1 Kralip 5 - Библия - Пэ Балтитко Романи чиб (Романэс) 2019

¹ Филистимля́ни лынэ́ Дэвлэ́скиро ковчэго и яндлэ́ лэс Авен Езеростыр дро Азото.

² И лынэ́ Филистимля́ни Дэвлэ́скиро ковчэго, залыджинэ лэс дро Дагоноскиро мангипнытко кхэр, и чхудэ́ лэс пашы́л Дагоно.

³ И уштынэ́ Азотяни пэ яви́р дывэ́с тася́рлэс (ра́нэс), и ґа́да, Дагоно сыс пашто́ пэ́скирэ мо́са кэ пхув анги́л Ра́скирэ-Дэвлэ́скиро ковчэго. И лынэ́ ёнэ Дагоно, и нэвэ́стыр чхудэ́ лэс пэ пэ́скиро штэ́то.

⁴ И уштынэ́ ёнэ тася́рлэс пэ зло́ко пэ яви́р дывэ́с, и ґа́да, Дагоно сыс пашто́ мо́са пэ пхув анги́л Дэвлэ́скиро ковчэго; шэро́ Дагоноскиро и дуй лэ́скирэ васта́ сыс паштэ́ отчингирдэ, кажно (сва́ко) розмардэс, пэ прого, яця́пэ екх Дагоноскиро шталто (торсо).

⁵ Палдава́ Дагоноскирэ жрецы и сарэ́, савэ́ явэ́нас дро Дагоноскиро мангипнытко кхэр дро Азото, на тэрдёна пэ Дагоноскиро прого кэ дава́ дывэ́с.

⁶ И обмэкцяпэ Ра́скирэ-Дэвлэ́скиро васт пэ Азотянэндэ, и Ёв домардя́ лэн, и чхудя́ ка́ра пэ лэ́ндэ дукханэ ґэраса, дро Азото и пашы́л лэ́стэ.

⁷ И дыкхнэ́ дава́ Азотяни, и пхэндлэ́: “Мэк тэ на ячэ́лпэ Израилёскирэ-Дэвлэ́скиро ковчэго амэ́ндэ, пал-дова́ со пхаро́ исын Лэ́скиро васт и ваш амэ́нгэ, и ваш Дагоно, амарэ́ дэвлэскэ.”

⁸ И бичхадэ́, и скэдынэ́ кэ пэ сарэ́н Филимиякирэ хулан, и пхэндлэ́: “Со амэ́нгэ тэ кэра́с Израилёскирэ-Дэвлэ́скирэ ковчэгоса?” И пхэндлэ́: “Мэк Израилёскирэ Дэвлэ́скиро ковчэго тэ пириджал дро Гефо.” И отбичхадэ Израилёскиро Дэвлэ́скиро ковчэго дро Гефо.

⁹ Пало́ (после) дова́ сыр отбичхадэ лэс, то, сыс Ра́скирэ-Дэвлэ́скиро васт пэ фо́ро и дар сыс древа́н бари, и домардя́ Рай Дэвэ́л форо́скирэ манушэ́н тыкнэстыр кэ баро́, и сыкадыя́ пэ лэ́ндэ ґэр (наросто).

¹⁰ И отбичхадэ ёнэ Дэвлэ́скиро ковчэго дро Аскалоно; и, ке́ли явдя́ Дэвлэ́скиро ковчэго дро Аскалоно, то лынэ́ тэ дэн го́дла Аскалонитяни, ракири́: “Яндлэ́ кэ амэ Израилёскирэ Дэвлэ́скиро ковчэго, соб (кай) тэ мулякирэс амэн и амарэ́ манушэ́н.”

¹¹ И бичхадэ́, и скэдынэ́ сарэ́н Филистимия́кирэ хулан, и пхэндлэ́: “Отбичхавэн Израилёскирэ Дэвлэ́скиро ковчэго; мэк ёв тэ рисёл пэ пэ́скиро штэ́то, соб (кай) тэ на мулякирэ́л ёв амэн и амарэ́ манушэ́н”; пал-дова́ со мулаканы дар сыс дро саро́ фо́ро; древа́н пхаро́ сыс Дэвлэ́скиро васт пэ лэ́ндэ.

¹² И одолэ́, савэ́ на мынэ́, сыс домардэ́ ґэраса адя́кэ, со го́дла форо́скири догия́ кэ болыбэ́н.