1 Коринфянэнгэ 5 - Библия - Пэ Балтитко Романи чиб (Романэс) 2019

На́лачхо Лыджаипэ́н-Пэс дро Кхангири́

¹ Исын мавлы́н (малва), со машки́р тумэ́ндэ исын биладжаипэ́н и дасаво биладжаипэ́н, саво́ аж на сыс джиндло́ машки́р Наюдэ́ндэ, со екх ману́ш рикирэ́ла лэ́скирэ-дадэ́скирэ ромня́ пал ромня́тэ.

² И тумэ́ ишчо (инкэ́) пхутёна, заме́ст дова́, соб (кай) тэ ровэ́н пал дава́, и соб (кай) тэ джал криг тумэ́ндыр одова́ ману́ш, кон кэрдя́ дасаво рэ́ндо (де́ло).

³ Мэк мэ на сом тумэ́нца, нэ мэ сы́рбы думинава пал тумэ́ндэ и придуминдём хась (ка́ра) одолэ́скэ, кон кэрдя́ дасаво рэ́ндо,

⁴ ваш Ра́скирэ-Дэвлэ́скиро лав, ке́ли тумэ́ скэдэ́напэ кхэтанэ́ дрэ кхангири́ и сы́рбы пир миро ду́хо (фа́но) и Ра́скирэ-Дэвлэ́скирэ зорья́са амарэ́ Исусо́скирэ Христососкирьяса,

⁵ тэ отдэ́н адасавэ́ манушэ́с налачхэскэ тэ мэнчынэл лэс лэ́скири лоч (плоть), сави́ исын дро грэ́хо, соб (кай) тэ зракхэн лэ́скиро ду́хо (фа́но) дро Ра́скирэ-Дэвлэ́скиро дывэ́с, амарэ́ Исусо́скиро Христосо́скиро.

⁶ Дава́ исын нашукар, со тумэ́ шарэнапэ. Ци тумэна джинэ́на, со тыкнэ́ рошчынатыр шутлёла саро́ хумэр (цясто)?

⁷ Палдава́ выжужакирэн пхуранэ́-грэхоскири рошчына, соб (кай) тумэ́ тэ явэ́н нэвонэ́ хумэрэса, пал-дова́ со тумэ́ ж сан жужо́ хумэр, би рошчынакиро, пал-дова́ со амаро́ Христо́со, Патрадитко Бакроро́, сыс мулякирдо сыр свэ́нто дыибэ́н пал амэ́ндэ.

⁸ Палдава́ ява́са тэ свэнкинас свэ́нко на пхуранэ́ рошчынаса, савэ́ сыс пхэрды́ грэхоса и песьцёнымаса, а би рошчынакирэ марэ́са, саво́ исын пхэрдо́ жужыпнаса (чыстотаса) и чачипна́са.

⁹ Мэ чхиндём тумэ́нгэ дро миро лыл, соб (кай) тумэ́ндэ тэ на явэ́л нисо́ кхэтанэ́ манушэ́нца, савэ́ дживэ́на джувле́нца би сэвлакиро.

¹⁰ Нэ на напатяибнаскирэнца, савэ́ исын свэто́стыр, и, савэ́ дживэ́на джувле́нца би сэвлакиро, ци сквамнымарьенца ци прахарьенца, ци идолэ-мангипнаскирэнца, пал-дова́ со тумэ́нгэ трэиндя́ тэ джа́н далэ́ свэто́стыр.

¹¹ Нэ какана́ мэ чхиндём тумэ́нгэ тэ на кэрэ́н нисо́ кхэтанэ́ одолэ́ манушэ́са, саво́ кхарэ́лапэ пшалэса, а кокоро́ дурэды́р дживэ́ла джувле́нца би сэвлакиро, ци ячэ́лапэ сквамнымариса, ци идолэ-мангипнаскирэса, ци кошыбнариса, ци матымариса, ци прахариса; кадасавэса и тэ на бэшэ́н тэ хан кхэтанэ́.

¹² Со ж ма́нгэ тэ сэндинав (тэ сэндякирав) одолэ́н, савэ́ нанэ кхангирья́тыр? Ци на трэй тумэ́нгэ тэ сэндинэ́н, савэ́ исын кхангирья́тыр?

¹³ Нэ одолэ́н, савэ́ исын на кхангирья́тыр, Дэвэ́л сэндякирэ́ла! Палдава́ традэ́н криг тумарэ́ кхангирья́кирэ скэдыибна́стыр дошалэ манушэ́с.