1 Kralip 7 - Библия - Пэ Балтитко Романи чиб (Романэс) 2019

¹ И явнэ́ Кири́аф-Иаримоскирэ мануша́, и лынэ́ Ра́скирэ-Дэвлэ́скиро ковчэго, и яндлэ́ лэс дро Аминадаво́скиро кхэр, пэ бэ́рга, а Елизарос, лэ́скирэ чхавэ́с, высвэнцындлэ, соб (кай) ёв тэ ракхэ́л Ра́скирэ-Дэвлэ́скиро ковчэго.

² Долэ́ дывэсэ́стыр, сыр яця́пэ ковчэго дро Кири́аф-Иаримо, прогия́ бут часо, биш бэрш. И рисия́ саро́ Израилёскиро кхэр кэ Рай Дэвэ́л.

³ И пхэндя́ Самуи́ло сарэ́ Израилёскирэ кхэрэ́скэ, ракири́: “Ко́ли тумэ́ сарэ́ пэ́скирэ илэ́са рисёна кэ Рай Дэвэ́л, тэды отчхурдэн пэ́стыр явирэ-манушэ́нгирэ дэвлэн и Астартэн, и янэ́н тумаро́ ило́ кэ Рай Дэвэ́л, и Лэ́скэ Екхэ́скэ дынаринэ́н, и Ёв зракхэ́ла тумэн Филистимлянэнгирэ вастэ́стыр.

⁴ И вычхурдынэ Израилёскирэ чхавэ́ Ваалэн и Астартэн, и лынэ́ екхэ Ра́скэ-Дэвлэ́скэ тэ дынаринэ́н.

⁵ И пхэндя́ Самуи́ло: “Скэдэ́н сарэ́н Израильтянэ́н дро Маси́фа, и мэ помангавапэ пал тумэ́ндэ Ра́скэ-Дэвлэ́скэ.”

⁶ И скэдынэ́пэ дро Маси́фа, и пхэрэнас пани́, и чхувэ́нас анги́л Растэ-Дэвлэ́стэ, и постиндлэ дро дова́ дывэ́с, ракири́: “Кэрдя́м амэ анги́л Растэ-Дэвлэ́стэ грэ́хо.” И сэндиндя Самуи́ло Израилёскирэ чхавэ́н дро Маси́фа.

⁷ Ке́ли шундлэ́ Филистимля́ни, со скэдынэ́пэ Израилёскирэ чхавэ́ дрэ Маси́фа, тэды гинэ́ Филистимия́кирэ хулая́ пэ Израилё. Израильтя́ни шундлэ́ пал дова́, и страхандынэ Филистимлянэндыр.

⁸ И пхэндлэ́ Израилёскирэ чхавэ́ Самуилоскэ: “На пирияч тэ мангэспэ пал амэ́ндэ амарэскэ Ра́скэ-Дэвлэ́скэ, Дэвлэ́скэ, соб (кай) Ёв тэ зракхэ́л амэн Филистимлянэнгирэ вастэ́стыр.”

⁹ И лыя́ Самуи́ло екхэ бакрорэс цюцятыр, и яндя́ лэс дро цэ́ло схачкирибэ́н Ра́скэ-Дэвлэ́скэ, и мангдя́ зоралэ́с Самуи́ло Рас-Дэвлэ́с пал Израилё, и шундя́ лэс Рай Дэвэ́л.

¹⁰ И ке́ли Самуи́ло янэлас цэ́ло схачкирибэ́н, Филистимля́ни явнэ́ тэ марэ́нпэ Израилёса. Нэ Рай Дэвэ́л загрюкиндя дро дова́ дывэ́с зоралэ́ громоса пэ Филистимлянэндэ, и яндя́ дар пэ лэ́ндэ, и ёнэ сыс домардэ́ анги́л Израилё.

¹¹ И выгинэ́ Израильтя́ни Масифатыр, и традынэ Филистимлянэн, и домардэ́ лэн пэ штэ́то тэл Вефхоро.

¹² И лыя́ Самуи́ло екх бар, и чхудя́ машки́р Маси́фа и машки́р Сеномо, и кхардя́ лэс Авен-Езеро, пхэни́: “Пэ дава́ штэ́то дыя́ васт помогиндя амэ́нгэ Рай Дэвэ́л.”

¹³ Адя́кэ штылякирдэ сыс Филистимля́ни и на лынэ́ буты́р тэ псирэ́н пэ Израилёскирэ межакирэ рига́; и сыс Ра́скирэ-Дэвлэ́скиро васт пэ Филистимлянэндэ дрэ сарэ́ Самуилоскирэ дывэса́.

¹⁴ И рискирдэ́ сыс Израилёскэ фо́рья, савэ́ лынэ́ Филистимля́ни Израилёстыр, Акароностыр и кэ Гефа, и лэ́нгирэ рига́ кэрдя́ вольнонэнца Израилё Филистимлянэнгирэ вастэ́ндыр, и сыс рама́нё (миро) машки́р Израилё и Амореендэ.

¹⁵ И сыс Самуи́ло Израилёскэ сэндариса дро сарэ́ пэ́скирэ джиибна́скирэ дывэса́:

¹⁶ бэрш бэршэстыр ёв псирдя́ и обджалас Вефи́лё, и Галга́ло, и Маси́фа и сэндякирдя Израилё пэ сарэ́ далэ́ штэ́ты;

¹⁷ тэ́ньчи (потом) рисия́ дро Ра́ма; пал-дова́ со одо́й сыс лэ́скиро кхэр, и одо́й сэндиндя ёв Израилё, и чхудя́ одо́й Ра́скэ-Дэвлэ́скэ алта́рё.