1 Kralip 24 - Библия - Пэ Балтитко Романи чиб (Романэс) 2019

¹ И выгия́ Дави́до одотхы́р, и дживдя́ дро бидаракирэ штэ́ты Эн-Гади [Энгеди-ю.о.].

² Ке́ли Са́уло рисия́ Филистимлянэндыр, лэ́скэ пхукавэнас, ракири́: “Ѓа́да, Дави́до исын пэ чхучи́ пхув Эн-Гади.”

³ И лыя́ Са́уло трин тысёнцы фэдыршонэ муршэ́н сарэ́ Израилёстыр, и гия́ тэ родэ́л Давидо́с и лэ́скирэ манушэ́н пир бэ́рги, кай дживэ́нас серны.

⁴ И явдя́ кэ бакрано затрадыпэн (гражо), пашы́л дром; одо́й сыс ґеба́р (пешчэра) и загия́ одори́к Са́уло ваш трэ́бима; Дави́до и лэ́скирэ мануша́ сыс бэштэ́ дро хорипэ́н ґебаракиро.

⁵ И ракирдэ́ Давидо́скэ лэ́скирэ мануша́: “Ѓа́да, исын дывэ́с, пал саво́ ракирдя́ ту́кэ Рай Дэвэ́л: ‘Ѓа́да, Мэ отда́ва тырэ́ вэргос дро тырэ́ васта́, и кэрэ́са лэ́са, со ту́кэ исын лачхо́.’” Дави́до уштыя́ и штылинькэс отчхиндя яго́ро (краё) упратунэ Сауло́скирэ идятыр.

⁶ Нэ пало́ дава́ саро́ яця́ дукхано Давидо́скирэ илэскэ, со ёв отчхиндя яго́ро Са́уло скирэ идятыр.

⁷ И пхэндя́ ёв пэ́скирэ манушэ́нгэ: “Мэк тэ на домэкэл ман Рай Дэвэ́л тэ кэра́в дава́ хула́скэ мирэ́скэ, Ра́скирэ-Дэвлэ́скирэ помакхибнарискэ, соб (кай) тэ чхував васт миро пэ лэ́стэ, пал-дова́ со ёв исын Ра́скирэ-Дэвлэ́скиро помакхибнаскиро.”

⁸ И урикирдя Дави́до пэ́скирэ манушэ́н далэ́ лавэ́нца, и на дыя́ лэ́нгэ тэ ґаздэ́нпэ пэ Саулостэ. А Са́уло уштыя́ и выгия́ ґебаратыр (пешчэратыр) пэ дром.

⁹ Пало́ дова́ (после) уштыя́ и Дави́до, и выгия́ ґебаратыр, и задыя го́дла пала́л Сауло́скэ, ракири́: “Хула́ё миро, кра́ли!” Са́уло подыкхця́ палэ, и Дави́до пыя́ мо́са пэ пхув и дыя́ паты́в лэ́скэ.

¹⁰ И пхэндя́ Дави́до Сауло́скэ: “Со́скэ ту шунэса манушэ́нгирэ ракирибэна, савэ́ ракирэ́на: ‘Ѓа́да, Дави́до скэдэ́ла холы́ пэ ту́тэ?’

¹¹ Ѓа́да, ададывэ́с дыкхэ́на тырэ́ якха́, со Рай Дэвэ́л отдыя́ тут какана́ дро мирэ́ васта́ дро ґеба́р; и ма́нгэ ракирдэ́, соб мэ тэ замарав тут, нэ мэ потангиндём (пожалиндём) тут, и пхэндём: ‘На ґазда́ва миро васт пэ мирэ́ хуластэ, пал-дова́ со ёв исын Ра́скирэ-Дэвлэ́скиро помакхибнаскиро.’

¹² Миро да́до! Подыкх пэ яго́ро тырэ́ идякиро дрэ миро васт; мэ отчхиндём яго́ро тырэ́ идятыр, а тут на замардём: уджин и пропатякир, со нанэ дро миро васт холы́, ни хохаибэ́н, и мэ на кэрдём грэ́хо проти ту́тэ; а ту родэса миро ди (джиибэ́н), соб тэ отлэс лэс.

¹³ Мэк тэ россэндякирэл Рай Дэвэ́л машки́р ма́ндэ и ту́тэ, и мэк тэ отхал палэ (отомстинэл) ту́кэ Рай Дэвэ́л пал ма́ндэ; нэ васт миро на явэ́ла пэ ту́тэ,

¹⁴ сыр ракирэ́ла пхураны притча: ‘Фуипнастыр джа́ла фуипэ́н.’ А миро васт на явэ́ла пэ ту́тэ.

¹⁵ Проти конэ́стэ выгия́ Израилёскиро кра́ли? Пал конэ́стэ ту традэсапэ? Пал мулэ́ джуклэстэ, пал екхэ пушуматэ.

¹⁶ Мэк тэ явэ́л Рай Дэвэ́л сэндариса, и мэк тэ россэндякирэл машки́р ма́ндэ и ту́тэ. Ёв роздыкхэла, роскэдэла миро рэ́ндо и зракхэ́ла ман тырэ́ вастэ́стыр.”

¹⁷ Ке́ли мэкця́ Дави́до тэ ракирэ́л далэ́ лава́ кэ Са́уло, Са́уло пхэндя́: “Ци тыри́ дая́ исын зан (глос), чхаво́ миро, Дави́до? И ґаздыя́ Са́уло пэ́скири зан, и рондя́,

¹⁸ и пхэндя́ Давидо́скэ: “Ту сан чачуныдыр ма́ндыр, пал-дова́ со ту отдыян ма́нгэ лачхипна́са, а мэ кэрдём ту́кэ чорипэ́н;

¹⁹ ту сыкадян дава́ ададывэ́с, обгиянпэ ма́нца тангипнаса, кеды Рай Дэвэ́л отдыя́ ман дро тырэ́ васта́, ту на замардян ман.

²⁰ Кон, латхи пэ́скирэ вэргос (врогос), отмэкия бы лэс дро лачхо́ дром? Дэвэ́л отдэ́ла ту́кэ пал дава́ лачхипна́са, со ту кэрдя́н ма́нгэ ададывэ́с.

²¹ И какана́ мэ джино́м, со ту ўсаекх явэ́са тэ кралинэс, и Израилёскиро кралипэ́н явэ́ла твардо дро тыро́ васт.

²² И адя́кэ совлаха́ ма́нгэ Ра́са-Дэвлэ́са, со ту на вымарэса миро ро́до пало́ ма́ндэ и на хасякирэса миро лав дро мирэ́-дадэ́скиро кхэр.”

²³ И совлахадя́ Дави́до Сауло́скэ. И гия́ Са́уло дро пэ́скиро кхэр, Дави́до и лэ́скирэ мануша́ загинэ́ пэ штэ́то зорало́ тыноса.