1 Коринфянэнгэ 15 - Библия - Пэ Балтитко Романи чиб (Романэс) 2019

Христосо́скиро Отджидыипэ́н

¹ Нэ тумэ́ рипирэ́н, пшала́лэ, бахталы́ зан (звесь), сави́ мэ роспхэндём тумэ́нгэ, сави́ тумэ́ адя́кэ-паць прилынэ́, пэ сави́ тумаро́ патяибэ́н адя́кэ-паць рикирлапэ;

² дая́ Ева́нгелия исын Ра́скиро-Дэвлэ́скиро лав, со мэ роспхэндём тумэ́нгэ, пир саво́ амэ зракхасапэ, ке́ли тумэ́ рикирэ́на зоралэ́с дава́ чачипэ́н, и ко́ли тумэ́ фэ́ни на ивья́ (на напра́снэс) упатя́ндынэ.

³ Палдава́ мэ роспхэндём тумэ́нгэ англэды́р сарэ́стыр дова́, со мэ адя́кэ-паць прилыём, со Христо́со мыя́ пал амарэ́ грэ́хи, сыр исын пир Свэ́нто Чхиныбэ́н;

⁴ и дова́, со Ёв сыс ґарадо, и со Ёв отджидыя́ пэ три́то дывэ́с, сыр исын пир Свэ́нто Чхиныбэ́н;

⁵ и со Ёв сыкадя́ пэс Кифаскэ, тэ́ньчи дэшудуе́ Апостолэнгэ.

⁶ Тэ́ньци Ёв сыкадя́ пэс буты́р, сыр панджшэла́ пшалэ́нгэ дро екх-паць часо савэ́ндыр бутэды́р паш исын джидэ́ кэ ададывэ́с, а вари-савэ́ ужэ мынэ́.

⁷ Тэ́ньци Ёв сыкадя́ Пэс Яково́скэ, тэ́ньчи и сарэ́ Апостолэнгэ;

⁸ и коригэды́р (позжэды́р) сарэ́ндыр Ёв сыкадя́ Пэс ма́нгэ, манушэ́скэ, саво́ сы́рбы бия́ндыя на дро пэ́скиро часо.

⁹ Палдава́ мэ сом най тыкнэды́р мол сарэ́ явирэ Апостолэндыр, и мэ на сом лачхо́ тэ кхаравпэ Апостолоса, пал-дова́ со мэ традавас Дэвлэ́скиро скэдыибэ́н.

¹⁰ Пир Дэвлэ́скиро бахталыпэ́н мэ сом адасаво́, сыр исын, и бахталыпэ́н, саво́ Ёв дыя́ ма́нгэ, на сыс ивья́; нэ мэ кэрдём буты́ буты́р лэ́ндыр сарэ́ндыр; нэ дава́ на адя́кэ сыс мири́ буты́, а сыр Дэвлэ́скиро бахталыпэ́н, со сыс ма́нца.

¹¹ Палдава́, ци да мири́ буты́, ци да лэ́нгири, дава́ исын усае́кх, нэ главныма исын дро дова́, со амэ пхэна́са лав пал дава́, и тумэ́ адя́кэ упатя́ндынэ.

Амаро́ Отджидыибэ́н

¹² Нэ ко́ли пхэнэ́лапэ лав, со Христо́со отджидыя́ мэрибна́стыр, сыр тэды вари-савэ́ тумэ́ндыр ракирэ́на, со нанэ отджидыипэн мэрибна́стыр.

¹³ А ко́ли нанэ отджидыипэн мэрибна́стыр, тэды и Христо́со на отджидыя́ мэрибна́стыр:

¹⁴ нэ ко́ли Христо́со на отджидыя́ мэрибна́стыр, тэды, чачэс, амаро́ пхэныбнытко лав исын чхучо́ (пусто), и чхучо́ исын тумаро́ патяибэ́н.

¹⁵ И амэ тэды явасас адя́кэ-паць хоханэ́ якхи́тка пал Дэвлэ́стэ, пал-дова́ со амэ допхэнасас пал Дэвлэ́стэ, со Ёв отджидякирдя́ Христосо́с, Дэвэ́л сы́рбы на отджидякирэлас, ко́ли дава́ исын чачипэ́н, со мулэ́, хачи, на отджидёна.

¹⁶ Палдава́ ко́ли мулэ́ на отджидёна, тэды и Христо́со на отджидыя́;

¹⁷ а ко́ли Христо́со на отджидыя́, тумаро́ патяибэ́н исын чхучо́; тумэ́ сы́рбы ишчо (инкэ́) сан тэл хась (ка́ра) пал пэ́скирэ грэ́хи (тумэ́ ишчо (инкэ́) сан дрэ пэ́скирэ грэ́хи).

¹⁸ Палдава́ дава́ исын дова́-паць, со патяибнаскирэ дрэ Христосо́стэ, савэ́ мынэ́, исын адя́кэ-паць сы́рбы тэл сэ́ндо пал пэ́скирэ грэ́хи.

¹⁹ Ко́ли амаро́ лачхо́ ужакирибэ́н пэ Христосо́стэ исын лачхо́ фэ́ни ваш дава́ джиибэ́н, тэды амэ сам най бибахталэдыр сарэ́ манушэ́ндыр.

²⁰ Нэ Христо́со отджидыя́ мэрибна́стыр, са́мо пэ́рво одолэ́ндыр, кон мыя́.

²¹ Палдава́, ко́ли мэрибэ́н явдя́ пэ свэ́то пир екхэ манушэ́стэ, адя́кэ-паць и отджидыипэн мулэ́ндыр явэ́ла пир екхэ манушэ́стэ.

²² Палдава́, сыр сарэ́ мануша́ мэрэ́на пал дова́, со ёнэ исын дро екхипэ́н Адамоса, адя́кэ-паць сарэ́ отджидёна пал дова́, со ёнэ исын дро екхипэ́н Христосо́са.

²³ Нэ кажно ману́ш пир пэ́скиро штэ́то: англэды́р Христо́со, тэ́ньчи Христосо́скирэ, ке́ли Ёв явэ́ла.

²⁴ Тэды явэ́ла ко́нцо (яго́ро), ке́ли Христо́со здэла саро́ кралипэ́н Дэвлэ́скэ Дадэ́скэ; тэды, ке́ли, сыр Христо́со чхувэ́ла саро́ тэлэ́: ран, право и зор.

²⁵ Палдава́ Христосо́скэ трэй тэ кралинэ́л, пака Дэвэ́л Дад на чхувэ́ла сарэ́ вэргэ́н тэл Христосо́скирэ ґэра́,

²⁶ Палатуно́ (последнё) вэ́рго, саво́ хасёла, явэ́ла мэрибэ́н.

²⁷ Пал-дова́ со Дэвэ́л Дад чхувэ́ла тэлэ́ саро́ тэл Христосо́скирэ ґэра́ (пирэ́), ке́ли Ёв ракирэ́ла, со “саро́ Ёв чхувэ́ла тэлэ́ тэл Лэ́скирэ ґэра́”, дава́ значынэ́ла, со дава́ саро́ апри́ч Кокорэстэ Дэвлэ́стэ Дадэ́стыр, Саво́ чхудя́ тэлэ́ саро́.

²⁸ Нэ ке́ли саро́ явэ́ла чхудо тэлэ́ тэл Христосо́скиро кралипэ́н, тэды и Чхаво́ Кокоро́ чхувэ́ла тэлэ́ Пэс анги́л Дэвлэ́стэ Дадэ́стэ, Саво́ чхудя́ тэлэ́ саро́ анги́л Лэ́стэ, ваш дова́, соб (кай) Дэвэ́л Дад тэ кралинэ́л пхэрдэ́с пэ саро́.

²⁹ Со ж тэды кэрэ́на адалэ́ мануша́, савэ́ болэнапэ пал мулэ́ндэ? Ко́ли мулэ́ мануша́ на отджидёна сарэ́са, со́скэ ж ёнэ тэды далэ́ мануша́ болэнапэ пал мулэ́ндэ?

³⁰ Со́скэ ж амэ со дывэ́с пэраса тэл дар?

³¹ Мэ со дывэ́с мэра́ва: мэ совлахава, со дава́ чачипэ́н шарибнаса, со исын ма́ндэ, пал тумаро́ патяибэ́н дрэ Исусо́стэ Христосо́стэ, амарэ́ Растэ-Дэвлэ́стэ.

³² Ко́ли мэ пир манушы́тко годы́ мериндёмпэ зорья́са рискирибна́скирэ мурдалэ́нца дро Ефесо, тэды сави́ исын льго́та (ко́фо) ма́нгэ, ко́ли мулэ́ мануша́ на отджидёна? А ко́ли исын адя́кэ, со ж тэды джа́са тэ хас и тэ пьяс, пал-дова́ со усае́кх амэ мэраса атася́.

³³ На хохавэнпэ: налачхэ́ кампании розмэкэна лачхэ́ характеры.

³⁴ Лэнпэ пал годы́, сыр исын трэй и на кэрэ́н грэ́хи; мэ пхэна́ва тэ ладжакирав тумэн, со вари-савэ́ тумэ́ндыр на джинэ́на Дэвлэ́с.

Пал Масэ́нгиро Отджидякирибэ́н

³⁵ Нэ вари-кон пхэнэ́ла сыр мулэ́ мануша́ отджидёна? Савэ маса́ явэ́на лэ́ндэ?

³⁶ Бигодякиро ту сан: одова́, со ту чхувэ́са дрэ пхув, на отджидёла, пака на мэрэ́ла.

³⁷ И дова́, со ту чхувэ́са дрэ пхув, нанэ чачуны́ зя́рка, а дая́ исын нанги зя́рка: ци дава́ тэ явэ́л джов, ци дава́ тэ явэ́л парно́ гив, ци тэ явэ́л вари-сави́ яви́р зя́рка:

³⁸ и Дэвэ́л дэ́ла ла́кэ форма, сыр Ёв Кокоро́ камэ́ла, и дрэ кажно зя́рка исын пэ́скири форма.

³⁹ Лоча́ (пло́ти) исын ра́зна: манушэ́стэ исын екх лоч (маса́), мурдалэ́ндэ исын яви́р лоч, чириклендэ ишчо (инкэ́) исын яви́р лоч, и мачхэндэ исын яви́р лоч.

⁴⁰ И исын болыбны́тка формы и исын пхувитка формы, а ра́зна исын болыбнытконэ́-формэ́нгири го́жыма и пхувитконэ́-формэ́нгири го́жыма:

⁴¹ кхамэстыр исын пэ́скири гожыма, чхонэстыр-яви́р гожыма, чэргэнендыр-яви́р гожыма: екх чэргэнятыр нанэ дасави́ гожыма, сыр явирьятыр.

⁴² Адя́кэ-паць явэ́ла, сыр мулэ́ явэ́на тэ отджидён. Тру́по чхувэ́лапэ дрэ пхув тэ кирнёл, ке́ли ёв отджидёла, то явэ́ла тэ дживэ́л ве́чнэс.

⁴³ Ке́ли тру́по чхувэ́лапэ дрэ пхув, ёв исын джунгало́ (брыдко) и бизорья́киро, ке́ли отджидёла, явэ́ла шука́р и зорало́.

⁴⁴ Чачуно́ тру́по чхувэ́лапэ дрэ пхув, а ке́ли отджидёла, ёв явэ́ла сы́рбы дэвлыкано и Духоскиро.

⁴⁵ Адя́кэ, сыр исын чхиндло́: “Пэ́рво ману́ш Адамо сыс создыно́ сыр джидо́ ди, палатуно́ Адамо яця́ отджидякирибнытконэ духо́са.”

⁴⁶ Нэ анги́л на Ду́хо, а чачуно́ ману́ш, а Ду́хо коригэды́р (позжэ):

⁴⁷ пэ́рво ману́ш сыс создыно́ пхувья́кирэ прахостыр, а яви́р ману́ш исын Рай Дэвэ́л, Болыбна́скирэ Раёстыр.

⁴⁸ Саво́ исын пэ́рво пхувья́киро ману́ш, дасавэ́-паць исын пхувья́кирэ мануша́, саво́ исын Болыбна́скиро Ману́ш, дасавэ́-паць исын Болыбна́скирэ мануша́.

⁴⁹ И, сыр амэ́ндэ сарэ́ндэ исын пхувья́кирэ-манушэскири патри́н (о́бразо), адя́кэ-паць амэ́ндэ явэ́ла Болыбна́скирэ-Манушэскири патри́н (о́бразо).

⁵⁰ Нэ мэ пхэна́ва тумэ́нгэ, пшала́лэ, дова́, со исын лоча́тыр и ратэ́стыр, на заджа́ла дро Дэвлэ́скиро Кралипэ́н дро Болыбна́скиро Раё; и амарэ́ маса́, савэ́ кирнёна, на явэ́на тэ дживэ́н ве́чнэс.

⁵¹ Ѓа́да, мэ пхэна́ва чораханыбэн тумэ́нгэ: амэ на сарэ́ мэраса, нэ сарэ́ парудёваса,

⁵² Екха́тыр, сыр фэ́ни якх марэла, ке́ли башавэла палатуно́ ро́го (горно), мулэ́ отджидёна, соб (кай) ние́кхвар буты́р тэ на мэрэ́н, а амэ сарэ́ парудёваса.

⁵³ Пал-дова́ со дова́, со кирнёла, исын банго́ (мусинэла) тэ парудёл дро дова́, со на кирнёла, и дава́, со мэрэ́ла, банго́ тэ парудёл дро дова́, со на мэрэ́ла.

⁵⁴ А ке́ли дава́, со кирнёла, парудёла дро дова́, со на кирнёла; и дава́, со мэрэ́ла, парудёла дро дова́, со на мэрэ́ла, тэды кэрэ́лапэ кэ ко́нцо/яго́ро (сполнинэлапэ) зачхиндло́ лав: “Збердыма (победа) пиризорьякирэла мэрибэ́н.”

⁵⁵ Кай исын тыри́ дукх, мэрибэ́н? Мэрибэ́н, кай исын тыри́ збердыма?

⁵⁶ Мэрибэ́н лэ́ла дукх грэхостыр, а грэ́хо лэ́ла зор Законо́стыр;

⁵⁷ нэ парик Дэвлэ́скэ, Саво́ дыя́ збердыма амэ́нгэ пир амарэ́ Растэ-Дэвлэ́стэ, Исусо́стэ Христосо́стэ.

⁵⁸ Адя́кэ, мирэ́ дро́га пшала́лэ, явэ́н зоралэ́ дро ду́хо (фа́но) тумаро́, на кунинэнпэ, усады (сак) (всегда) кэрэ́н миштэ́с Ра́скирэ Дэвлэ́скири буты́, пал-дова́ со тумэ́ джинэ́на, со тумари́ буты́ на ивья́ (напра́снэс).