1 Коринфянэнгэ 4 - Библия - Пэ Балтитко Романи чиб (Романэс) 2019

Христосо́скирэ Апо́столы

¹ Тэды мэк мануша́ тэ ґалён амэн сыр Христосо́скирэ дынарье́н и кхэритконэ́ барыдырэ́н пир Дэвлэ́скирэ чораханэ чачипэна́.

² Екх со трэй ваш кхэритконэ́ барыдырэ́скэ, соб (кай) ёв тэ явэ́л патяибны́тко пир саро́.

³ А ваш ма́нгэ дава́ исын набаро́ рэ́ндо, сыр тумэ́ дэ́на чол (тими́н) ма́нгэ, ци манушы́тко сэ́ндо дэ́ла. Нэ мэ адя́кэ-паць на дава́ чол пэ́скэ.

⁴ Пал-дова́ со ни саво́ чорипэ́н нанэ пал ма́ндэ; нэ дава́ на допхэнэ́ла, со мэ на сом банго́: дава́ Рай Дэвэ́л, Саво́ дэ́ла чол ма́нгэ.

⁵ Тэды на сэндякирэн анги́л дова́, сыр Рай Дэвэ́л явэ́ла, Саво́ дудвалякирэла (обсвэнцынэла) и калэ́ (цёмна) чораханыбэна и откэрэла пэ якха́ адя́кэ-паць ґарадэ́ мысли дро манушы́тко ило́; и тэды сва́ко (кажно) ману́ш дорэсэ́ла (долэла) шарибэ́н Дэвлэ́стыр.

⁶ Ѓа́да, дава́ саро́, отлыджалапэ кэ мэ и кэ Аполосо ваш тумаро́ миштыпэ́н, соб (кай) тумэ́ тэ сыклён амэ́ндыр тэ на думинэн вучыдыр кодолэстыр, со исын чхиндло́, и тэ на пхутён екх анги́л екхэ́стэ.

⁷ Палдава́, кон жа выкэдэ́ла тут явирэндыр? И со исын ту́тэ, со на сыс дыно́ ту́кэ? Тэды со́скэ ту шарэсапэ, сы́рбы ту на дорэсцян (на долыян) дава́ сыр тала́но?

⁸ Тумэ́ ужэ чалынэ, тумэ́ акана́ ячнэ́ барвалэ́, тумэ́ ужэ ячнэ́ кральенца би амаро́; и мэ кама́м, соб (кай) тумэ́ чачунэ́с тэ кралинэн, и амэ́нгэ адя́кэ-паць тэ кралинав тумэ́нца.

⁹ Палдава́ мэ думинава, со Дэвэ́л чхудя́ амэн тэ явас Апостолэнца пэ са́мо ко́нцо (яго́ро) палатунэндыр, савэ́н Ёв выкэдыя́ тэ мэрас, сыр и Христо́со мыя́. Палдава́ амэ яця́м сы́рбы ладжакирдо́ сыкаибэ́н (приме́ро) пэ свэто́скирэ якха́ и Янголэнгэ, адя́кэ-паць и манушэ́нгэ.

¹⁰ Амэ сам дылынэ́ пал Христосо́стэ, а тумэ́ сан годьварэ́ дро екхипэ́н Христосо́са; амэ сам бизорья́кирэ, а тумэ́ сан зоралэ́; тумэн славинэна, а амэ сам дрэ ладж.

¹¹ Кэ дава́-паць мардо́ (шту́нда) мэ ишчо (инкэ́) сам бокхалэ́ и амэ́ндэ исын смэга (труш) и амэ сам дрэ патавэ и домардэ́, и амэ псираса сыр бикхэри́тка,

¹² нэ амэ кэра́са буты́ пхарэ́с пэ́скирэ вастэ́нца. Амэн кошэна, а амэ бахтякираса; амэн традэ́на, а амэ пирилыджаса;

¹³ амэн кошэна, а амэ отпхэнаса лачхэ́ лавэ́нца, амэ сам сыр далэ́-свэтоскиро гнэё (мэста), амэ яця́м сыр бла́та далэ́ пхувья́кири кэ/жы́ко какана́.

¹⁴ Мэ на чхина́ва дава́, соб (кай) тэ ладжакирав тумэн, а соб (кай) тэ дав годы́ тумэ́нгэ, сыр мирэ́ дрогонэ́ пшалэ́нгэ.

¹⁵ Палдава́, ко́ли тумэ́ндэ исын дэш тысёнцы сыклярьен (наставникэн) пир патяибэ́н дрэ Христосо́стэ, нэ усае́кх тумэ́ндэ исын екх дад; пал-дова́ со мэ яцём сы́рбы дад ваш тумэ́нгэ пир бахтало́ лав, со мэ яндём.

¹⁶ Палдава́ мэ манга́ва тумэн, тэ кэрэ́н адя́кэ, сыр мэ кэра́ва.

¹⁷ Пал-дова́ мэ бичхадём кэ тумэ́ Тимофеёс (Химас), мирэ́ дрогонэ́ и патяибнытконэ сы́рбы чхавэ́с пир патяибэ́н дрэ Растэ-Дэвлэ́стэ, саво́ долыджала кэ тумари́ годы́ миро джиибэ́н дро екхипэ́н Христосо́са, адя́кэ сыр мэ и сыклякирава дрэ кхангирья.

¹⁸ И пал-дова́ со мэ какана́ на джа́ва кэ тумэ́, то вари-савэ́ тумэ́ндыр пхутинэ.

¹⁹ Нэ мэ сыг ява́ва кэ тумэ́, ко́ли Рай Дэвэ́л дэ́ла, и мэ уджинава ваш пэ́скэ на дова́, со адалэ́ пхутькирдэ́ мануша́ ракирэ́на, а Духоскири зор, сави́ исын лэ́ндэ.

²⁰ Пал-дова́ со Дэвлэ́скиро Кралипэ́н рикирэ́лапэ на лавэ́нца, а Духо́скирэ зорья́са.

²¹ Со ж тэды тумэ́ камэ́на? Ци ма́нгэ тэ явав кэ тумэ́ дэстэса ци ласкаса и тихонэ Духо́са?