1 Коринфянэнгэ 8 - Библия - Пэ Балтитко Романи чиб (Романэс) 2019

Пхучыбэн пал Хабэ́н, Саво́ Янэ́на, Сыр Свэ́нто Дыибэ́н Идолэ́нгэ

¹ Пал дова́, со хабэ́н янэ́на сыр свэ́нто дыибэ́н идолэ́нгэ, амэ джина́са (амэ́ндэ сарэ́ндэ исын джиныбэ́н): нэ джиныбэ́н пхутькирэла, а ла́ска (паты́в) кэ яви́р мануша́ подрикирэ́ла дро патяибэ́н.

² Ко́ли вари-кон думинэ́ла, со ёв джинэ́ла вари-со, ёв на джинэ́ла ничы́ адя́кэ, сыр трэиндя́ лэ́скэ тэ явэ́л.

³ А ко́ли вари-кон рикирэ́ла сыр Дро́гима Дэвлэ́с дро пэ́скиро ило́, то Дэвэ́л джинэ́ла лэс:

⁴ пал хабэ́н, саво́ янэ́на сыр свэ́нто дыибэ́н идолэ́нгэ, амэ джина́са, со идоло дава́ исын хохано́ дэвлоро дро свэ́то, со Дэвэ́л фэ́ни Екх исын, и яви́р нанэ.

⁵ Палдава́, ко́ли исын ишчо (инкэ́) вари-савэ́ хоханэ́ дэвлорэ́, со кхарэнапэ “дэвлэнца”, ци дро болыбэ́н, ци пэ пхув (палдова́ со исын бут дэвлорэ́ и исын бут рая́),

⁶ нэ амэ́ндэ ж исын екх Дэвэ́л Дад, Саво́ создыя́ саро́ и ваш Савэ́скэ амэ дживаса; и исын екх Рай Дэвэ́л, Ису́со Христо́со, пир Савэ́стэ саро́ яця́ и пир Савэ́стэ амэ дживаса.

⁷ Нэ дасаво джиныбэ́н нанэ сарэ́ндэ: вари-савэ́ манушэ́ндэ далэ́ и́долы адя́кэ исын бэштэ́ дрэ лэ́нгири годы́, со ёнэ ха́на жэртвенно хабэ́н сы́рбы свэ́нто дыибэ́н идолэ́нгэ; а лэ́нгири годы́, сави́ ишчо (инкэ́) исын бизорьякири, сы́рбы магирэлапэ хабнастыр.

⁸ Нэ мас на чхувэ́ла амэн пашылэды́р кэ Дэвэ́л; ци хаса амэ лэс, ци амэ на хасякираса ничы́, ци на хаса амэ лэс, нанэ ни сави́ льго́та амэ́ндэ.

⁹ Нэ ракхэ́нпэ, соб (кай) тумаро́ право тэ хан тэ на явэ́л сы́рбы бар пэ дром одолэ́ндэ, савэ́ндэ исын назорало патяибэ́н.

¹⁰ Палдава́, ко́ли вари-кон дыкхэ́ла тут, конэ́стэ исын джиныбэ́н, со ту сан бэшто́ пал сками́нд дро идолэнгирэ-мангипнытко кхэр, со ж тэды, ци на подпхэнэла годы́ одолэ́ манушэ́скэ, савэ́стэ нанэ зорало́ патяибэ́н, тэ хал дава́ жэртвенно хабэ́н сы́рбы свэ́нто дыибэ́н идолэ́нгэ?

¹¹ И хасёла тыро́ пшал дро ду́хо (фа́но), савэ́стэ нанэ зорало́ патяибэ́н пал тыро́ джиныбэ́н.

¹² Нэ ке́ли тумэ́ кэрэ́на грэ́хо проти пшалэ́стэ пир Растэ-Дэвлэ́стэ далэ́са, со тумэ́ сы́рбы дылнякирэна лэ́скири бизорьякири годы́, тэды тумэ́ кэрэ́на грэ́хо проти Христосо́стэ.

¹³ Палдава́, ко́ли мас исын сы́рбы фэлы́ ваш грэ́хо пэ дром мирэ́ пшалэ́скэ, тэды мэ ние́кхвар буты́р на ява́ва тэ хав мас, соб (кай) ма́нгэ тэ на явав сы́рбы фэлы́ кэ грэ́хо пэ дром мирэ́ пшалэ́скэ.