1 Паралипоменоно 10 - Библия - Пэ Балтитко Романи чиб (Романэс) 2019

Сыр Мынэ́ Са́уло и Лэ́скирэ Чхавэ́

¹ Филистимля́ни мардэ́пэ Израилёса, и пиризорьякирэнас дро марибэ́н Филистимля́ни Израильтянэ́н, и пынэ́ домардэ́ пэ бэ́рга Гелвуа.

² И традынэпэ Филистимля́ни пал Саулостэ и лэ́скирэ чхавэ́ндэ, и домардэ́ Филистимля́ни Ионафанос, и Авинадавос, и Мелхисуёс, Саулоскирэн чхавэ́н.

³ Марибэ́н проти Саулостэ яця́ зоралэды́р, и карье́-дыибнаскирэ (стрелки) лукэндыр сы́гэс гинэ́ пэ лэ́стэ, адя́кэ со ёв сыс пхусадо андрэ лукэнца.

⁴ И пхэндя́ Са́уло пэ́скирэ манушэ́скэ, саво́ лыджалас марды́тко (оружыё): “Вылэ тыри́ курта́ла и пхусав пэ мэрибэн ла́са ман, соб (кай) тэ на явэ́н адалэ́ наобчхиндлэ, и тэ на здекинэнпэ пэ ма́ндэ.” Нэ ману́ш, саво́ лыджа́ла марды́тко, на дэ́лас ра́да; пал-дова́ со древа́н страхадыя. Тэды Са́уло лыя́ курта́ла и пыя́ пэ ла́тэ.

⁵ Лэ́скиро ману́ш, саво́ лыджалас марды́тко, дыкхця́, со Са́уло мыя́, и кокоро́ пыя́ пэ курта́ла, и мыя́.

⁶ И мыя́ Са́уло, и трин лэ́скирэ чхавэ́, и саро́ лэ́скиро кхэр кхэтанэ́ лэ́са мыя́.

⁷ Ке́ли дыкхнэ́ Израильтя́ни, савэ́ сыс пэ до́ло, со сарэ́ нашэ́на, и со Са́уло и лэ́скирэ чхавэ́ мынэ́, тэды мэкнэ́ пэ́скирэ фо́рья и рознашнэпэ; а Филистимля́ни явнэ́ и лынэ́ тэ дживэ́н дрэ лэ́ндэ.

⁸ Пэ яви́р дывэ́с явнэ́ Филистимля́ни тэ обкэдэн мулэн и латхнэ́ Саулос и лэ́скирэ чхавэ́н, мулэн пэ Гелвуяскири бэ́рга.

⁹ И розуридэ лэс, и злынэ лэ́стыр лэ́скиро шэро́ и лэ́скири марды́тко, и бичхадэ́ пир Филистимиякири пхув, соб (кай) дэн тэ джинэ́н пал дава́ анги́л лэ́нгирэ и́долы и анги́л манушэ́ндэ.

¹⁰ И чхудэ́ лэ́скиро марды́тко пэ мангипнытко штэ́то (капишча) пэ́скирэ дэвлорэнгиро, и лэ́скиро шэро́ чхудэ́ дро Дагоноскиро кхэр.

¹¹ И шундя́ саро́ Иависо Галаадоскиро саро́, со кэрдэ́ Филистимля́ни Саулоса.

¹² И ґаздынэ́пэ сарэ́ зоралэ́ мануша́, лынэ́ Саулоскиро тру́по и лэ́скирэ-чхавэ́нгирэ тру́пы, и яндлэ́ лэс дро Иависо, и гарадэ́ лэ́нгирэ кокалы́ тэл дэмбо дро Иависо, и постындлэ эфта́ дывэса́.

¹³ Адя́кэ мыя́ Са́уло пал пэ́скиро чорипэ́н, саво́ ёв кэрдя́ анги́л Растэ-Дэвлэ́стэ, пал дова́, со на ракхця́ Ра́скирэ-Дэвлэ́скиро лав и обрисия кэ човаханы пхучыбнаса,

¹⁴ а на пхуцяпэ Ра́стыр-Дэвлэ́стыр. Палдава́ Ёв и мулякирдя́ лэс, и пиридыя кралипэ́н Давидо́скэ, Есеёскирэ чхавэ́скэ.