1 Паралипоменоно 26 - Библия - Пэ Балтитко Романи чиб (Романэс) 2019

Ракхибна́рья пэ По́рта

¹ Ѓа́да, сыр росчхудэ ракхибнарье́н пэ вудара́: Кореянэндыр Мешэлэмия, Кореёскиро чхаво́, чхавэ́ндыр Асафоскирэндыр.

² Чхавэ́ Мешэлэмияскирэ сыс: англатуно́ Заха́рия, яви́р Едиало, три́то Зевадия, шта́рто Яфниило,

³ па́нджто Еламо, шо́вто Егоханано (Иегоханано), эфта́то Елиегоэнаё.

⁴ Чхавэ́ Оведо-Эдомоскирэ сыс: англатуно́ Шэмаия, яви́р Егозавадо (Иегозавадо), три́то Иоахо, шта́рто Сахаро, па́нджто Нафанаило,

⁵ шо́вто Амиило, эфта́то Исахаро, охто́то Пеульфаё, пал-дава́ со Дэвэ́л бахтякирдя́ лэс.

⁶ Лэ́скирэ чхавэстыр Шемаиястыр бия́ндынэ адя́кэ-паць чхавэ́, савэ́ сыс барыдырэ́нца дро пэ́скиро ро́до; пал-дова́ со ёнэ сыс зоралэ́ мурша́.

⁷ Чхавэ́ Шемаияскирэ сыс: Офни, Рефаило, Ове́до и Елзавадо, пша́ла лэ́скирэ, мурша́ зоралэ́, Елия и Семахия.

⁸ Сарэ́ ёнэ сыс Овед-Эдомоскирэ чхавэ́ндыр; ёнэ, и лэ́нгирэ чхавэ́, и лэ́нгирэ пша́ла сыс лачхэ́ мануша́ кэ дова́ и сыс дрэ зор: лэн сыс Овед-Эдомостэ шовдэша́ дуй.

⁹ Мешэлемиястэ сыс дэшуохто чхавэ́ и пша́ла, мануша́ таланытка.

¹⁰ Хосостэ, чхавэ́ндыр Мерариноскирэндыр, чхавэ́ сыс: Шимри шэрало́ (надыкхи пэ дава́, со ёв на сыс англатуно́), нэ дад лэс чхудя́ шэралэса;

¹¹ Яви́р Хелкия, три́то Тевалия, шта́рто Заха́рия, сарэ́н чхавэ́н и пшалэ́н Хосостэ сыс дэшутрин.

¹² Ѓа́да, сыр росчхудэ ракхибнарье́н пэ по́рты пир чэкарьенгиро (семействэнгиро) шэралыпэн, кон сыс дрэ зор пэ буты́ кхэтанэ́ лэ́нгирэ пшалэ́нца, тэ дынаринэ́н дро Ра́скирэ-Дэвлэ́скиро Кхэр.

¹³ И чхурдынэ́ ёнэ жре́биё, сыр тыкно́, адя́кэ и баро́, пир пэ́скирэ чэ́карья (семействы) пэ кажна по́рты.

¹⁴ И выпыя жре́биё пэ васто́ко Шелемияскэ; и Захарияскэ, лэ́скирэ чхавэ́скэ, годьварэ́ юнкароскэ (советникоскэ), чхурдынэ́ жре́биё, и выгия́ лэ́скэ жре́биё пэ паш-рат;

¹⁵ Овед-Эдомоскэ пэ паш-дывэ́с, а лэ́скирэ чхавэ́нгэ пашы́л пираля́.

¹⁶ Шупимоскэ и Хососкэ пэ западо (пал паня́), пашы́л по́рта Шелехет, кай дром ґаздэ́лапэ, и кай ракхибна́рья проти ракхибнарье́ндэ.

¹⁷ Кэ васто́ко сыс пир шов Леви́ты, кэ паш-рат сыс пир штар, кэ паш-дывэ́с пир штар, а пашы́л пираля́ пир дуй.

¹⁸ Кэ западо пашы́л трэ́мо сыс пэ дром пир штар, пашы́л са́мо трэ́мо пир дуй.

¹⁹ Ѓа́да, сыр росчхудэ ракхибнарье́н пэ по́рты чхавэ́ндыр Кореёскирэндыр и чхавэ́ндыр Мерарискирэндыр.

²⁰ Леви́ты, лэ́нгирэ пша́ла, дыкхнэ́ пал кучипэна Ра́скирэ-Дэвлэ́скирэ Кхэрэскир и пал кучипнаскирэ пираля́, кай чхувэ́нас отдынэ́ да́ры.

²¹ Чхавэ́ Лаэданоскирэ, Герсоноскирэ чхавэ́скирэ – Лаэданостыр, чэкарьенгирэ (семействэнгирэ) шэралэстыр Лаэданостыр Герсонсконэстыр: Ехиэло (Иехиело).

²² Чхавэ́ Ехиэлоскирэ сыс: Зефамо и Иоило, лэ́скиро пшал, дыкхнэ́ пал кучипнаскирэ пираля́ Ра́скирэ-Дэвлэ́скирэ Кхэрэскир,

²³ кхэтанэ́ Амрамоскирэ родоса, Ицгароскирэса, Хевроноскирэса, Озиилоскирэса.

²⁴ Шевуило, чхаво́ Гирсоноскиро, Мойза́скирэ (Моисеёскирэ) чхавэ́скиро, сыс шэрало́ дыкхибнари пэ кучипнаскирэ пираля́.

²⁵ Лэ́скирэ пшалэ́стэ Елизеростэ сыс: чхаво́ Рехавия, лэ́стэ чхаво́ Исаё, лэ́стэ чхаво́ Иора́мо, лэ́стэ чхаво́ Зихриё, лэ́стэ чхаво́ Шэломифо.

²⁶ Шэломифо и лэ́скирэ пша́ла дыкхнэ́ пал сарэ́ кучипнаскирэ пираля́ ваш отдынэ́ да́ры, савэ́ отдыя́ кра́ли Дави́до и шэралэ́ чэкарьенгирэ, и барыдыра́ пэ тысёнцы, и барыдыра́ пэ шэла́, барыдыра́ (командиры) халадэ́нгирэ.

²⁷ Дорэсыбнастыр пэ марибэ́н и заухтылыбнастыр (добычатыр) ёнэ дэ́нас пэ Ра́скирэ-Дэвлэ́скиро Кхэр тэ подрикирэн.

²⁸ И саро́, со отдыя́ проро́ко Самуи́ло, и Са́уло, чхаво́ Кисоскиро, и Авени́ро, чхаво́ Нироскиро, и Иоа́во, чхаво́ Саруяскиро, саро́ сыс отдыно́ сыс пэ васта́ Шэломифоскэ и лэ́скирэ пшалэ́нгэ.

²⁹ Ицгароскирэ родо́стыр: Хенания и чхавэ́ лэ́скирэ сыс чхудэ́ тэ дынаринэ́н Израильтянэнгэ, лыла́-чхиныбнарье́нца и сэндарье́нца.

³⁰ Хевроноскирэ кхэритконэ́ родо́стыр (племёстыр): Хашавия и лэ́скирэ пша́ла, мануша́ муршканэ́, тысёнцо эфташэла́ мануша́, савэ́ дыкхнэ́ пэ Израилё пир дая́ риг Иорданоскири кэ западо, пир сарэ́ рэ́нды пир свэ́нто буты́ Ра́скэ-Дэвлэ́скэ и пир дынарибэ́н крали́скэ.

³¹ Хевроноскирэ кхэритконэ́ радостыр о Ерия (Иерия) сыс шэрало́ Хевронянэндэ, дрэ лэ́нгирэ ро́ды, дрэ стрэ́чы. Дрэ штардэшытко бэрш Давидо́скиро кралипэ́н лэн загиндлэ, и латхнэ́ машки́р лэ́ндэ манушэ́н муршканэн дрэ Иазе́ро Галаадоскиро,

³² И лэ́скирэ пша́ла, мануша́ таланытка сыс дуй тысёнцы эфташэла́, ёнэ сыс шэралэ́ чэкарьенгирэ (семействэнгирэ). Лэн чхудя́ кра́ли Дави́до пэ Рувимоскиро ро́дыцо, и Гадоскиро, и пэ паш-ро́дыцо Манасия́скиро, пир сарэ́ Дэвлэ́скирэ рэ́нды и крали́скирэ рэ́нды.