1 Коринфянэнгэ 13 - Библия - Пэ Балтитко Романи чиб (Романэс) 2019

Ла́ска / Пшалы́тко Паты́в кэ Яви́р Мануша́

¹ Ко́ли мэ ракира́ва манушытконэ́, ци Янголытконэ чибэнца (чибьенца), нэ ма́ндэ нанэ пшалы́тко паты́в кэ яви́р мануша́, тэды миро ракирибэ́н исын сы́рбы харко́ма (медь), со кудунякирэла (звенинэла), ци кимвало, со дэ́ла зан.

² И ко́ли ма́ндэ исын тала́но тэ ангилпхэнав, и мэ джино́м сарэ́ чораханыбэна и ма́ндэ сыс джиныбэ́н и дасаво патяибэ́н, со мэ могинав тэ пирикхара́в (пиричхува́в) бэ́рги, а ма́ндэ нанэ пшалы́тко паты́в, тэды мэ сом нико́н.

³ И ко́ли мэ роздава саро́ миро миштыпэ́н и отда́ва мирэ́ маса́ пэ яг, а ма́ндэ нанэ пшалы́тко паты́в – нанэ ма́нгэ ни саво́ лачхипэ́н далэ́стыр.

⁴ Пшалы́тко паты́в бут вырикирэ́ла и исын лачхо́; пшалы́тко паты́в на дэ́ла якхало; пшалы́тко паты́в на задэлапэ и на пхутёла;

⁵ Пшалы́тко паты́в на халапэ, на родэ́ла льго́та пэ́скэ, на холясо́ла, на думинэ́ла фуипэ́н;

⁶ пшалы́тко паты́в на радынэ́лапэ начачипастыр, а радынэ́лапэ пал чачипэ́н;

⁷ саро́ пирилыджала, патя́ла сарэскэ, ужакирэ́ла лачхипэ́н дро саро́, затэрдёла пал саро́.

⁸ Пшалы́тко паты́в исын ве́чно, мэк ангилпхэныбэ́н тэ кончынэлпэ, мэк чиба́ (чибья́) тэ явэ́н штыл (циха), мэк джиныбэ́н тэ проджал.

⁹ Пал-дова́ со амэ на́бут джина́са и на́бут ангилпхэнаса:

¹⁰ а ке́ли дова́, со исын бидошакиро явэ́ла, тэды кодова́, со исын на́бут, пириячэ́ла тэ явэ́л.

¹¹ Ке́ли мэ со́мас бия́то, мэ ракирдём сыр бия́то, мэ думиндём пэ́скэ сыр бия́то, мэ ґалёвавас сыр бия́то; ке́ли мэ яцём барэ́ манушэ́са, мэ буты́р на сом бия́то ни дро со.

¹² Пал-дова́ со амэ какана́ дыкхаса сы́рбы пир на́лачхо гиндало, а тэды амэ ява́са тэ дыкхас муй кэ муй; какана́ мэ джино́м на́бут, тэды мэ ява́ва тэ джина́в ада́кицы, пэ кицы́ Рай Дэвэ́л джинэ́ла ман.

¹³ Какана́ ячэ́напэ трин чачипэна́: патяибэ́н, лачхо́ ужакирибэ́н, пшалы́тко паты́в (ла́ска); и пшалы́тко паты́в исын най барэды́р сарэ́стыр.