1 Коринфянэнгэ 12 - Библия - Пэ Балтитко Романи чиб (Романэс) 2019

Свэнтонэ́-Духо́скирэ Тала́ны

¹ Мэ на кама́м тэ ячкирав, пшала́лэ, тумэн дро наджиныбэн пал таланы, савэ́ исын Свэнтонэ́ Духо́стыр.

² Тумэ́ джинэ́на, со анги́л дова́, сыр тумэ́ ячнэ́ тэ патя́н Христосо́скэ, тумэ́ псирдэ́ екхэ́ немонэ́ идоло́стыр кэ яви́р, савэ́ сы́рбы лыджинэ́ тумэн.

³ Палдава́ мэ упхэнава тумэ́нгэ, со ние́кх, кон ракирэ́ла Дэвлэ́скирэ Духо́са, на пхэнэ́ла кошыбэ́н пэ Христосо́стэ; адя́кэ-паць и ние́кх на пхэнэ́ла “Рай Дэвэ́л Ису́со”, ко́ли ёв на кэрэ́ла дава́ Свэнтонэ́ Духо́скирэ зорья́са.

⁴ Нэ исын ра́зна Духо́скирэ таланы (даровании), а исын екх Свэ́нто Ду́хо (Фа́но), Саво́ дэ́ла далэ́ таланы;

⁵ исын ра́зна служэ́нии (дынарибэна́) Дэвлэ́скэ, а исын екх Рай Дэвэ́л;

⁶ исын ра́зна саштыпэна (возможности) тэ дынаринэ́н, а исын кадава́-паць екх Дэвэ́л, Саво́ хулаинэла пир саро́ и пэ сарэ́ндэ.

⁷ Нэ Ду́хо (Фа́но) сыкавэ́ла пэс разнэс пир кажнонэ́ манушэ́стэ ваш сарэнгири льго́та.

⁸ Екхэ манушэ́скэ Ду́хо (Фа́но) дэ́ла тала́но тэ пхэнэ́л годьваро́ лав, и дава́-паць Ду́хо (Фа́но) дэ́ла явирэ манушэ́скэ тэ джинэ́л лав.

⁹ А явирэ манушэ́скэ дэ́лапэ далэ́-паць Духо́са патяибэ́н, а явирэ манушэ́скэ Ду́хо (Фа́но) дэ́ла тала́но тэ высастякирэл;

¹⁰ а явирэ манушэ́скэ тэ кэрэ́л ди́вы, явирэ-манушэ́скэ тэ ангилпхэнэн, явирэ манушэ́скэ тэ ґалёл рознь машки́р лачхэ́ и налачхэ́ ду́хи, явирэ манушэ́скэ тала́но тэ ракирэ́л пэ наджиндлэ чиба́ (чибья́), и явирэ манушэ́скэ тала́но тэ пирипхэнэл, со ракирлапэ пэ чиба́ (чибья́).

¹¹ Дава́ исын екх и дава́-паць Ду́хо (Фа́но) кэрэ́ла саро́ дава́; Ёв дэ́ла разно тала́но кажнонэ́ манушэ́скэ, сыр Ёв Кокоро́ выкэдэ́ла.

Екх Маса́, Бут Паша́

¹² Палдава́, сыр исын екх ману́ш, лэ́стэ исын ра́зна паша́, нэ сарэ́ паша́ исын екхэ манушэ́скирэ, мэк лэн исын бут, и ёнэ кэдэнапэ дро екх маса́, – адя́кэ-паць Христо́со исын сы́рбы Екх.

¹³ Пал-дова́ со амэ болдямпэ екхэ Духо́са дро екх маса́, – Юды ци Гре́ки (Баламэ́), – писха́рья ци вольна мануша́, и сарэ́нгэ амэ́нгэ сыс дыно́ тэ прилас екх Ду́хо (Фа́но).

¹⁴ Маса́ исын на екхэ пашатыр (пашэстыр), а бутэндыр.

¹⁵ Ко́ли ґэро́й пхэнэ́ла: “Мэ на сом далэ́ масэ́ндыр, пал-дова́ со мэ на сом васт”; тэ́ньчи нау́што ёй нанэ масэнгири паш?

¹⁶ И ко́ли кан пхэнэ́ла: “Мэ на сом далэ́ масэ́ндыр, пал-дова́ со мэ на сом якх”, тэ́ньчи, нау́што ёв нанэ масэнгири паш?

¹⁷ Ко́ли сарэ́ маса́ исын сы́рбы екх якх, кай жа исын шуныбэ́н? Ко́ли сарэ́ маса́ исын сы́рбы екх шуныбэ́н, кай жа исын сунгипэн (обоняниё)?

¹⁸ Дыкхэ́н, сыр Дэвэ́л росчхудя́ кажно разно паш пэ маса́ пэ пэ́скиро штэ́то, сыр Лэ́скэ трэиндя́.

¹⁹ Ко́ли амэ явасас сы́рбы екх паш, савэ́ бы явэ́лас цэ́ла тэды маса́?

²⁰ Нэ какана́ исын бут паша́, а исын екх мануша́.

²¹ Якх на могинэ́ла тэ пхэнэ́л вастэскэ: “Ту на трэй ма́нгэ”; ци адя́кэ-паць шэро́ ґэрэнгэ: “Тумэ́ на трэй ма́нгэ.”

²² Дава́ исын на адя́кэ: масэнгирэ паша́, савэ́ сыкадёна сы́рбы бизорья́кирэ, буты́р трэй;

²³ и долэ́ масэнгири паша́, савэ́ амэ кутякираса буты́р, пал лэ́ндэ амэ дыкхаса буты́р; и на́гожа амарэ́ паша́ амэ зачхакираса буты́р лэн, соб (кай) ёнэ тэ на явэ́н бицялэ;

²⁴ а амарэ́ гожонэ пашэнгэ дава́ на трэй. Но Дэвэ́л адя́кэ чхудя́ кхэтанэ́ маса́, соб (кай) амэ тэ дыкхас буты́р пал долэ́ паша́, савэ́нгэ дава́ трэй;

²⁵ соб (кай) тэ ячэ́лпэ екхипэ́н дрэ маса́, и, соб (кай) сарэ́ паша́ тэ дыкхэ́н екх пал екхэ́стэ, адя́кэ-паць, сыр пал пэ́стэ.

²⁶ И ко́ли екх паш мэнчынэлапэ, сарэ́ паша́ мэнчынэнапэ кхэтанэ́ ла́са; и ко́ли шарэна екх паш, сарэ́ паша́ радынэ́напэ ла́са.

²⁷ Кажно тумэ́ндыр кхэтанэ́ исын Христосо́скирэ Маса́ и кажно тумэ́ндыр исын паш далэ́ Масэнгири.

²⁸ И Дэвэ́л чхудя́ сарэ́н пэ пэ́скиро штэ́то дрэ кхангири́: Апостолэн пэ пэ́рво штэ́то, пророкэ́н пэ яви́р штэ́то, сыклякирибнаскирэн пэ три́то штэ́то; тэды Ёв дыя́ зор явирэ́нгэ тэ кэрэ́н ди́вы; адя́кэ-паць таланы тэ састякирэн, тэ помогинэн; тэ хулаинэн; тэ ракирэ́н пэ наджиндлэ чиба́ (чибья́).

²⁹ Ци сарэ́ ёнэ исын апостолы, ци проро́ки, ци сыклякирибнаскирэ на сарэ́ могинэ́на тэ кэрэ́н ди́вы;

³⁰ ци тэ састякирэн, ци тэ ракирэ́н пэ наджиндлэ чиба́ (чибья́), ци тэ пирипхэнэн, со дава́ ракирлапэ пэ далэ́ чиба́ (чибья́)?

³¹ Отдэ́н пэ́скиро ило́ ваш барэ́ таланы, и мэ сыкава́ва тумэ́нгэ най фэдыдыр дром кэ дава́.