1 Паралипоменоно 13 - Библия - Пэ Балтитко Романи чиб (Романэс) 2019

Ковчэго Яндлэ́ Кири́аф-Паримостыр

¹ И радиндяпэ Дави́до барыдырэ́нца пэ тысёнцы, барыдырэ́нца пэ шэла́ и сарэ́нца шэралэнца,

² и пхэндя́ Дави́до сарэ́ Израильтянэнгирэ скэдыибнаскэ: “Ко́ли трэй тумэ́нгэ, и ко́ли пэ дова́ явэ́ла во́ля амарэ́ Ра́скирэ-Дэвлэ́скири, амарэ́ Дэвлэ́скири, то бичхаваса пир саро́ свэ́то кэ яви́р амарэ́ пша́ла, пир сари́ Израилёскири пхув, и кхэтанэ́ лэ́нца кэ рашая́ и Леви́ты, дрэ фо́рья и гава́ лэ́нгирэ, об (кай) ёнэ тэ скэдэ́нпэ кэ амэ;

³ и янаса кэ пэ ковчэго амарэ́ Дэвлэ́скиро, пал-дова́ со дрэ Сауло́скирэ дывэса́ амэ на рисёвасас илэ́са кэ ёв.”

⁴ И пхэндя́ саро́ скэдыибэ́н: “Мэк тэ явэ́л адя́кэ”, пал-дова́ со дава́ рэ́ндо (де́ло) сарэ́нгэ манушэ́нгэ здыяпэ чачуно́.

⁵ Адя́кэ скэдыя́ Дави́до сарэ́н Израильтянэ́н, Шихоростыр Египтоскирэстыр кэ загиибэ́н дро Емафо, соб (кай) тэ янэ́н Дэвлэ́скиро ковчэго о Кири́аф-Иаримостыр.

⁶ И гия́ Дави́до и саро́ Израилё дро Кири́аф-Иаримо, со исын дрэ Юдэ́я, соб (кай) тэ янэ́н одотхы́р ковчэго Ра́скирэ-Дэвлэ́скиро, Дэвлэ́скиро, саво́ исын бэшто́ пэ херувимы, пэ саво́ пхэнэ́лапэ Лэ́скиро лав.

⁷ И лыджинэ́ ковчэго Дэвлэ́скиро пэ нэво́ вурдэ́н Авинадавоскирэ кхэрэ́стыр; и Оза и Ахия лыджинэ́ вурдэ́н.

⁸ Дави́до и сарэ́ Израильтя́ни башадэ анги́л Дэвлэ́стэ сарэ́ зорья́тыр, гиле́нца, пэ луты и арфы, и бубны, и цымбалы и ро́ги (трубы).

⁹ Ке́ли догинэ́ ёнэ кэ Хидоноскири шу́рна (гумно), Оза протырдыя́ пэ́скиро васт, соб (кай) тэ подрикирэ́л ковчэго, пал-дова́ со гурува бандькирдэ лэс.

¹⁰ Нэ Дэвэ́л холя́сыя пэ Озастэ и мулякирдя́ лэс пал дова́, со ёв протырдыя́ пэ́скиро васт кэ ковчэго; и ёв дай-паць мыя́ анги́л Дэвлэ́скиро муй.

¹¹ И задуминдяпэ Дави́до, со Дэвэ́л мулякирдя́ Озас. И кхардя́ дова́ штэ́то Пэрэц-Уцца “Озаскиро хасибэ́н’, адя́кэ ёв кхарэ́лапэ кэ дава́ дывэ́с.

¹² И страхадыя Дави́до Дэвлэ́стыр дро дова́ дывэ́с, и пхэндя́: “Сыр залыджава мэ кэ пэ Дэвлэ́скиро ковчэго?”

¹³ И на лыджия́ Дави́до ковчэго кэ пэ дро фо́ро Давидо́скиро, а рискирдя́ дром лэ́са кэ Аведароскирэ-Гефяниноскиро кхэр.

¹⁴ И яця́пэ ковчэго Дэвлэ́скиро Аведаростэ, дро лэ́скиро кхэр, трин чхона́, и бахтякирдя́ Дэвэ́л Аведароскиро кхэр и саро́, со сыс лэ́стэ.