1 Коринфянэнгэ 16 - Библия - Пэ Балтитко Романи чиб (Романэс) 2019

Пал Кхангирья́кирэ Ловэ́ ваш Явирэ́ Патяибнаскирэ́ндэ

¹ Пал дова́, сыр тэ кэдэн ловэ́ ваш свэнтонэнгэ, кэрэ́н адя́кэ, сыр мэ упхэндём пир Галатиякирэ кхангирья.

² Дро пэ́рво куркитко дывэ́с мэк кажно тумэ́ндыр тэ отчхувэл дрэ риг и тэ ракхэ́л ада́кицы ловэ́, пэ кицы́ лэ́скиро миштыпэ́н выбарьёла, соб (кай) тумэ́ тэ на кэдэн ловэ́, ке́ли мэ ява́ва кэ тумэ́.

³ И ке́ли мэ ява́ва, тэды кодолэ́ манушэ́н, савэ́н тумэ́ выкэдынэ́, мэ бичхава́ва лылэнца тэ лыджа́н тумарэ́ ловэ́, со исын скэдынэ́ пир тумари́ лачхэ́-илы́ткима дро Ерусалимо:

⁴ и ко́ли дава́ явэ́ла куч, соб (кай) адя́кэ-паць и ма́нгэ тэ явав, тэды ёнэ могинэ́на тэ джа́н ма́нца.

Павли́скирэ Мы́сли

⁵ Нэ мэ ява́ва кэ тумэ́, ке́ли мэ проджава пир Македония; пал-дова́ со мэ джа́ва пир Македония.

⁶ Нэ ма́нгэ здэлапэ, со мэ ява́ва тэ джива́ва на́бут (куты́) кэ тумэ́, ци аж ячавпэ пэ ивант (зима), и тэды тумэ́ пролыджана ман, карик ма́нгэ трэй тэ джав.

⁷ Пал-дова́ со мэ на кама́м тэ дыкхавпэ тумэ́нца сы́рбы пир дром, пал-дова́ со мэ ужакирава лачхипэ́н тэ ячавпэ кэ тумэ́ пэ вари-саво́ часо, ко́ли явэ́ла пэ дава́ Ра́скирэ-Дэвлэ́скири во́ля.

⁸ Нэ мэ ячавпэ кэ Эфесо кэ Духоскиро свэ́нко.

⁹ Пал-дова́ со баро́ и бугло вуда́р сы́рбы псирадыя ваш мири́ буты́, а исын бут вэ́рги.

¹⁰ Ко́ли Хима (Тимофеё) явэ́ла кэ тумэ́, кэрэ́н, сыр исын фэды́р, соб (кай) ёв тэ явэ́л би дара́киро кэ тумэ́, пал-дова́ со ёв кэрэ́ла буты́ ваш Ра́скэ-Дэвлэ́скэ, адя́кэ-паць, сыр и мэ.

¹¹ Мэк нико́н тэ на дыкхэ́л пэ лэ́стэ барэ́ минаса, а бичхавэн лэс раманёса, соб (кай) ёв тэ явэ́л кэ мэ; пал-дова́ со мэ ужакирава лэс пшалэ́нца.

¹² Ѓа́да, пал пшалэ́стэ Аполосостэ, мэ бут мангавас лэс тэ джал пшалэ́нца кэ тумэ́, нэ ёв ишчо (инкэ́) нанэ скэдыно́ дро ду́хо (фа́но) тэ джал, а явэ́ла тэды, ке́ли лэ́стэ явэ́ла лачхи́ ваканцыя (случаё).

Палатунэ́ Лава́

¹³ Ракхэ́нпэ, рикирэ́н патяибэ́н; явэ́н муршканэ́, явэ́н зоралэ́.

¹⁴ Мэк саро́ тэ кэрэ́лпэ тумэ́ндэ ласка́са и патыва́са.

¹⁵ Мэ манга́ва тумэн, пшала́лэ, тумэ́ ж джинэ́на Стэхфаноскири сэ́м΄я (ири́), савэ́ исын пэ́рва патяибнаскирэ дрэ Ахайя, и со ёнэ отдынэ́ пэс, соб (кай) тэ дынаринэ́н свэнтонэнгэ;

¹⁶ соб (кай) тумэ́ тэ кандэ́н лэн и кажнонэ́ манушэ́с лэ́ндыр, кон лэ́нца кэрэ́ла буты́ и дынаринэла.

¹⁷ Мэ радынавпэ, со явнэ́ Стехвано, Фартунато и Ахаико; пал-дова́ со ёнэ сы́рбы парудэ тумэн, ке́ли на сыс тумэн.

¹⁸ Пал-дова́ со ёнэ подрикирдэ сыр миро адя́кэ-паць и тумаро́ ду́хо (фа́но): кутякирэн (патывакирэн) кадасавэн.

¹⁹ Пиридэна “рама́нё” тумэ́нгэ кхангирья́кирэ скэдыибэна Леиятыр. Акила и Прискила пиридэна “рама́нё” сарэ́ илэ́стыр Ра́са-Дэвлэ́са лэ́нгирэ кхэритконэ́ скэдыибнаса.

²⁰ Сарэ́ пша́ла пиридэна “рама́нё” тумэ́нгэ. Пиридэ́н “рама́нё” екх екхэ́скэ свэнтонэ́ чамудыпнаса.

²¹ Мэ чхиндём пэ́скирэ вастэ́са “рама́нё” тумэ́нгэ ма́ндыр.

²² Ко́ли вари-кон на рикирэ́ла сыр Дро́гима Рас-Дэвлэ́с дро пэ́скиро ило́, Исусо́с Христосо́с, тэ явэ́л лэ́скэ Анафема (Мара-Тафа).

²³ Мэк бахталыпэ́н амарэ́ Ра́скирэ-Дэвлэ́скирэ, Исусо́скирэ Христосо́скиро тэ явэ́л тумэ́нца.

²⁴ Мэк мири́ паты́в кэ яви́р мануша́ пир Христосо́стэ Исусо́стэ тэ явэ́л сарэ́нца тумэ́нца. Ами́нь.