1 Коринфянэнгэ 6 - Библия - Пэ Балтитко Романи чиб (Романэс) 2019

Пша́ла Сэндинэ́напэ Екх Екхэ́са

¹ Сыр дава́ нанэ ладжаво, ко́ли вари-кон тумэ́ндыр, ке́ли лэ́стэ исын холы́ пэ явирэ́стэ, тэды тэ джал пэ сэ́ндо анги́л напатяибнаскирэ манушэ́ндэ (Наюдэ́ндэ), заме́ст дова́, соб (кай) тэ джал кэ свэ́нта?

² Ци тумэ́ на джинэ́на, со свэ́нта явэ́на тэ сэндинэ́н саро́ свэ́то? Ко́ли тумэ́нгэ тэ сэндинэ́н свэ́то, тэды со ж тумэ́ на сан мол, соб (кай) тэ сэндинэ́н набарэ́ рэндорэ́ (де́лыцы)?

³ Ци тумэ́ на джинэ́на, со амэ́нгэ тэ сэндинас Янголэн? Тэды со тумэ́ на могинэ́на тэ роскэдэнпэ дрэ далэ́ джиибна́скирэ рэ́нды?

⁴ А ке́ли тумэ́ндэ исын далэ́ джиибна́скирэ рэндорэ́, тэды со́скэ тумэ́ чхувэ́на пэ́скирэ сэндарьенца дасавэ́ манушэ́н, савэ́н на кутякирэна мануша́ кхангирья́тыр.

⁵ Мэ пхэна́ва тэ ладжакирав тумэн. Ци нанэ ниекхэс годьварэ́ манушэ́с машки́р тумэ́ндэ, соб (кай) ёв могинэлас тэ роскэдэлпэ дро рэ́ндо машки́р тумэ́ндэ?

⁶ Дыкхэ́н: пшал сэндинэлапэ пшалэса, и дава́ исын анги́л напатяибнаскирэндэ!

⁷ И дава́ исын буты́р блатуно рэ́ндо ваш тумэ́нгэ, со тумэ́ сэндинэнапэ екх екхэ́са. Со́скэ тумэ́нгэ тэ на пирилыджас пхарипэ́н ни пал со? Тумэ́нгэ фэды́р тэ дэнпэ дукха́?

⁸ Нэ тумэ́ ж кокорэ́ кэрэ́на чорипэ́н и хохавэна явирэ́н, и кэ тумари́ ладж, хохавэна тумарэ́ пшалэ́н.

⁹ Ци тумэ́ на джинэ́на, со начачунэнгэ на явэ́ла паш дро Кралипэ́н дро Болыбна́скиро Раё? На хохавэнпэ: ни одолэ́, савэ́ кэрэ́на блэ́ндо, ни идолэ-мангипнаскирэ, ни одолэ́, савэ́ кэрэ́на марки, ни одолэ́ мурша́, савэ́ исын сы́рбы джувля́, ни одолэ́, савэ́ дживэ́на муршэнца сыр джувле́нца,

¹⁰ ни чора́, ни сквапныма́рья, ни матыма́рья, ни кошыбна́рья, ни праха́рья-лэ́нгэ на явэ́ла паш дро Кралипэ́н дро Болыбна́скиро Раё.

¹¹ Вари-савэ́ тумэ́ндыр са́нас адасавэ́. Нэ тумэ́ сан обмордэ, освэнцындлэ, нэ тумэ́ сан приджиндлэ сыр чачунэ́ амарэ́ Ра́скирэ-Дэвлэ́скирэ лавэ́са, Исусо́скирэ Христососкирэса и амарэ́ Дэвлэ́скирэ Духо́са.

Дживэ́н Адя́кэ, Соб (кай) Тумэ́ тэ Славинэ́н Дэвлэ́с

¹² Ма́нгэ саро́ сашты́, нэ льго́та (польза) исын на сарэ́стыр; ма́нгэ саро́ сашты́, нэ нашты́, соб (кай) вари-со тэ лэл упралыпэ́н пэ ма́ндэ.

¹³ Хабэ́н исын ваш пэр, и пэр исын ваш хабэ́н, нэ Дэвэ́л хасякирэ́ла и екх, и яви́р: нэ маса́ исын дынэ́ на ваш биладжаипэ́н, а маса́ исын дынэ́ ваш Ра́скэ-Дэвлэ́скэ и Рай Дэвэ́л исын ваш маса́.

¹⁴ Дэвэ́л отджидякирдя́ Рас-Дэвлэ́с, и Ёв адя́кэ-паць отджидякирэла амэн Пэ́скирэ зорья́са.

¹⁵ Ци тумэ́ на джинэ́на, со тумарэ́ маса́ исын сы́рбы паша́ Исусо́скирэ масэ́ндыр? Со ж, тэды, мэ отлава паш Христосостыр, соб (кай) тэ кэра́в далэ́ пашатыр паша́ биладжакунэ́ джувля́кэ? Тэ на явэ́л адя́кэ.

¹⁶ Ци тумэ́ на джинэ́на, со одова́, кон исын кхэтанэ́ биладжакунэ́ джувля́са, ячэ́лапэ ла́са сыр екх маса́? Палдава́ ж, исын пхэндло́: “Дуйджинэ́ явэ́на сыр екх лоч.”

¹⁷ Нэ одова́, кон исын кхэтанэ́ Дэвлэ́са, исын сы́рбы дро екх ду́хо (фа́но) Ра́са-Дэвлэ́са.

¹⁸ Нашэ́н биладжакунэ́ рэндэ́ндыр. Кажно ману́ш, кон кэрэ́ла яви́р грэ́хо, кэрэ́ла сы́рбы на ваш пэ́скэ, нэ одова́, кон дживэ́ла джувле́нца би сэвлакиро, кэрэ́ла грэ́хо пэ́скирэ масэнгэ.

¹⁹ Ци тумэ́ на джинэ́на, со тумарэ́ маса́ исын сы́рбы кхангири́ ваш Свэ́нто Ду́хо (Фа́но), Саво́ дживэ́ла дрэ тумэ́ндэ и исын Дэвлэ́стыр; и со ж тумэ́ на сан хулая́ пэ́скирэ масэнгэ?

²⁰ Тумэ́ сан киндлэ пал бари тими́н (кимин); палдава́ славинэ́н тумэ́ Дэвлэ́с пэ́скирэ масэнца и Духо́са, савэ́ исын Дэвлэ́скирэ.