1 Kralip 3 - Библия - Пэ Балтитко Романи чиб (Романэс) 2019

¹ Тэрно́ ману́ш Самуи́ло дынариндя́ Ра́скэ-Дэвлэ́скэ анги́л Илиёстэ; Дэвлэ́скиро лав сыс на часто дро долэ́ дывэса́, дыкхибэ́н сыс на часто.

² И сыс дро дова́ часо (цы́ро), ке́ли Илиё сыс пашто́ пэ пэ́скиро штэ́то, лэ́скирэ якха́ лынэ́ тэ зачхакирэнпэ, и ёв на могиндя́ тэ дыкхэ́л,

³ и Ра́скирэ-Дэвлэ́скиро момолы́тко (свети́льнико) ишчо (инкэ́) на мурдия, и Самуи́ло сыс пашто́ дрэ Ра́скирэ-Дэвлэ́скири Кхангири́, кай сыс Ра́скирэ-Дэвлэ́скиро ковчэго;

⁴ И кхардя́ Рай Дэвэ́л Самуилос, и ёв отпхэндя́: “Ѓа́да, мэ сом!”

⁵ И ёв праста́ндыя кэ Илиё, и пхэндя́: “Ѓа́да, мэ! Ту кхардян ман.” Нэ одова́ пхэндя́: “Мэ на кхардём тут, джа́ палэ, пасёв.” И ёв гия́ и пасия́.

⁶ Нэ Рай Дэвэ́л дро яви́р мо́ло кхардя́ Самуилос. Ёв уштыя́, и явдя́ кэ Илиё яви́р мо́ло, и пхэндя́: “Ѓа́да, мэ сом!” Нэ одова́ пхэндя́: “Мэ на кхардём тут, миро чхаво́; джа́ палэ, пасёв.”

⁷ О Самуи́ло тэды на джиндя́ Ра́скирэ-Дэвлэ́скири зан (глос), и ишчо (инкэ́) на отчхакирэласпэ лэ́скэ Ра́скирэ-Дэвлэ́скиро лав.

⁸ И кхардя́ Рай Дэвэ́л Самуилос дро три́то мо́ло. Ёв уштыя́, и явдя́ кэ Илиё, и пхэндя́: “Ѓа́да, мэ! Ту кхардян ман. Тэды ґалыя́ Илиё, со Рай Дэвэ́л кхарэ́ла тэрнэ́-бэршэнгирэс (тэрнэ́ манушэ́с).

⁹ И пхэндя́ Илиё Самуилоскэ: “Джа́ палэ и пасёв, и, ке́ли кон кхарэ́ла тут, ту пхэн: ‘Ра́кир, Раё Дэ́вла, пал-дова́ со шунэ́ла Тыро́ писха́ри.’” И гия́ Самуи́ло, и пасия́ пэ пэ́скиро штэ́то.

¹⁰ И явдя́ Рай Дэвэ́л, и тэрдия́, и кхардя́, сыр дро дова́ и яви́р мо́ло: “Самуиле, Самуилэ!” И пхэндя́ Самуи́ло: “Ра́кир, Раё Дэ́вла, пал-дова́ со шунэ́ла Тыро́ писха́ри.”

¹¹ И пхэндя́ Рай Дэвэ́л Самуилоскэ: “Ѓа́да, Мэ кэра́ва рэ́ндо дро Израилё, пал саво́, ко́ли вари-кон шунэ́ла, одолэ́стэ кудунякирэла (звенинэла) дрэ дуй кана́;

¹² дро дова́ дывэ́с Мэ кэра́ва пэ Илиёстэ саро́ дова́, со Мэ ракирдём пал лэ́скиро кхэр; Мэ ла́ва и кэра́ва;

¹³ Мэ дыём тэ джинэ́л лэ́скэ, со Мэ чхува́ва ка́ра пэ лэ́скиро кхэр пэ ве́ки пал доя́ банг, со ёв джиндя́, сыр лэ́скирэ чхавэ́ кэрэ́нас фуес, и ёв на обрикирдя лэн;

¹⁴ и палдава́ совлахава Илиёскирэ кхэрэ́скэ, со Илияскирэ-кхэрэ́скири банг на злэлапэ ни свэнтонэ́ яныбнаса Ра́скэ-Дэвлэ́скэ, ни марунэ яныбнаса дро ве́ко.”

¹⁵ И сутя Самуи́ло кэ зло́ко, и отчхакирдя́ Ра́скирэ-Дэвлэ́скирэ Кхэрэскирэ вудара́; и Самуи́ло дардяпэ (дарандыя) тэ дэл тэ джинэ́л дава́ дыкхибэ́н Илиёскэ.

¹⁶ Нэ Илиё кхардя́ Самуилос и пхэндя́: “Миро чхава, Самуиле!” Одова́ пхэндя́: “Ѓа́да, мэ сом!”

¹⁷ И пхэндя́ Илиё: “Со сыс пхэндло́ ту́кэ? На гарав ма́ндыр; дова́ и дова́ кэрэ́ла ту́са Рай Дэвэ́л, и ишчо (инкэ́) буты́р кэрэ́ла, ко́ли ту гаравэса ма́ндыр вари-со сарэ́стыр долэ́стыр, со сыс пхэндло́ ту́кэ.”

¹⁸ И дыя́ тэ джинэ́л лэ́скэ Самуи́ло саро́, и на гарадя лэ́стыр ничы́. Тэды пхэндя́ Илиё: “Ёв, Рай Дэвэ́л; со Лэ́скэ трэй, дова́ мэк тэ кэрэ́л.”

¹⁹ И выбария Самуи́ло, и Рай Дэвэ́л сыс лэ́са; и на яця́пэ ние́кх лэ́скирэ лавэ́ндыр, саво́ на кэрдя́пэ дро чачипэ́н.

²⁰ И уджиндя́ саро́ Израилё Даностыр кэ Вирсава, со Самуи́ло сыс чхудо тэ явэ́л Ра́скирэ-Дэвлэ́скирэ пророкоса.

²¹ И пало́ (после) дова́ Рай Дэвэ́л дурэды́р явэ́лас дро Сило́мо, сыр отчхакирдя́ [сыкадыя́-ю.о.] Самуилоскэ Пэс дро Сило́мо пирда́л Ра́скирэ-Дэвлэ́скиро лав.