1 Паралипоменоно 11 - Библия - Пэ Балтитко Романи чиб (Романэс) 2019

Дави́до Ячэ́лапэ Кра́ли пэ Израилё

¹ И скэдынэ́пэ сарэ́ Израильтя́ни кэ Дави́до дрэ Хевро́но, и пхэндлэ́: “Ѓа́да, амэ сам тыро́ кокало и лоч (плоть) тыри́;

² и тася́, и три́то дывэ́с, ке́ли ишчо (инкэ́) Са́уло сыс крали́са, ту вылыджиян и залыджиян Израилё, и Рай Дэвэ́л, тыро́ Дэвэ́л, пхэндя́ ту́кэ: ‘Ту явэ́са тэ ракхэ́с Мирэн Израилёскирэ манушэ́н, и ту явэ́са Мирэ́-Израилёскирэ манушэ́нгирэ барыдырэ́са.’”

³ И явнэ́ сарэ́ пхурыдыра́ Израилёскирэ кэ кра́ли дро Хевро́но, и кэрдя́ лэ́нца Дави́до заве́то дро Хевро́но анги́л Ра́скирэ-Дэвлэ́скиро муй; и ёнэ помакхнэ Давидо́с дрэ крали́стэ пэ Израилё, пир Ра́скирэ-Дэвлэ́скиро лав, пирда́л Самуилостэ.

Давидо́скиро Фо́ро

⁴ И гия́ Дави́до и саро́ Израилё кэ Ерусалимо, кэ Евусо. А одо́й сыс Евусеи, мануша́, савэ́ дживдэ́ пэ доя́ пхув.

⁵ И пхэндлэ́ Евусоскирэ мануша́ Давидо́скэ: “Ту на заджаса адари́к.” Нэ Дави́до лыя́ тва́рдыма/диз (кре́пость) Сио́но; дава́ исын фо́ро Давидо́скиро.

⁶ И пхэндя́ Дави́до: “Кон англэды́р сарэ́ндыр пиримарэла Евусее́н, одова́ ману́ш явэ́ла шэралэса и халадэ́нгирэ барыдырэ́са.” И загия́ англэды́р сарэ́ндыр Иоа́во, чхаво́ Саруяскиро, и кэрдя́пэ шэралэса.

⁷ Дави́до дживдя́ дрэ доя́ тва́рдыма/диз, палдава́ и кхардэ́ ла Давидо́скирэ фороса.

⁸ И ёв обкэрдя фо́ро трусця́л, лыи Милостыр (форо́стыр), саро́ трусця́л, и Иоа́во, обнэвякирдя палатунэ́ (после́дня) форо́скирэ паша́.

⁹ Саро́ гия́ лачхэ́с Давидо́стэ, и барьёлас ёв дрэ паты́в буты́р и буты́р, и Рай Дэвэ́л, болыбна́скирэ-янголэ́нгиро Дэвэ́л сыс лэ́са.

¹⁰ Ѓа́да, исын шэралэ́ зоралэ́ муршэндыр Давидо́стэ, савэ́ зоралэ́с лынэпэ лэ́са дро лэ́скиро кралипэ́н, кхэтанэ́ сарэ́ Израилёса, соб (кай) тэ чхувэ́с лэс крали́са, пир Ра́скирэ-Дэвлэ́скиро лав, пэ Израилё,

¹¹ и ґа́да, ци бут исын зоралэ́ мурша́, савэ́ сыс Давидо́стэ: Иесваало [Ешобеамо-ю.о.], чхаво́ Ахаманияскиро, шэрало́ пэ трия́нда манушэ́ндэ. Ёв ґаздыя́ пэ́скиро чхурдыибнытко буст пэ триншэла́ манушэ́ндэ и домардя́ лэн пал е́кх мо́ло.

¹² Пал лэ́стэ сыс Елеазаро (Елиза́ро), чхаво́ Додоскирэ-Ахохияниноскиро, ёв сыс тринэ́ зоралэндыр.

¹³ Ёв сыс Давидоса кэ Фасдамимо, карик Филистимля́ни скэдынэ́пэ пэ марибэ́н. Одо́й паш фэ́лда сыс засеиндлы ґэрстоса (ячменёса), и мануша́ нашнэ́ Филистимлянэндыр.

¹⁴ Нэ ёнэ тэрдинэ́ машки́р фэ́лда, зракхнэ́ ла и домардэ́ Филистимлянэн. И дариндя Рай Дэвэ́л баро́ зракхибэ́н!

¹⁵ Тринджинэ адалэн шэралэн трияндатыр гинэ́ упрэ́ пэ бэ́рга кэ Дави́до, дрэ ґеба́р (пешчэра) Одоламо, ке́ли Филистимлянэнгиро ста́но сыс тэрдо́ пэ до́ло Рефаимэнгиро.

¹⁶ Дави́до тэды сыс дро зоралэ́ тынэ́нца штэ́то, а ракхибнытка халадэ́ Филистимлянэнгирэ сыс тэды дро Вифлее́мо.

¹⁷ И зоралэ́с закамдяпэ тэ пьел Давидо́скэ, и ёв пхэндя́: “Кон панякирэла ман пане́са Вифлеемоскирэ ґанынгатыр, со исын пашы́л по́рта?”

¹⁸ Тэды адалэ́ трин промардэпэ пирда́л Филимстимиякиро ста́но, и кэдынэ пхэрдэ́с пани́ Вифлеемоскирэ ґанынгатыр, со исын пашы́л по́рта, и лынэ́, и яндлэ́ Давидо́скэ. Нэ Дави́до на закамдя́ тэ пьел лэс и вычхудя́ лэс ваш Ра́скирэ-Дэвлэ́скири сла́ва,

¹⁹ и пхэндя́: “Зра́кх ман, Раё Дэ́вла, соб (кай) мэ тэ кэра́в дава́! Ци лава́ мэ тэ пья́в рат адалэнгирэ муршэнгирэ, савэ́ отдэнас пэ́скирэ дия́! Пал-дава́ со ёнэ рискиндэ пэ́скирэ джиибнаса, и ёнэ яндлэ́ пани́.” И на закамдя́ тэ пьел лэс. Ѓа́да, со кэрдэ́ трин адалэ́ муршканэ́ мануша́.

²⁰ И Аве́са, пшал Иоавоскиро, сыс шэрало́ тринэндыр; ёв домардя́ пэ́скирэ чхурдыибнытконэ бустяса триншэла́ манушэ́н, и сыс дрэ сла́ва одолэ́ тринэндэ.

²¹ Тринэндыр ёв сыс славутнэдыр и сыс барыдырэ́са; нэ одолэнца тринэнца ёв на ровниндяпэ.

²² О Ване́я, чхаво́ Иодаёскиро, муршканэ́-муршэскиро, баро́ пир рэ́нды, Кавцеилостыр. Ёв домардя́ дуе́н Армилоскирэ Моавитонскирэн чхавэ́н; ёв згия и замардя́ шчэрэс дро рово (хохой), дро ивитко часо.

²³ Ёв мулякирдя́ Египтянинос, манушэ́с барипнаса дрэ пандж куня́. Дрэ васт Египтяниноскиро сыс чхурдыибнытко буст, сыр навое ткачостэ (катвалэстэ); а ёв подги́я кэ ёв каштэса, и, выкусця чхурдыибнытко буст Египтяниноскирэ вастэ́стыр, и замардя́ лэс лэ́скирэ бустяса;

²⁴ Ѓа́да, со кэрдя́ Ванея, чхаво́ Иодаёскиро. И ёв сыс дрэ сла́ва одолэ́ тринэндэ муршканэндэ;

²⁵ ёв сыс славутнэдыр триндэшэндыр, нэ пэрвонэ́ тринэнца на ровниндяпэ. И Дави́до чхудя́ лэс ординарцоса, саво́ сполнинэлас лэ́скирэ припхэныбэна́.

²⁶ А шэралэ́ халадэндыр сыс: Асаило, пшал Иоавоскиро; Елханано, чхаво́ Додоскиро, Вифлеемостыр;

²⁷ Шама Гародитянино; Хере́цо Пелонитянино;

²⁸ Ира, чхаво́ Икешоскиро, Фекоитянино; Евиезе́ро Анафофянино;

²⁹ Сивхаё Хушатянино, Илаё Ахохиянино;

³⁰ Магараё Нетофатитянино; Хеле́до, чхаво́ Ваанаскиро, Хетофафянино;

³¹ Итаё, чхаво́ Рибаёскиро, Гиватыр Вениаминовоскирьятыр; Ване́я Пирафонянино;

³² Хураё Нагалё-Гаашостыр; Авие́ло Араватыр;

³³ Азмаве́фо Бахарумиянино; Елияхба Шаалбонянино.

³⁴ Чхавэ́ Гашемоскирэ Гизонитяниноскирэ сыс: Ионафа́но, чхаво́ Шаге́скиро, Гараритянино;

³⁵ Ахиамо, чхаво́ Сахароскиро, Гараритянино; Елифало, чхаво́ Уроскиро;

³⁶ Хефе́ро Махеростыр; Ахиа Пелонитянино;

³⁷ Хецроё Кармилитянино; Наараё, чхаво́ Езбаёскиро;

³⁸ Иоилё, пшал Нафаноскиро; Мивхаро, чхаво́ Гагриёскиро;

³⁹ Цэле́ко Амонитянино; Нахараё Берофянино, ману́ш, саво́ лыджалас марды́тко (оружыё) Иоавоскэ, чхавэ́скэ Саруяскирэскэ;

⁴⁰ Ира Ифриянино; Гаре́бо Ифриянино;

⁴¹ Урия Хетеянино; Завадо, чхаво́ Ахлаёскиро;

⁴² Адина, чхаво́ Шызаскиро, Рувимлянино, шэрало́ Рувимлянэнгиро, и лэ́стэ сыс дэшутрин;

⁴³ Ханано, чхаво́ Маахаскиро; Иосафа́то Мифниянино;

⁴⁴ Узия Аштерофянино; Шамо и Иеие́лё [Ехиэлё-ю.о.], чхавэ́ Хофамоскирэ Ароеряниноскирэ;

⁴⁵ Иедиаэло, чхаво́ Шимрияскиро, и Иоха, пшал лэ́скиро Фицыянино;

⁴⁶ Елие́лё Махавимостыр, и Иериваё и Иошавия, чхавэ́ Елнаамоскирэ, и Ифма Моавитянино;

⁴⁷ Елие́ло, Ове́до и Иасиелё Мецоваятыр.