1 Коринфянэнгэ 2 - Библия - Пэ Балтитко Романи чиб (Романэс) 2019

Зан (Звесь) пал Христосо́стэ, Саво́ сыс Примардо́ пэ Трушу́л

¹ Сыр мэ со́мас кэ тумэ́, пшала́лэ, мэ явдём на ваш дова́, соб (кай) тэ роспхэнав Дэвлэ́скиро чорахано чачипэ́н пхутькирдэ́ лавэ́нца ци барэ́ годьварипнаса.

² Палдава́ ма́ндэ пэ годы́ сыс тэ на джина́в нисо́, апри́ч Исусо́стэ Христосо́стэ, Савэс примардэ пэ трушу́л.

³ И ке́ли мэ со́мас тумэ́нца, ма́ндэ на сыс зор, мэ дарандыем и издрандыём;

⁴ дрэ мири́ зан и пхэныбэ́н на сыс годьварэ́ лава́, нэ ёнэ сыс сыр допхэныбэ́н пал Дэвлэ́скирэ-Духоскири зор;

⁵ соб (кай) тумаро́ патяибэ́н тэ на рикирэлпэ пэ манушы́тко годьварипэн, а пэ Дэвлэ́скири зор.

Дэвлэ́скиро Годыпэ́н

⁶ Нэ амэ ракираса пал годьварипэн машки́р бидошакирэ патяибнаскирэндэ, нэ на адя́кэ, сыр дава́ свэ́то гинэ́ла, ци, сыр тхэмэ́скирэ барыдыра́ далэ́ свэто́стыр ґалёна годьварипэн, савэ́ сыг кончынэнапэ.

⁷ А амэ ракираса пал Дэвлэ́скиро чорахано годыпэ́н, саво́ Дэвэ́л гарадя и выкэдыя́ ваш амари́ сла́ва анги́л, сыр свэ́то сыс создыно́ (кэрдо́):

⁸ ние́кх адалэ́ свэто́скирэ барэ́ рандыр на ґалыя́ дава́, пал-дова́ со, ко́ли ёнэ тэ ґалён, тэды ёнэ на примарэнас Рас-Дэвлэ́с, Саво́ исын пхэрдо́ слава́са,

⁹ нэ сыр исын чхиндло́: “Кодова́ на дыкхця́ якх, на шундя́ кан, на сыс пэ ило́ манушэ́стэ, со Дэвэ́л кэдыя одолэ́нгэ, конэ́скэ яця́ дро́го Ёв;

¹⁰ нэ Дэвэ́л откэрдя дава́ Пэ́скирэ Духо́са, пал-дова́ со Ду́хо (Фа́но) доджа́ла кэ саро́, аж кэ ду́мы Дэвлэ́скирэ, со исын ґарадэ́ манушытконэ́ годятыр.”

¹¹ Палдава́, кон манушэ́ндыр джинэ́ла, со исын дрэ явирэ манушэ́стэ, екх дава́ манушы́тко Ду́хо (Фа́но), саво́ дживэ́ла дрэ манушэ́стэ? Адя́кэ-паць и екх Дэвлэ́скиро Ду́хо (Фа́но) джинэ́ла екх пал Дэвлэ́стэ.

¹² Нэ амэ прилыям ду́хо (фа́но) на кадалэ́ свэто́стыр, а амэ прилыям Ду́хо (Фа́но), Саво́ Дэвэ́л бичхадя́, соб (кай) амэ́нгэ тэ ґалёвас саро́ дова́, со Дэвэ́л адя́кэ дыя́ амэ́нгэ:

¹³ пал со амэ ракираса лавэ́нца, савэ́ на манушытконэ́-годьварипнастыр, а лавэ́нца, савэ́ свэ́нто Ду́хо (Фа́но) сыклякирдя́, ке́ли амэ пирипхэнаса Духоскиро одолэ́нгэ, конэ́стэ исын Ду́хо (Фа́но).

¹⁴ Ману́ш, савэ́стэ нанэ Ду́хо (Фа́но), на прилэ́ла илэ́са таланы Дэвлэ́скирэ Духо́стыр, пал-дова́ со ёв гинэ́ла лэн пал дылныпэ́н; и ёв на могинэ́ла тэ ґалёл лэн, пал-дова́ со лэ́нгэ дэ́на чол (тими́н) мануша́, конэ́стэ исын Ду́хо (Фа́но);

¹⁵ нэ ману́ш, савэ́стэ исын Ду́хо (Фа́но), дэ́ла чол сарэскэ, нэ лэ́скэ ние́кх на могинэ́ла тэ дэл чол.

¹⁶ Пал-дова́ со, кон ґалыя́ Дэвлэ́скири годы́, соб (кай) тэ сыклякирэ́л Лэс? А амэ́ндэ исын Христососкири годы́.