1 Kralip 4 - Библия - Пэ Балтитко Романи чиб (Романэс) 2019

¹ И сыс Самуилоскиро лав кэ саро́ Израилё. И выгинэ́ Израильтя́ни проти Филистимлянэндэ пэ марибэ́н, и тэрдинэ́ стано́са (лодэса) пашы́л Авен-Езеро, а Филистимля́ни тэрдинэ́ пашы́л Афека.

² И тэрдинэ́ Филистимля́ни проти Израильтянэндэ, и выгия́ марибэ́н, и домардэ́ Филистимля́ни Израильтянэ́н, савэ́н домардэ́ пэ фэ́лда, кай мардэ́пэ, пашы́л штар тысёнцы манушэ́н.

³ И явнэ́ мануша́ дро ста́но (лод), и пхэндлэ́ Израилёскирэ пхурыдыра́: “Пал со домардя́ амэн Рай Дэвэ́л ададывэ́с анги́л Филистимлянэндэ? Ла́са пэ́скэ Силомостыр ковчэго Ра́скирэ-Дэвлэ́скирэ заветоса, и ёв джа́ла машки́р амэ́ндэ, и зракхэ́ла амэн вастэ́стыр амарэ́ вэргэ́нгирэ (врогэнгирэ).”

⁴ И бичхадэ́ мануша́ дро Сило́мо, и яндлэ́ одотхы́р Ра́скирэ-Дэвлэ́скиро янголэ́нгирэ-болыбна́скирэ ковчэго заветоса, саво́ сыс бэшто́ пэ херувимы; а пашы́л Ра́скирэ-Дэвлэ́скирэ завето́скиро ковчэго сыс и дуй Илиёскирэ чхавэ́, Офни и Финеесо.

⁵ И ке́ли явдя́ Ра́скирэ-Дэвлэ́скирэ завето́скиро ковчэго дро ста́но, саро́ Израилё ґаздыя́ дасави́ зоралы́ го́дла, со пхув дыя́ ґондя́ (стониндя).

⁶ И шундлэ́ Филистимля́ни го́дла радымакири, и пхэндлэ́: “Со́стыр дасавэ́ бари го́дла радымакири дро Юдэ́нгиро ста́но?” И уджиндлэ́, со Ра́скирэ-Дэвлэ́скиро ковчэго явдя́ дро ста́но.

⁷ И страха́дынэ Филистимля́ни, пал-дова́ со пхэндлэ́: “Одова́ Дэвэ́л явдя́ кэ ёнэ дро ста́но.” И пхэндлэ́: “Бида амэ́нгэ! Палдава́ со на сыс дасаво ни тася́, ни пэ три́то дывэ́с;

⁸ би́да амэ́нгэ! Кон зракхэ́ла амэн далэ́ зоралэ́ Дэвлэ́скирэ вастэ́стыр? Ада одова́ Рай Дэвэ́л, Саво́ домардя́ Египтянэн разнонэ (сваконэ) дукхэнца пэ чхучи́ пхув;

⁹ зоралён и явэ́н муршканэ́ (смяла), Филистимля́ни, соб (кай) тумэ́нгэ тэ на явэ́н дро дынарибэ́н Юдэ́нгэ, сыр ёнэ исын тумэ́ндэ дро дынарибэ́н; явэ́н муршканэ́ и марэ́нпэ лэ́нца.”

¹⁰ И мардэ́пэ Филистимля́ни, и домардэ́ сыс Израильтя́ни, и кажно (сва́ко) настя́ дро пэ́скири ша́тра, и сыс марибэ́н древа́н баро́, и пынэ́ Израильтянэ́н трия́нда тысёнцы манушэ́н, савэ́ сыс пэзал.

¹¹ И Дэвлэ́скиро ковчэго сыс залыно, и дуй Илиёскирэ чхавэ́, Офни и Финеесо, мынэ́.

¹² И настя́ екх Вениамитянино марибнаскирэ штэто́стыр, и явдя́ дро Сило́мо, дро дова́-паць дывэ́с; и́дя пэ лэ́стэ сыс розкушны и пра́хо пэ лэ́скиро шэро́.

¹³ Ке́ли явдя́ ёв, о Илиё сыс бэшто́ пэ штэ́то анги́л дром пашы́л вудара́ и дыкхця́, пал-дова́ со лэ́скиро ило́ тринскирдяпэ пал Дэвлэ́скиро ковчэго (мохто́). И ке́ли одова́ ману́ш явдя́ и пхэндя́ сарэ́нгэ дро фо́ро, тэды зоралэ́с дыя́ ґондя́ (уздыхниндя) саро́ фо́ро.

¹⁴ И шундя́ Илиё го́дла, и пхэндя́: “Со́стыр дасави́ го́дла?” И доя́-паць шту́нда подги́я одова́ ману́ш, и пирипхэндя Илиёскэ.

¹⁵ Тэды Илиёскэ сыс енядэша охто́ бэрш; и лэ́скирэ якха́ пириячнэ тэ дыкхэ́н, и ёв на могиндя́ тэ дыкхэ́л.

¹⁶ И пхэндя́ одова́ ману́ш Илиёскэ: “Мэ явдём станостыр, ададывэ́с мэ настём марибнаскирэ штэто́стыр.” И пхэндя́ Илиё: “Со кэрдя́пэ, ми́ро чха́ва?”

¹⁷ И отпхэндя́ ману́ш, саво́ яндя́ зан (звесь), и пхэндя́: “Нашэлас Израилё анги́л Филистимлянэндэ, и марибэ́н баро́ выгия́ дро манушэ́ндэ, и дуй чхавэ́ тырэ́, Офни и Финеесо, мынэ́, и Дэвлэ́скиро ковчэго лыно́.

¹⁸ Ке́ли ёв пририпирдя пал Дэвлэ́скиро ковчэго, то Илиё пыя́ штэто́стыр, пэ саво́ сыс бэшто́ пэ думо пашы́л вудара́, пхагирдя́ пэ́скэ думало кокало и мыя́; пал-дова́ со ёв яця́ пхуро́ и пхаро́. И сыс ёв Израилёскэ сэндариса штардэша́ бэрш.

¹⁹ Лэ́скири бори, Фенеесоскири ромны́, сыс пхари́ анги́л бияныпэ́н. И ке́ли шундя́ зан (звесь) пал Дэвлэ́скиро ковчэгоскиро лыибэн и пал пэ́скирэ састрэскиро мэрибэ́н и пэ́скирэ ромэскиро, то тэды пыя́ пэ чанг и бияндя́, пал-дова́ со подгинэ́ кэ ёй ла́кирэ дукха́.

²⁰ И ке́ли мэрэлас ёй, джувля́, савэ́ сыс тэрдэ́ пашы́л ла́тэ, ракирдэ́ ла́кэ: “На дар, ту бияндян чхавэ́с.” Нэ ёй на отпхэндя́ и на рискирдя́ якха́.

²¹ И кхардя́ тыкнэмасэс: Ихаводо, пхэни́: “Отгия́ сла́ва Израилёстыр” Дэвлэ́скирэ ковчэгоскирэ лыибнаса и ла́кирэ састрэскирэ мэрибнаса и ла́кирэ ромэскирэса.

²² Ёй пхэндя́: “Отгия́ Израилёстыр сла́ва, пал-дова́ со лыно́ Дэвлэ́скиро ковчэго.”