1 Паралипоменоно 15 - Библия - Пэ Балтитко Романи чиб (Романэс) 2019

Ковчэго Яндлэ́ дро Ерусалимо

¹ И кэрдя́ Дави́до пэ́скэ кхэра́ дрэ Давидо́скиро фо́ро, и скэдыя́ штэ́то ваш Дэвлэ́скиро ковчэго и кэрдя́ ваш лэ́скэ бари ша́тра (ски́ния).

² Тэды пхэндя́ Дави́до: “Никонэ́скэ нашты́ тэ лыджа́л Дэвлэ́скиро ковчэго, апри́ч Левитэндэ; пал-дова́ со лэн выкэдыя́ пэ дава́ Дэвэ́л, соб (кай) тэ лыджа́н Дэвлэ́скиро ковчэго и тэ дынаринэ́н (тэ служинэн) Лэ́скэ пэ ве́ко.”

³ И скэдыя́ Дави́до сарэ́н Израильтянэ́н дро Ерусалимо, соб (кай) тэ лыджа́н Дэвлэ́скиро ковчэго пэ лэ́скиро штэ́то, саво́ ёв ваш лэ́скэ кэрдя́.

⁴ И кхардя́ кэ пэ Дави́до Аароноскирэн и Левитэнгирэн чхавэ́н:

⁵ чхавэ́ндыр Каафоскирэндыр, Уриилос барыдырэ́с и лэ́скирэ пшалэ́н – шэл тэ биш манушэ́н;

⁶ чхавэ́ндыр Мерарискирэндыр, Асаияс барыдырэ́с и лэ́скирэ пшалэ́н – дуйшэла́ биш манушэ́н;

⁷ чхавэ́ндыр Гирсоноскирэндыр, Иоилёс барыдырэ́с и лэ́скирэ пшалэ́н – шэл тэ трия́нда манушэ́н;

⁸ чхавэ́ндыр Елисафаноскирэндыр, Шэмаияс барыдэрэс и лэ́скирэ пшалэ́н – дуйшэла́;

⁹ чхавэ́ндыр Хевроноскирэндыр, Елиелос барыдырэ́с и лэ́скирэ пшалэ́н – охтодэша́;

¹⁰ чхавэ́ндыр Узиилоскирэндыр, Аминадавос барыдырэ́с и лэ́скирэ пшалэ́н – шэл тэдэшудуй.

¹¹ И кхардя́ Дави́до раша́н: Садокос и Авиафарос, и Левитэ́н: Уриилос, Асаияс, Иоилёс, Шемаияс, Елиелос и Аминадавос,

¹² и пхэндя́ лэ́нгэ: “Тумэ́, барыдыра́ Левитэ́нгирэ родэнгирэ, высвэнцынэнпэ кокорэ́ и тумарэ́ пша́ла, и янэ́н Ра́скирэ-Дэвлэ́скиро, Израилёскирэ-Дэвлэ́скирэ ковчэго пэ штэ́то, саво́ мэ приготовиндём ваш лэ́скэ;

¹³ пал-дова́ со сыр англэды́р на тумэ́ кэрдэ́ дава́, то тэды Рай Дэвэ́л, амаро́ Дэвэ́л, пхагирдя́ (домардя́) амэн пал дова́, со амэ на пхуцямпэ Лэ́стыр, сыр трэй.”

¹⁴ И высвэнцындлэпэ рашая́ и Леви́ты ваш дова́, соб (кай) тэ лыджа́н Ра́скирэ-Дэвлэ́скиро, Израилёскирэ Дэвлэ́скиро ковчэго.

¹⁵ И лыджинэ́ Левитэ́нгирэ чхавэ́ Дэвлэ́скиро ковчэго, сыр припхэндя́ Мо́йза пир Ра́скирэ-Дэвлэ́скиро лав, пэ псикэ́ пэ шосты (баландиня́).

¹⁶ И припхэндя́ Дави́до барыдырэ́нгэ Левитэнгирэнгэ тэ чхувэ́н пэ́скирэ пшалэ́н, савэ́ баганас пэ музыкакирэ струме́нты, арфы, и луты, и цымбалы, соб (кай) ёнэ зоралэ́с тэ поддэн зан радымакири.

¹⁷ И чхудэ́ Леви́ты Еманос, Иоилёскирэс чхавэ́с, и лэ́скирэ пшалэ́ндыр, Асафос, Верехииноскирэ чхавэ́с, а Мерарискирэ чхавэ́ндыр, пшалэ́н лэнгирэн, Ефанос, Кушаияскирэс чхавэ́с;

¹⁸ и лэ́нца пшалэ́н лэнгирэн явирэ́н пир тала́но: Захарияс, Бенос, Иазиилос (Яазиилос), Шэмирамофос, Иехиилос, Униёс, Елиавос, Ванеяс, Маасеяс, Матанияс, Елифлеёс, Микнеёс и Овед-Эдомос и Еиэлёс, сыр ракхибнарьен пэ по́рты.

¹⁹ Емано, Асафо и Ефано башадэ зоралас пэ харкунэ́ (меди́тка) цымбалы,

²⁰ а Заха́рия, Азиило, Шэмирамофо, Ехиило, Униё, Елиаво, Маасе́ё и Ване́я – пэ арфы, санэ башадэ заня́са.

²¹ А Матафия, Елифлеуё, Микне́ё, Овед-Эдо́мо, Иеиэлё и Азазия – пэ луты, соб (кай) тэ кэрэ́н начало.

²² А Хенания, Левитэнгиро барыдыро́, сыс багаибнаскиро сыклякирибнари, пал-дова́ со ёв сыс таланытко дрэ пэ́стэ.

²³ Верехия и Елкана сыс ракхибна́рья пашы́л ковчэго.

²⁴ Шэвания, Иосафа́то, Нафанаило, Амасаё, Заха́рия, Ване́я и Элиэзеро, рашая́ пхурдынэ рогэ́нца анги́л Дэвлэ́скиро ковчэго. Овед-Эдо́мо и Ехия сыс ракхибна́рья пашы́л ковчэго.

²⁵ Адя́кэ Дави́до и пхурыдыра́ Израилёскирэ и барыдыра́ пэ тысёнцы гинэ́ тэ янэ́н Дэвлэ́скирэ-завето́скиро ковчэго Овед-Едомоскирэ кхэрэ́стыр, радыма́са.

²⁶ И ке́ли Дэвэ́л помогиндя Левитэ́нгэ, савэ́ лыджинэ́ ковчэго Ра́скирэ-Дэвлэ́скирэ завето́скиро, тэды зачхиндлэ́ дро свэ́нто дыибэ́н Дэвлэ́скэ эфта́ (битринэ́нгиро дэш) гуруворэ́н и эфта́ бакрэ́н.

²⁷ Дави́до сыс уридо́ дрэ висонытко и́дя, и адя́кэ-паць и сарэ́ Леви́ты, савэ́ лыджинэ́ ковчэго, и мануша́, савэ́ багандлэ, и Хенания, барыдыро́ манушэ́нгиро, савэ́ башадэ и багандлэ. Пэ Давидо́стэ сыс ишчо (инкэ́) эфо́до паркалёстыр.

²⁸ Адя́кэ саро́ Израилё залыджалас Ра́скирэ-Дэвлэ́скирэ завето́скиро ковчэго радыма́са, пашы́л рогоскири зан и горнэнгири и цымбалэнгири, башави пэ арфы и луты.

²⁹ Ке́ли Ра́скирэ-Дэвлэ́скиро завето́скиро ковчэго загия́ дрэ фо́ро Давидо́скиро, э Мелхола, э Саулоскири чхай, дыкхця́ дрэ фэнштра и, дыкхця́ крали́с Давидо́с, саво́ ухтэлас радыма́кирэс (радыныбнаса), то ёй лыя́ тэ тэлякирэл лэс дро пэ́скиро ило́.