1 Kralip 12 - Библия - Пэ Балтитко Романи чиб (Романэс) 2019

¹ И пхэндя́ Самуи́ло сарэ́ Израилёскэ: “Ѓа́да, и мэ кандыём тумари́ зан (глос) дро саро́, со тумэ́ ракирдэ́ ма́нгэ, и чхудём пэ тумэ́ндэ крали́с,

² и ґа́да, кра́ли псирэ́ла анги́л тумэ́ндэ; а мэ пхуриём и ссывиндём; и мирэ́ чхавэ́ исын тумэ́нца; мэ псирдём анги́л тумэ́ндэ мирэ́ тэрныпнастыр и кэ/жы́ко кэ дава́ дывэ́с;

³ ґа́да, мэ сом, мэк тэ допхэнэн пэ ма́ндэ анги́л Растэ-Дэвлэ́стэ и анги́л Лэ́скирэ помакхибнаскирэстэ, ци конэ́стыр мэ лыём гурувэ́с, ци конэ́стыр лыём мэ осло́с, конэ́с дукхадём и конэ́с притасадём, ци конэ́стыр лыём мэ мыто (взятка) и зачхакирдём дро лэ́скиро рэ́ндо якха́ мирэ́, и мэ рискира́ва тумэ́нгэ.”

⁴ И отпхэндлэ́: “Ту на дукхадян (на збидиндян) амэн и на притасадян амэн, и ничы́ ни конэ́стэ на лыян.”

⁵ И пхэндя́ ёв лэ́нгэ: “Якхи́тко пэ тумэ́ндэ исын Рай Дэвэ́л, и якхи́тко Лэ́скиро помакхибнаскиро дро дава́ дывэ́с, со тумэ́ на латхнэ́ ничы́ пал ма́ндэ.” И пхэндлэ́: “Якхи́тка исын.”

⁶ Тэды Самуи́ло пхэндя́ манушэ́нгэ: “Якхи́тко тэ явэ́л Рай Дэвэ́л, Саво́ чхудя́ Мойза́с и Аароно́с и, Саво́ вылыджыя тумарэ́ дадэн Египто́скирэ пхувья́тыр.

⁷ Какана́ тэрдён, и мэ ява́ва тэ сэндякиравпэ тумэ́нца анги́л Растэ-Дэвлэ́стэ пал сарэ́ миштыпэна, савэ́ Ёв кэрдя́ тумэ́нгэ и тумарэ́ дадэ́нгэ.

⁸ Ке́ли явдя́ Яково дро Еги́пто, и дада́ тумарэ́ задынэ го́дла кэ Рай Дэвэ́л, тэды Рай Дэвэ́л бичхадя́ Мойза́с и Аароно́с, и ёнэ вылыджинэ́ тумарэ́ дадэн Египто́стыр и чхудэ́ лэн тэ бэшэ́н пэ дава́ штэ́то.

⁹ Нэ ёнэ бистырдэ пэ́скирэ Рас-Дэвлэ́с, Дэвлэ́с, и Ёв отдыя́ лэн дро Асороскирэ-халадэ́нгирэ барыдырэскирэ Сисараскирэ васта́, и дро Моавитоскирэ-крали́скирэ васта́, савэ́ мардэ́пэ (гинэ́ марибна́са) проти лэ́ндэ.

¹⁰ Нэ ке́ли ёнэ задынэ го́дла кэ Рай Дэвэ́л и пхэндлэ́: “Амэ кэрдя́м грэ́хо, пал-дова́ со амэ ячкирдям Рас-Дэвлэ́с и лыям тэ дынарина́с Ваалэнгэ и Астартэнгэ, какана́ зра́кх амэн амарэ́ вэргэ́нгирэ вастэ́стыр, и амэ ява́са тэ дынарина́с Ту́кэ”,

¹¹ тэды Рай Дэвэ́л бичхадя́ Иероваалос, и Варакос, и Иефаяс, и Самуилос, и зракхця́ тумэн тумарэ́ вэргэ́нгирэ вастэ́стыр, саво́ сыс пашы́л тумэ́ндэ, и тумэ́ дживдэ́ бидаракиро.

¹² Нэ дыкхи́, со Наасо, Амонитянэнгиро кра́ли, джа́ла проти тумэ́ндэ, тумэ́ пхэндлэ́ ма́нгэ: “Над, мэк кра́ли тэ кралинэ́л пэ амэ́ндэ”, тэды, сыр тумаро́ Рай Дэвэ́л, Дэвэ́л тумаро́ кра́ли.

¹³ И адя́кэ, акэ исын кра́ли, савэ́с тумэ́ выкэдынэ́, савэ́с тумэ́ трэбиндлэ: ґа́да, Рай Дэвэ́л чхудя́ пэ тумэ́ндэ крали́с.

¹⁴ Ко́ли явэ́на тэ дарэ́н Ра́стыр-Дэвлэ́стыр, и тэ дынаринэ́н Лэ́скэ, и тэ шунэ́н Лэ́скири зан, и на лэ́на тэ джа́н проти Ра́скирэ-Дэвлэ́скиро упхэныбэ́н, тэды явэ́на и тумэ́ и тумаро́ кра́ли, саво́ исын кра́ли пэ тумэ́ндэ, тэ псирэ́н пала́л пал Растэ-Дэвлэ́стэ, тумарэ́ Дэвлэ́стэ,

¹⁵ а ко́ли на явэ́на тэ шунэ́н Ра́скирэ-Дэвлэ́скири зан и джа́на проти Ра́скирэ-Дэвлэ́скирэ упхэныбэна́, тэды Ра́скирэ-Дэвлэ́скиро васт явэ́ла проти тумэ́ндэ, сыр сыс проти тумарэ́ дадэндэ.

¹⁶ Какана́ тэрдён и подыкхэн пэ баро́ рэ́ндо, саво́ кэрэ́ла Рай Дэвэ́л анги́л тумарэ́ якха́:

¹⁷ ци на укэдыибэн какана́ дро парно́ гив (пшэница)? Нэ мэ рисиём кэ Рай Дэвэ́л, и Ёв бичхавэ́ла громо и брышы́нд, и тумэ́ уджинэна и дыкхэ́на, сыр баро́ грэ́хо, саво́ тумэ́ кэрдэ́ анги́л Ра́скирэ-Дэвлэ́скирэ якха́, манги пэ́скэ крали́с.”

¹⁸ И рисия́ тэ кхарэл Самуи́ло кэ Рай Дэвэ́л и Рай Дэвэ́л бичхадя́ громо и брышы́нд дро дова́ дывэ́с; и явнэ́ сарэ́ мануша́ дро бари дар Ра́стыр-Дэвлэ́стыр и Самуилостыр.

¹⁹ И пхэндлэ́ сарэ́ мануша́ Самуилоскэ: “Помангпэ пал тырэ́ писхарьендэ анги́л Растэ-Дэвлэ́стэ, тырэ́ Дэвлэ́стэ, соб (кай) тэ на мэрас амэ́нгэ, пал-дова́ со кэ сарэ́ амарэ́ грэ́хи амэ чхудям ишчо (инкэ́) грэ́хо, ке́ли мангдям пэ́скэ крали́с.”

²⁰ И отпхэндя́ Самуи́ло манушэ́нгэ: “На дарэ́н, грэ́хо дава́ кэрдэ́ тумэ́, нэ тумэ́ екх со на отджан Ра́стыр-Дэвлэ́стыр и дынаринэ́н Ра́скэ-Дэвлэ́скэ сарэ́ тумарэ́ илэ́са

²¹ и на джа́н пала́л бибахталэ́ дэвлорэндэ, савэ́ на янэ́на лачхипэ́н и на зракхэна; пал дова́ со ёнэ – дылныпэ́н.

²² Рай Дэвэ́л на ячкирэ́ла Пэ́скирэ манушэ́н ваш баро́ Пэ́скиро лав, пал-дова́ со Ра́скэ-Дэвлэ́скэ сыс лачхо́ тэ выкэдэс тумэн Пэ́скирэ манушэ́нца;

²³ и мэ адя́кэ-паць на домэкава пэ́скэ грэ́хо анги́л Растэ-Дэвлэ́стэ, соб (кай) тэ пириячав тэ мангавпэ пал тумэ́ндэ, и ява́ва тэ сыклякирав тумэн пэ лачхо́ и маму́й дром;

²⁴ екх дарэ́н Ра́стыр-Дэвлэ́стыр и дынаринэ́н Лэ́скэ чачунэ́с, сарэ́ тумарэ́ илэ́стыр, пал-дова́ со тумэ́ дыкхнэ́, савэ́ барэ́ рэ́нды Ёв кэрдя́ тумэ́нца;

²⁵ ко́ли тумэ́ явэ́на тэ кэрэ́н фуипэ́н, тэды и тумэ́, и тумаро́ кра́ли хасёна.”