1 Коринфянэнгэ 14 - Библия - Пэ Балтитко Романи чиб (Романэс) 2019

Ишчо́ пал Духо́скирэ Тала́ны

¹ Мэк тумари́ пшалы́тко паты́в кэ мануша́ тэ пиризорьякирэл саро́, и отдэ́н пэ́скиро ило́ зэвлыныпныткэс (ревноснэс) ваш Духо́скирэ таланы, нэ буты́р пал дова́, соб (кай) тумэ́нгэ тэ ангилпхэнэн.

² Пал-дова́ со одова́ ману́ш, кон ракирэ́ла пэ наджиндлы чиб, ёв ракирэ́ла на манушэ́нгэ, а Дэвлэ́скэ, пал-дова́ со ние́кх на ґалёла лэс, ёв ракирэ́ла пал чораханэ чачипэна́ Духо́скирэ зорья́са.

³ Нэ одова́, кон роспхэнэ́ла Дэвлэ́скиро лав, одова́ ману́ш подрикирэ́ла манушэ́н дро патяибэ́н, дэ́ла лэ́нгэ тва́рдыма дро ило́, дэ́ла рама́нё (миро) манушэ́скирэ Духоскэ.

⁴ Одова́, кон ракирэ́ла пэ наджиндлы чиб, подрикирэ́ла пэс дро патяибэ́н; а одова́, кон роспхэнэ́ла Дэвлэ́скиро лав, подрикирэ́ла Кхангирья́киро скэдыибэ́н.

⁵ Мэ кама́м, соб (кай) тумэ́ тэ ракирэ́н пэ наджиндлэ чиба́ (чибья́), нэ буты́р, соб (кай) тумэ́ тэ ангилпхэнэн (тэ роспхэнэ́н) Дэвлэ́скиро лав. Ману́ш, кон ангилпхэнэла (пророчынэла) Дэвлэ́скиро лав, янэ́ла буты́р лачхипэ́н манушэ́нгэ, сыр кодова́, саво́ ракирэ́ла пэ наджиндлэ чиба́, ко́ли ёв на пирипхэнэла, со сыс пхэндло́, соб (кай) тэ подрикирэ́л Кхангирья́киро скэдыибэ́н дро патяибэ́н.

⁶ И, ґа́да, пша́ла, ко́ли мэ ява́ва кэ тумэ́ и ява́ва тэ ракира́в пэ наджиндлэ чиба́ (чибья́), саво́ лачхипэ́н явэ́ла тумэ́нгэ, ко́ли мэ на роспхэнава тумэ́нгэ сыкадыибэн Дэвлэ́стыр, ци джиныбэ́н, ци роспхэнава Дэвлэ́скиро лав/сыклякирибэ́н?

⁷ Аж башаибнытка струме́нты, ци дава́ исын свироль, ци дава́ исын арфа, савэ́ндэ нанэ джиибна́скиро ду́хо (фа́но), ко́ли ёнэ на явэ́на тэ дэн я́снэс то́но, кон да ґалёла, со ёнэ башавэна?

⁸ Палдава́ адя́кэ-паць исын рогоса (трубаса); ко́ли ёй башавэла, со нико́н на ґалёла, тэды кон халадэндыр (рулдэндыр) явэ́ла тэ кэдэлпэ пэ марибэ́н?

⁹ Тэды адя́кэ-паць исын наджиндлэ чиба́са (чибьяса): ко́ли тумэ́ на пхэнэ́на адя́кэ, соб (кай) мануша́ тэ ґалён, тэды кон ґалёла, со исын пхэндло́ пэ наджиндлы́ чиб? Дава́ тумэ́ явэ́на тэ ракирэ́н сы́рбы пэ балваля.

¹⁰ Ѓа́да, кицы́ исын бут манушы́тка лава́ дро свэ́то, и со дро екх лав исын пэ́скиро ґалыибэ́н.

¹¹ Палдава́, ко́ли мэ на ґалёвавас чибакирэ лава́; пэ сави́ ракирэ́на, тэды мэ сом явирэ́-пхувья́киро ману́ш ваш кодолэ́ манушэ́скэ, саво́ ракирэ́ла, и ёв адя́кэ-паць исын сы́рбы явирэ́-пхувья́киро ману́ш ваш ма́нгэ.

¹² Пал-дова́ со тумэ́ адя́кэ-паць отдэна пэ́скиро ило́ Дэвлэ́скирэ таланэ́нгэ, соб (кай) тумэ́ тэ лэн лачхипэ́н лэ́ндыр тэ подрикирэ́л Кхангирья́киро скэдыибэ́н.

¹³ Палдава́ одова́ ману́ш, кон ракирэ́ла пэ наджиндлы чиб, мэк ёв тэ мангэ́лпэ Дэвлэ́скэ пал тала́но тэ пирипхэнэл.

¹⁴ Пал-дова́ со, ко́ли мэ мангавапэ Дэвлэ́скэ пэ наджиндлы чиб, миро ду́хо (фа́но) мангэлапэ, нэ тэды мири́ годы́ ячэ́лапэ би бутякиро.

¹⁵ Со ж тэды? Мэ ява́ва тэ мангавпэ Дэвлэ́скэ Свэнтонэ́ Духо́са, нэ мэ адя́кэ-паць ява́ва тэ мангавпэ Дэвлэ́скэ годя́са; мэ ява́ва тэ бага́в Свэнтонэ́ Духо́са, нэ мэ адя́кэ-паць ява́ва тэ бага́в годя́са.

¹⁶ Тэды, ко́ли ту явэ́са тэ барьякирэс Дэвлэ́с Духо́са, сыр просто ману́ш, конэ́стэ нанэ тала́но и саво́ исын тэрдо́ пэ скэдыибэ́н, пхэнэ́ла “ами́нь” пэ тыро́ бахтякирибэ́н, пал-дова́ со ёв на ґалёла, со ту ракирэ́са?

¹⁷ Палдава́, мэк ту и бахтякирэса Дэвлэ́с лачхэ́с, нэ ту на подрикирэса явирэ манушэ́н дро патяибэ́н.

¹⁸ Мэ парикирава Дэвлэ́скэ, со мэ ракира́ва пэ наджиндлэ чиба́ (чибья́) буты́р, сыр кажно тумэ́ндыр:

¹⁹ нэ пэ Кхангирья́киро скэдыибэ́н мэ кама́м тэ пхэна́в пандж лава́ мирэ́ годя́са тэ сыклякирав адя́кэ-паць явирэ манушэ́н, сыр мэ пхэна́ва дэш тысёнцы лава́ пэ наджиндлэ чиба́ (чибья́).

²⁰ Пшала́лэ! На явэ́н чхаворэ́нца пир пэ́скири годы́, а явэ́н чхаворэнца пэ холы́: нэ явэ́н барэ́ манушэ́нца дрэ пэ́скири годы́.

²¹ Исын чхиндло́ дро Зако́но: “Мэ ява́ва тэ ракира́в адалэ́ манушэ́нца пэ яви́р чиба́ (чибья́) и явирэ уштэ́нца, нэ и тэды ёнэ на явэ́на тэ кандэ́н Ман, ракирэ́ла Рай Дэвэ́л.”

²² Палдава́, тала́но тэ ракирэ́н пэ явирэ чиба́ (чибья́) дава́ исын допхэныбэ́н на патяибнаскирэнгэ, а одолэ́нгэ, кон на патя́ла; нэ ангилпхэныбэ́н Дэвлэ́скиро исын на ваш напатяибнаскирэнгэ, а одолэ́нгэ, кон патя́ла.

²³ Ко́ли тэды саро́ Кхангирья́киро скэдыибэ́н скэдэлапэ кхэтанэ́ пэ екх штэ́то и сарэ́ явэ́на тэ ракирэ́н наджиндлэ чибэнца (чибьенца), и заджа́на проста мануша́, напатяибнаскирэ, ци на пхэнэ́на ёнэ, со тумэ́ здылнандынэ.

²⁴ Нэ ко́ли тумэ́ сарэ́ ангилпхэнэна Дэвлэ́скиро лав, и заджа́ла просто ману́ш ци напатяибнаскиро, тэды сарэ́ мануша́ сы́рбы сыкавэ́на и сэндинэна лэ́скиро грэ́хо;

²⁵ и лэ́скирэ-илэ́скирэ гарадэ́ ду́мы откэрэнапэ пэ якха́, и ёв пэрэ́ла тэлэ́ мо́са, и пхэнэ́ла маму́й “Чачэс, исын Дэвэ́л тумэ́нца.”

Ла́до дрэ Кхангири́

²⁶ Со ж тэды, пшала́лэ? Ке́ли тумэ́ могинэ́на тэ скэдэ́нпэ кхэтанэ́, кажнонэ́ манушэ́стэ исын, ци пэ́скиро пса́лмо, ци сыклякирибэ́н, ци сыкадыипэн (откэрибэн) Дэвлэ́стыр, ци тэ пирипхэнэл дова́, со исын пхэндло́ пэ наджиндлы чиб, мэк саро́ дава́ тэ явэ́л, соб (кай) тэ подрикирэн патяибнаскирэн дро патяибэ́н.

²⁷ Ко́ли вари-кон ракирэ́ла пэ наджиндлы чиб, мэк дуйджинэ́ тэ ракирэ́н, а тринджинэ ужэ бут, нэ кажно ману́ш пир екх, а яви́р ману́ш тэ пирилыджал (тэ пиричхувэл);

²⁸ а ко́ли нанэ пирилыджаибнаскиро, то тэ бэшэ́л одова́ ману́ш штыл пэ Кхангирья́киро скэдыибэ́н, и тэ ракирэ́л пэ́скэ и Дэвлэ́скэ.

²⁹ Мэк проро́ки тэ ракирэ́н дуй ци трин, а мэк яви́р мануша́ тэ роскэдэнпэ, со ёнэ ракирэ́на.

³⁰ А ко́ли явирэ манушэ́стэ, кон исын бэшто́ пэ скэдыибэ́н, явэ́ла сыкадыипэн тэ пхэнэ́л лав Дэвлэ́стыр, тэды одова́, саво́ ракирэ́ла, мэк ёв тэ бэшэ́л штыл.

³¹ Палдава́ тумэ́ сарэ́ могинэ́на тэ ангилпхэнэн ваш дова́, соб (кай) тумэ́ сарэ́ тэ сыклён и тэ дорэсэн подрикирибэ́н дро патяибэ́н.

³² И пророкэ́нгирэ ду́хи кандэ́на пророкэ́н.

³³ Пал-дова́ со Дэвэ́л на прилэ́ла бизладо, а прилэ́ла рама́нё (миро), сыр дава́ исын пир сарэ́ Кхангирья́кирэ скэдыибэна.

³⁴ Мэк тумарэ́ джувля́ тэ явэ́н штыл пэ Кхангирья́киро скэдыибэ́н, пал-дова́ со нашты́ тэ ракирэ́н лэ́нгэ, пал-дова́ со лэ́нгэ трэй тэ кандэ́н пэ́скирэ ромэн, адя́кэ сыр исын пхэндло́ дро Зако́но.

³⁵ А ко́ли ёнэ камэ́на тэ сыклён, тэды мэк ёнэ тэ пхучэ́н пэ́скирэ ромэндыр кхэрэ́; пал-дова́ со дава́ ладжаипэ́н ваш джувля́кэ тэ ракирэ́л пэ Кхангирья́киро скэдыибэ́н.

³⁶ Ци выгия́ тумэ́ндыр Дэвлэ́скиро лав, ци ёв догия́ фэ́ни (то́ка) кэ тумэ́?

³⁷ Ко́ли вари-кон гинэ́ла пэс пал пророкостэ, ци лэ́стэ исын вари-саво́ Духоскиро тала́но, мэк ёв тэ ґалёл, со дова́, со мэ чхина́ва тумэ́нгэ, исын Ра́скирэ-Дэвлэ́скирэ припхэныбэна́.

³⁸ А ко́ли вари-кон лэн на прилэ́ла, мэк ёв тэ на ґалёл.

³⁹ Палдава́, пшала́лэ, отдэ́н пэ́скиро ило́ ваш дова́, соб (кай) тэ ангилпхэнэн Дэвлэ́скиро лав, нэ на запхэнэн тэ ракирэ́н наджиндлэ чибэнца (чибьенца).

⁴⁰ Нэ мэк саро́ тэ явэ́л патывалэс и адя́кэ-паць сыр исын прилыно, тэ явэ́л пэ Кхангирья́киро скэдыибэ́н.