1 Коринфянэнгэ 10 - Библия - Пэ Балтитко Романи чиб (Романэс) 2019

Приракхибэ́н Про́ти И́долы

¹ Мэ на кама́м, пшала́лэ, тэ ячкирав тумэн дро наджиныбэн, со сарэ́ амарэ́ дада́ сыс тэл о́блоко (синэпо), и сарэ́ прогинэ́ пир мо́рё (дэрья́в);

² и сарэ́ болдэпэ сыр Мойза́скирэ сыкляибны́тка дро о́блоко и дро мо́рё (дэрья́в);

³ и сарэ́ ханэ́ екх Духоскиро маро́,

⁴ и сарэ́ пинэ́ екх Духоскиро пибэ́н, пал-дова́ со сарэ́ пинэ́ екхэ Духо́скирэ бэрга́тыр: дая́ бэ́рга сыс Христо́со;

⁵ нэ на сарэ́ сыс лачхэ́ Дэвлэ́скэ, палдава́ лэ́нгирэ тру́пы сыс росчхурдынэ пир чхучи́ пхув.

⁶ Нэ амэ́нгэ трэй тэ сыклёвас сарэ́стыр далэ́стыр, соб (кай) амэ тэ на явас ґалка (жадна) пэ налачхэ́ рэ́нды, сыр ёнэ сыс.

⁷ Адя́кэ-паць тумэ́ тэ на мангэ́нпэ идолэ́нгэ, сыр вари-савэ́ лэ́ндыр; сыр исын чхиндло́: “Мануша́ бэшнэ́ тэ хан и тэ пьен, и уштынэ́ тэ кхэлэн.”

⁸ И на ява́са тэ кэра́с биладжаипэ́н, сыр вари-савэ́ лэ́ндыр кэрдэ́, и биш тэ трин тысёнцы лэн хасинэ́ пал екх дывэ́с.

⁹ И на ява́са тэ пропатякирас Рас-Дэвлэ́с, сыр вари-савэ́ лэ́ндыр кэрдэ́, и ёнэ хасинэ́ сапэндыр.

¹⁰ И на ракирэ́н холя́са, сыр вари-савэ́ лэ́ндыр кэрдэ́, и ёнэ хасинэ́ Марибнытконэ́ Янголостыр.

¹¹ Дава́ саро́ сыс лэ́нца, соб (кай) мануша́ тэ сыклён, и дава́ сыс чхиндло́ сыр приракхибэн ваш амэ́нгэ, савэ́ дживэ́на дро палатуно́ часо.

¹² Кон думинэ́ла, со ёв исын тэрдо́ твардэс, мэк тэ ракхэлпэ, соб (кай) лэ́скэ тэ на пэрэ́л дро грэ́хо.

¹³ Тумэ́ пынэ́ тэл дасаво пропатякирибэн сыр и сарэ́ мануша́; нэ Дэвэ́л исын патяибны́тко, и Ёв на домэкэла, соб (кай) тумэн тэ пропатякирэн буты́р тумарэ́ зорья́тыр тэ пирилыджан; а ке́ли явэ́ла пропатякирибэн, Дэвэ́л дэ́ла зор тумэ́нгэ, соб (кай) тумэ́ могиндлэ́ тэ пирилыджан лэс.

¹⁴ Палдава́, мирэ́ дро́га пшала́лэ, нашэ́н криг мангипнастыр идолэ́нгэ.

¹⁵ Мэ ракира́ва тумэ́нгэ, годьварэ́ манушэ́нгэ; тумэ́ ж кокорэ́ сэндинэ́н, палсо́ мэ адя́кэ ракира́ва.

¹⁶ Бахтякирдо́ тахта́й (чаша), пал саво́ амэ парикираса Дэвлэ́скэ, ци дава́ нанэ чачипэ́н; со амэ кхэтанякирасапэ пашэнца Христосо́скирэ Ратэ́са? Маро, саво́ амэ пхагираса, ци дава́ нанэ чачипэ́н, со амэ кхэтанякирасапэ пашэнца Христосо́скирэ Масэнца.

¹⁷ Пал-дова́ со амэ сам бут, нэ амэ сам сы́рбы екх лабо маро́, сы́рбы екх маса́; пал-дова́ со исын екх лабо маро́, савэ́стыр амэ сарэ́ ла́са пэ́скирэ паша́.

¹⁸ Дыкхэ́н пэ Израилёскиро манушэ́ндэ: ци нанэ ёнэ одолэ́ мануша́, кон ха́ла свэ́нто дыибэ́н, и саво́ лэ́ла пэ́скири паш алтарёстыр?

¹⁹ Со тэды мэ пхэна́ва? Ци дова́, со идоло исын мол вари-со? Ци свэ́нто дыибэ́н идолоскэ исын мол вари-со?

²⁰ Над. А дова́, со ке́ли На́юды янэ́на лэ́нгирэ свэ́нта дыибэна́, ёнэ янэ́на лэн налачхэ́ духэнгэ, а на Дэвлэ́скэ. Нэ мэ кама́м, соб (кай) тумэ́ тэ на кхэтанякирэнпэ пашэнца налачхэ́ духэнца.

²¹ Тумэ́ на могинэ́на тэ пьен Ра́скирэ-Дэвлэ́скиро тахта́й, и налачхэ́-духэнгиро тахта́й: тумэ́ на могинэ́на тэ лэн паша́ Ра́скирэ-Дэвлэ́скирэ скаминдэстыр и налачхэ́-духэнгирэ скаминдэстыр.

²² Нау́што амэ ява́са тэ муршкинаспэ тэ холякирас Дэвлэ́с? Нау́што амэ сам зоралэды́р Лэ́стыр?

²³ Саро́ сашты́ (можна), нэ на саро́ кэ лачхипэ́н амэ́нгэ; саро́ сашты́, нэ на саро́ кэ подрикирибэ́н дро патяибэ́н.

²⁴ Мэк ние́кх ману́ш тэ на родэ́л бахт екх пэ́скэ, а мэк кажно ману́ш тэ родэ́л бахт ваш явирэскэ.

²⁵ Саро́, со мануша́ бикнэна пэ тарги, сашты́ тэ хан, на пхучэ́н нисо́, и на издран ладжатыр.

²⁶ Пал-дова́ со пхув исын Дэвлэ́скири и саро́, со исын пэ пхув, исын Дэвлэ́скиро.

²⁷ Нэ ко́ли вари-саво́ напатяибнаскиро кхарэ́ла тумэн кэ пэ, и тумэ́ камэ́на тэ джа́н, хан саро́, со исын чхудо анги́л тумэ́ндэ, на пхучэ́н нисо́ и на издран ладжатыр.

²⁸ Нэ ко́ли вари-кон пхэнэ́ла тумэ́нгэ: ґа́да, исын яндло сыр свэ́нто дыибэ́н, на хан ваш одолэ́ манушэ́скэ, саво́ пхэндя́ дава́ лав тумэ́нгэ, соб (кай) адалэ́ манушэскири ладж тэ явэ́л штыл;

²⁹ мэ ракира́ва дава́ на пал тумари́ ладж, а пал дая́ манушэскири ладж: со́скэ явирэ манушэскири ладж явэ́ла тэ сэндякирэ́л мири́ вольныма?

³⁰ Ко́ли мэ ла́ва хабэ́н парикирибнаса, палсо́ тэ ракирэ́н чорипэ́н пал ма́ндэ, пал дова́ со мэ парикирава.

³¹ Палдава́, ко́ли тумэ́ вари-со ха́на, ци пьена, ци кэрэ́на вари-со, саро́ дава́ кэрэ́н адя́кэ, соб (кай) тэ барьякирэ́н кэ вучипэ́н Дэвлэ́с.

³² На чхувэ́н бар пэ дром сыр Юдэ́нгэ, адя́кэ-паць и Грекэ́нгэ (Баламэ́нгэ), и Дэвлэ́скирэ кхангирьякэ.

³³ Адя́кэ-паць сыр и мэ кэра́ва, со исын зор, тэ явав лачхо́ сарэ́нгэ дро саро́; и мэ на родава льго́та пэ́скэ, а лачхипэ́н сарэ́нгэ, соб (кай) ёнэ тэ зракхэнпэ.