1 Kralip 27 - Библия - Пэ Балтитко Романи чиб (Романэс) 2019

¹ И пхэндя́ Дави́до дро пэ́скиро ило́: “Мэ пэрава вари-ке́ли дрэ васта́ Сауло́скэ, и нанэ ваш ма́нгэ ничы́ фэды́р, сыр тэ нашав пэ Филистимиякири пхув; и отячэла ма́ндыр Са́уло, и на явэ́ла тэ родэ́л ман буты́р пир сарэ́ Израилёскирэ рига́, и мэ зракхавапэ лэ́скирэ вастэ́стыр.”

² И уштыя́ Дави́до, и гия́ кокоро́ и шовшэла́ мурша́, савэ́ сыс лэ́са, кэ Анхусо, Маохоскиро чхаво́, Гефакиро кра́ли.

³ И дживдя́ Дави́до Анхусостэ дро Гефа, кокоро́ и лэ́скирэ мануша́, сва́ко (кажно) пэ́скирэ сэм΄яса (ирьяса), Дави́до и лэ́скирэ дуй ромня́ Ахиноама Израильтянка и Авигея, сави́ сыс Навалоскири ромны́, Кармилитянка.

⁴ И долыджинэ Сауло́скэ, со Дави́до настя́ дро Гефа, и на лыя́ ёв буты́р тэ родэ́л лэс.

⁵ И пхэндя́ Дави́до Анхусоскэ: “Ко́ли мэ латхём ла́ска дро тырэ́ якха́, то тэды мэк дыно́ явэ́ла ма́нгэ штэ́то дро екх тыкнэ́ форье́ндыр, и мэ ява́ва тэ джива́в одо́й; ваш со тырэ́ писхари́скэ тэ дживэ́л дро крали́скиро фо́ро, кхэтанэ́ ту́са?”

⁶ Тэды дыя́ лэ́скэ Анхусо Секелаго, палдава́ Секелаго и яця́пэ пал Юдэя́кирэ кралье́ндэ кэ дава́ часо.

⁷ Саро́ часо, саво́ дживдя́ Дави́до пэ Филистимиякири риг, сыс бэрш и штар чхона́.

⁸ И выгия́ Дави́до пэ́скирэ манушэ́нца, и пыя́ пэ Гесурянэндэ, и Гирзеянэндэ, и Амаликитянэндэ, савэ́ ґара́ дживдэ́ пэ дая́ риг кэ Сура и адя́кэ-паць и кэ Египто́скири пхув.

⁹ И чхучакирдя Дави́до доя́ риг, и на ячкирдя́ джидэн ни муршэ́н, ни джувле́н, и закэдыя бакрэ́н и гурувэ́н, и ослэн, и верблюдэн, и и́дя; и рисия́, и явэ́лас кэ Анхусо.

¹⁰ И пхэндя́ Анхусо Давидо́скэ: “Пэ конэ́стэ пынэ́ какана́?” Дави́до пхэндя́: “Пэ паш-дывэсы́тко (полудённо) Юдэякири риг, и пэ полудённо Ерахмеелоскири риг, и пэ полудённо Кенеякири риг.

¹¹ И на ячкирдя́ Дави́до джидэн ни муршэ́н, ни джувле́н, и на яндя́ дро Ге́фа, ракири́: “Ёнэ могинэ́на тэ долыджан пэ амэ́ндэ и тэ пхэнэ́н: ‘Адя́кэ кэрдя́ Дави́до, и дасаво о́бразо ваш лэ́скирэ рэ́нды дро саро́ часо дро Филистимиякири риг сыр ёв сыс.”

¹² И допатяндыя Анхусо Давидо́скэ, ракири́: “Ёв яця́ джунгало́ пэ́скирэ Израилёскирэ манушэ́нгэ и явэ́ла мирэ́ писхариса пэ ве́ко.”