1 Паралипоменоно 14 - Библия - Пэ Балтитко Романи чиб (Романэс) 2019

Дави́до Барьёла дрэ Паты́в кэ Ерусалимо

¹ И бичхадя́ Хирамо, Тироскиро кра́ли, кэ Дави́до манушэ́н тэ ракирэ́н, и кедрытко вэш, и барунарьен (каменшчыкэн), и кхэра́-кэрибнаскирэн (плотникэн), соб (кай) тэ кэрэ́н лэ́скэ кхэр.

² Ке́ли уджиндя́ Дави́до, со чхудя́ лэс Рай Дэвэ́л крали́са пэ Израилё, со сыс ґаздыно́ вучэ́с лэ́скиро кралипэ́н, ваш лэ́скирэ Израилёскирэ манушэ́нгэ;

³ то тэды лыя́ Дави́до буты́р джувле́н сыр ромнен дро Ерусалимо и бия́ндынэ Давидостыр буты́р чхавэ́ и чхая́.

⁴ И ґа́да, исын лава́, савэ́ бия́ндынэ лэ́стыр дро Ерусалимо: Самусо, Соваво, Нафано, Соломо́но,

⁵ Евеаро, Елисуа, Елфале́то,

⁶ Ногахо, Нафе́ко, Яфиа,

⁷ и Елисама, Веелиада, и Елифале́фо.

⁸ И шундлэ́ Филистимля́ни, со помакхно сыс Дави́до дрэ крали́стэ пэ саро́ Израилё, и ґаздынэ́пэ сарэ́ Филистимля́ни тэ родэ́н Давидо́с. И шундя́ пал дава́ Дави́до, и гия́ проти лэ́ндэ.

⁹ И Филистимля́ни явнэ́, и тэрдинэ́ пэ до́ло Рефаимэнгиро.

¹⁰ И пхуцяпэ Дави́до Ра́стыр-Дэвлэ́стыр, ракири́: “Ци тэ джав ма́нгэ проти пэ Филистимлянэндэ, и ци отдэса Ту лэн дрэ мирэ́ васта́?” И пхэндя́ лэ́скэ Рай Дэвэ́л: “Джа́, и Мэ отда́ва лэн дрэ тырэ́ васта́.”

¹¹ И гинэ́ ёнэ дро Ваал-Перацымо, и домардя́ лэн ада́й Дави́до; и пхэндя́ Дави́до: “Пхагирдя́ Дэвэ́л вэргэ́н мирэн вастэ́са мирэса, сыр прокошыбэ́н панескиро.” Палдава́ и дынэ́ лав долэ́ штэтоскэ: Ваал-Перацымо.

¹² И ячкирдэ́ одо́й Филистимля́ни пэ́скирэ дэвлорэ́, и припхэндя́ Дави́до, и хачкирдэ́ ёнэ лэн яга́са.

¹³ И нэвэ́стыр (нэвэ́с) явнэ́ Филистимля́ни, и тэрдинэ́ пэ до́ло.

¹⁴ И ишчо (инкэ́) пхуцяпэ Дави́до Дэвлэ́стыр, и пхэндя́ лэ́скэ Дэвэ́л: “На джа́ маму́й пэ лэ́ндэ, рисев криг лэ́ндыр и джа́ кэ ёнэ бальзамитконэ вэшэскирэ рига́тыр;

¹⁵ и ке́ли шунэса глумо сы́рбы шаги (ламня) пэ бальзамитконэ-вэшэскирэ вучипэна́, тэды джа́ дро марибэ́н; пал-дова́ со выгия́ Дэвэ́л анги́л ту́тэ, соб (кай) тэ домарэл Филистимлянэнгиро ста́но (лод).”

¹⁶ И кэрдя́ Дави́до, сыр припхэндя́ лэ́скэ Дэвэ́л; и домардэ́ ёнэ Филистимлянэнгиро ста́но, Гаваоностыр кэ Газе́ро.

¹⁷ И прогия́ лав Давидо́скиро пир сарэ́ пхувья́, и Рай Дэвэ́л кэрдя́ лэс сыр дар ваш сарэ́ манушэ́нгэ.