1 Паралипоменоно 18 - Библия - Пэ Балтитко Романи чиб (Романэс) 2019

Дави́до Бутэды́р Кэрэ́ла Пэ́скиро Кралипэ́н

¹ Пало́ (после) дава́ Дави́до пиримардя Филистимлянэн, и штылякирдя лэн, и лыя́ Ге́фо и фо́рья, савэ́ сыс тэл лэ́скири зор.

² Ёв пиримардя адя́кэ-паць Моавитянэн, и кэрдэ́пэ Моавитяни Давидо́скирэ писхарье́нца, и лыджинэ́ лэ́скэ дыибэ́н (дань).

³ И пиримардя Дави́до Адраазарос, Сувакирэ крали́с, дро Емафо, ке́ли одова́ гия́ тэ зоралякирэл пэ́скиро васт пашы́л рэка (лэнь) Евфрато.

⁴ И лыя́ Дави́до лэ́стыр тысёнцо марибны́тка вурдына́, эфта́ (битринэ́нгиро дэш) тысёнцы манушэ́н, савэ́ сыс уклистэ́ пэ грэ́ндэ и биш тысёнцы манушэ́н, савэ́ гинэ́ пэзал, и роспхагирдя́ Дави́до сарэ́ марибны́тка вурдына́, (пиричхины жылы грэ́ндэ) и ячкирдя́ лэ́ндыр фэ́ни шэл.

⁵ Сирияни Дамаскостыр явнэ́ тэ подэн васт (пэ помош) Адраазароскэ, Сувакирэ крали́скэ, нэ Дави́до домардя́ биш тэ дуй тысёнцы Сириянэн.

⁶ И чхудя́ Дави́до ракхибнытконэ халадэ́н дрэ Сирия Дамаскоскири, и кэрдэ́пэ Сирияни Давидо́скирэ писхарье́нца, лыджыи лэ́скэ дыибэ́н. И помогиндя Рай Дэвэ́л усе́нде (кай ёв тэ на джал) Давидо́скэ.

⁷ И лыя́ Дави́до сувнакунэ́ шчы́ты, савэ́ сыс Адраазароскирэ писхарье́ндэ, и яндя́ лэн дро Ерусалимо.

⁸ А Тивхафатыр и Куностыр Адраазароскирэ форье́ндыр лыя́ Дави́до древа́н бут харко́ма (медь). Ла́тыр Соломо́но кэрдя́ харкуно мо́рё (дэрья́в), и сты́лбы харкунэ́, и кхорэ́ (сасу́ды) харкунэ́.

⁹ И шундя́ Фоё, кра́ли Имафостыр, со Дави́до домардя́ сарэ́ халадэ́н Адраазароскирэн, Сувакирэн кралискирэн.

¹⁰ И бичхадя́ Иорамос, пэ́скирэ чхавэ́с, кэ кра́ли Дави́до, тэ выпхэнэл “шэл лачхэ́ дывэса́” лэ́скэ и тэ парикирэл лэ́скэ пал дова́, со ёв мардя́пэ Адраазароса и замардя́ лэс, – пал-дава́ со Фоё сыс дрэ марибэ́н Адраазароса, – и ёв лыя́ пэ́са кажна (ра́зна) кхорэ́ сувнакунэ́, рупувэ́ и харкунэ́.

¹¹ И отдыя́ лэн кра́ли Дави́до Ра́скэ-Дэвлэ́скэ кхэтанэ́ рупэ́са и сувнака́са, саво́ ёв лыя́ сарэ́ Наюдытконэ́ манушэ́ндыр: Идумеянэндыр, Моавитянэндыр, Амонитянэндыр, Филистимлянэндыр и Амаликитянэндыр.

¹² И Авеса, Саруяскиро чхаво́, домардя́ Идумеянэн, пэ Лондо до́ло, дэшуохто тысёнцы;

¹³ И чхудя́ Дави́до дрэ Идуме́я ракхибнарье́нгирэ халадэ́н, и кэрдэ́пэ сарэ́ Идумеяни Давидо́скэ писхарье́нца. Рай Дэвэ́л помогиндя Давидо́скэ ўсенде, карик ёв на псирдя́.

¹⁴ И сыс крали́са Дави́до пэ саро́ Израилё, и кэрдя́ сэ́ндо и чачипэ́н сарэ́нгэ пэ́скирэ манушэ́нгэ.

¹⁵ Иоа́во, Саруяскиро чхаво́, сыс халадэ́нгиро барыдыро́, и Иосафа́то, Ахилудоскиро чхаво́ сыс канцэляри (писарё),

¹⁶ Садоко, Ахитувоскиро чхаво́, и Авимеле́хо, Авиафароскиро чхаво́ – рашая́, а Суса – чхиныбнари пэ лыла́.

¹⁷ О Ване́я, Иодаёскиро чхаво́ – пэ Хелефее́ндэ и Фелефее́ндэ; а Давидо́скирэ чхавэ́ сыс англатунэ́ шэритка пашы́л крали́стэ.