1 Коринфянэнгэ 3 - Библия - Пэ Балтитко Романи чиб (Романэс) 2019

Дэвлэ́скирэ Дына́рья

¹ Пшала́лэ, мэ на могиндём тэ ракира́в тумэ́нца сыр манушэ́нца, конэ́стэ исын Ду́хо (Фа́но), а сыр одолэнца, савэ́ дживэ́на пир лочакиро (плотякиро) тырдыпэ́н, сыр бияторэнца (чхаворэнца) пир патяибэ́н дрэ Христосо́стэ.

² Мэ чалякирдём тумэн тхудэ́са, а на масэ́са, пал-дова́ со тумэ́ са́нас бизорья́кирэ, и какана́ ишчо (инкэ́) тумэ́ндэ нанэ зор;

³ пал-дова́ со тумэ́ сан ишчо (инкэ́) мануша́, савэ́ дживэ́на пир лочакиро тырдыпэ́н. Палдава́, ко́ли машки́р тумэ́ндэ исын зэвлыныпэ́н, и кошыбэ́н, тэды, ци на сан тумэ́ мануша́, савэ́ дживэ́на пир лочакиро (плотякиро) тырдыпэ́н; и савэ́ лыджа́на пэс сыр мануша́ кадалэ́ свэто́стыр?

⁴ Пал-дова́ со, ке́ли вари-кон пхэнэ́ла: “Мэ сом Павли́скиро”, ци яви́р: “Мэ сом Аполососкиро”, тэды, ци на сан тумэ́ мануша́, савэ́ дживэ́на пир лочакиро тырдыпэ́н?

⁵ Кон тэды исын Па́вли? Кон исын Аполосо? Ёнэ ж исын екх Дэвлэ́скирэ слу́ги (дына́рья), пир конэ́стэ тумэ́ упатя́ндынэ, сыр и дыя́ Дэвэ́л буты́ кажнонэ́скэ (сваконэскэ).

⁶ Мэ чхудём дрэ пхув, о Аполосо панякирдя, нэ Дэвэ́л дыя́ прибарипэн.

⁷ Палдава́, кон чхудя́ дрэ пхув, кон панякирдя, дава́ нисо́ на мол, а саро́ джа́ла Дэвлэ́стыр, Кон дыя́ прибарипэн.

⁸ Нэ кон чхудя́ дрэ пхув, и кон панякирдя-дава́ усае́кх, а кажно дорэсэ́ла (долэла) отдыибэ́н пир пэ́скири буты́.

⁹ Пал-дова́ со амэ кхэтанэ́ кэра́са буты́ ваш Дэвлэ́скэ, а тумэ́, сан Дэвлэ́скири фэ́лда, Дэвлэ́скиро Кхэр.

¹⁰ Мэ чхудём фунда́менто пир тала́но (дарованиё) бахталыпнастыр, саво́ Дэвэ́л дыя́ ма́нгэ сыр годьваро́ архитекторо, а яви́р ману́ш кэрэ́ла кхэр пэ дава́ фунда́менто. Нэ кажно дыкх, сыр ёв кэрэ́ла кхэр.

¹¹ Палдава́ ние́кх ману́ш на могинэ́ла тэ чхувэ́л яви́р духовно фунда́менто апри́ч одолэ́стэ, саво́ исын Ису́со Христо́со ваш кхангири́ пир саро́ свэ́то.

¹² А ко́ли вари-кон кэрэ́ла кхэр пэ дава́ фунда́менто сувнака́стыр, рупэ́стыр, дрогонэ́ барэндыр, каштэ́стыр, чарьятыр, пхусэстыр,

¹³ тэды кажно манушэскири буты́ сыкадёла дро Христосо́скиро дывэ́с, пал-дова́ со яг сыкавэ́ла саро́, и яг спробинэла кажно буты́, сави́ ёй исын.

¹⁴ Ко́ли вари-конэ́скири буты́, сави́ ёв кэрдя́ пэ дава́ фунда́менто, вытэрдёла, тэды адава́ ману́ш дорэсця́ отдыибэ́н.

¹⁵ А ко́ли вари-конэ́скири буты́ схачола, тэды адава́ ману́ш хасякирэ́ла пэ́скиро отдыибэ́н, нэ ёв зракхэ́лапэ сы́рбы одова́, кон прогия́ пир яг.

¹⁶ Тумэ́ джинэ́на, со тумэ́ сан Дэвлэ́скири Кхангири́, и со Дэвлэ́скиро Ду́хо (Фа́но) дживэ́ла дрэ тумэ́ндэ.

¹⁷ Ко́ли вари-кон хасякирэ́ла Дэвлэ́скирэ-кхангирья́киро скэдыибэ́н кэрибнаса, саво́ нанэ лачхо́ Дэвлэ́скэ, тэды одолэ́с хасякирэ́ла Дэвэ́л; пал-дова́ со Дэвлэ́скирэ-кхангирья́киро скэдыибэ́н исын свэ́нто и тумэ́ патяибнаскирэ, сан дасавэ́.

¹⁸ Мэк ние́кх тэ на хохавэ́л кокоро́ пэс; ко́ли вари-кон думинэ́ла пэ́скэ, со ёв исын годьваро́ машки́р тумэ́ндэ пир дава́ свэтоскиро годьварипэн, тэды мэк адава́ ману́ш тэ ячэ́л дылынэса, соб (кай) ёв могинэлас тэ явэ́л годьварэса.

¹⁹ Пал-дова́ со годьварипэн кадалэ́ свэтоскиро исын дылныпэ́н анги́л Дэвлэ́стэ; палдава́ исын чхиндло́: “Ёв ухтылэ́ла годьварэн дро лэ́нгири фротыма.”

²⁰ И нэвэ́стыр: “Рай Дэвэ́л джинэ́ла саро́, со годьварэ́ думинэ́на, и со дрэ лэ́ндэ нанэ ни сави́ льго́та.”

²¹ Мэк нико́н тэ на шарэлпэ манушэ́нца; пал-дова́ со саро́-исын тумаро́.

²² Ци Па́вли, ци Аполосо, ци Кифа, ци дава́ свэ́то, ци джиибэ́н, ци мэрибэ́н, ци саро́, со амэ́ндэ исын какана́; ци саро́, со явэ́ла амэ́нца анги́л, саро́-исын тумаро́:

²³ и тумэ́ сан Христосо́скирэ, а Христо́со исын Дэвлэ́скиро.