрдэ́пэ лэ́са, и Израилёса, и сарэ́ пхувья́кирэ кралипнэнца.