1 Коринфянэнгэ 1 - Библия - Пэ Балтитко Романи чиб (Романэс) 2019

¹ Павли́стыр, савэ́с Дэвэ́л прикхардя тэ явэ́л Исусо́скирэ Христосо́скирэ Апостолоса пир Пэ́скири во́ля, и амарэ́ пшалэстыр Сосифаностыр,

² Дэвлэ́скирэ кхангирьякэ, со исын дро Коринфо, сарэ́ свэнтонэ́ манушэ́нгэ, савэ́ исын прикхардэ тэ ячэн и тэ явэ́н Дэвлэ́скирэ манушэ́нца пир патяибэ́н дрэ Исусо́стэ Христосо́стэ; сарэ́нгэ, кон мангэлапэ Исусо́скирэ Христосо́скирэ лавэ́са пир сарэ́ штэ́ты, Саво́ исын лэ́нгиро и амаро́ Рай Дэвэ́л:

³ Мэк Дэвэ́л Дад амаро́ и Рай Дэвэ́л, Ису́со Христо́со, тэ дэн тумэ́нгэ бахталыпэ́н и рама́нё (миро).

Бахтякирибэна́ пир Христосо́стэ

⁴ Мэ ўса́ды (сак) парикирава Дэвлэ́скэ пал тумэ́ндэ пал бахталыпэ́н, саво́ исын дыно́ тумэ́нгэ пир Исусо́стэ Христосо́стэ.

⁵ Пал-дова́ со пал Лэ́стэ тумэ́ барвалынэ кажнонэ́ лавэ́са и джиныбнаса,

⁶ и пал-дова́ сыр амаро́ допхэныбэ́н пал Христосо́стэ яця́ дасаво твардо дрэ тумэ́ндэ,

⁷ палдава́ тумэ́ндэ нанэ ни саво́ наухтылыбэн ни дро вари-саво́ тала́но (дарованиё), ке́ли тумэ́ ужакирэ́на зоралэ́с Христосо́с тэ явэ́л,

⁸ Ёв адя́кэ-паць подрикирэ́ла тумаро́ зорало́ патяибэ́н кэ ко́нцо (кэ яго́ро), соб (кай) тумэ́ тэ явэ́н бидошакирэ дро дывэ́с, ке́ли амаро́ Рай Дэвэ́л, Ису́со Христо́со, явэ́ла яви́р мо́ло.

⁹ Дэвлэ́скэ, Саво́ прикхардя тумэн дро кхэтаныбэн Лэ́скирэ Чхавэ́са, Исусо́са Христосо́са, Амарэ́ Ра́са, трэй тэ патя́н сарэ́са.

¹⁰ Мэ древа́н манга́ва тумэн, мирэ́ пшала́лэ, Исусо́скирэ Христосо́скирэ лавэ́са, амарэ́ Ра́скирэ-Дэвлэ́скирэ, тэ ракирэ́н екх, и тэ на явэ́л тумэ́ндэ ракирибэна екх проти явирэ́стэ, соб (кай) тумэ́ тэ явэ́н кхэтанэ́ дро екх ду́хо (фа́но) и дрэ екх годы́.

¹¹ Пал-дова́ со мэ уджиндём Хлоякирэ сэм΄ятыр, пшала́лэ мирэ́, со машки́р тумэ́ндэ исын кошыбэна.

¹² Мэ пхэна́ва пал дава́ адя́кэ, со тумэ́ ракирэ́на: “Мэ сом Павли́скиро”, “мэ сом Аполососкиро”, “мэ сом Кифаскиро”, нэ “мэ сом Христосо́скиро”;

¹³ со ци роспыяпэ Христо́со пэ групы? Ци Па́вли сыс примардо пэ трушу́л пал тумэ́ндэ? Ци тумэ́ болдэпэ дро Павли́скиро лав?

¹⁴ Мэ парикирава Дэвлэ́скэ пал дова́, со мэ на болдём никонэ́с тумэ́ндыр апри́ч Криспостэ и Гайостэ,

¹⁵ соб (кай) ние́кх ману́ш тэ на пхэнэ́л, со мэ болдём тумэн дро миро лав (мирэ́ лавэ́са).

¹⁶ Мэ болдём адя́кэ-паць Стехванос (Стефанос) и лэ́скирэ сэ́м΄я (ири́), нэ ци мэ болдём ишчо (инкэ́) вари-конэ́с, мэ на джино́м (на джина́в).

¹⁷ Христо́со на бичхадя́ ман тэ болав. Ёв бичхадя́ ман тэ роспхэнав бахталы́ зан (звесь), и тэ роспхэнав пал дава́ назбит годьварэ́ лавэ́нца, соб (кай) Христосо́скиро мэрибэ́н пэ трушу́л тэ на хасякирэ́л пэ́скири зор.

Христо́со исын Дэвлэ́скиро Зор и Годьварипэ́н

¹⁸ Пал-дова́ со лав (сыклякирибэ́н) пал Христосо́скиро мэрибэ́н пэ трушу́л исын дылныпэ́н ваш одолэ́нгэ, кон исын хасибны́тко, а амэ́нгэ, кон исын зракхно, дава́ дэ́ла Дэвлэ́скири зор.

¹⁹ Дро Свэ́нто Чхиныбэ́н ракирлапэ: “Мэ хасякира́ва годьварипэн годьварэнгиро и Мэ отчхувава дрэ риг ґалыибэ́н сыклякирдэнгиро.”

²⁰ Кай исын годьварюко? Кай исын лылвари́тко (кни́жнико)? Кай исын допхэныбнари (споршчыко) дро дава́ ве́ко? А Дэвэ́л пирикэрдя далэ́ свэтоскиро годьварипэн пэ дылныпэ́н.

²¹ Палдава́ Дэвэ́л пир Пэ́скиро годыпэ́н кэрдя́ адя́кэ, соб (кай) мануша́ тэ на ґалён Дэвлэ́с пэ́скирэ годя́са би патяибнаскиро; Дэвлэ́скэ сыс лачхо́ тэ зракхэ́л одолэ́н, савэ́ патя́на, пир пхэныбнытко лав, саво́ исын сы́рбы дылныпэ́н.

²² Палдава́ Юды пхучэна пал шпэ́ры (зна́ки), и Гре́ки (Баламэ́) родэ́на годьварипэн;

²³ нэ амэ роспхэна́са пал Христосо́стэ, Савэс примардэ пэ трушу́л; дава́ пхэныбэ́н исын сы́рбы бар пэ дром, саво́ пропатякирэла Юдэ́н и исын сы́рбы дылныпэ́н ваш Наюдэ́нгэ,

²⁴ нэ Христо́со исын Дэвлэ́скири зор и Дэвлэ́скиро годыпэ́н одолэ́нгэ, савэ́ исын прикхардэ: сыр ваш Юдэ́нгэ, адя́кэ-паць и ваш Грекэ́нгэ (Баламэ́нгэ).

²⁵ Пал-дова́ со Дэвлэ́скиро нагодыпэн исын годьварэдыр манушытконэ́ годьварипнастыр и Дэвлэ́скиро назоралыпэн исын зоралэды́р манушытконэ́ зоралыпнастыр.

²⁶ Палдава́ рипирэ́н, пшала́лэ, кон тумэ́ са́нас анги́л дова́, сыр Дэвэ́л прикхардя тумэн: на́бут тумэ́ндыр са́нас годьварэ́ пир манушы́тко годы́, на́бут тумэ́ндыр са́нас барэ́ мануша́, на́бут тумэ́ндыр са́нас славутнонэ родо́стыр;

²⁷ нэ Дэвэ́л выкэдыя́ пэфроми дова́, со свэ́то гинэ́ла пал дылныпэ́н, соб (кай) тэ ладжакирэл годьварэн, и дова́, со свэ́то гинэ́ла пал назоралыпэн, соб (кай) тэ ладжакирэл зоралыпэ́н,

²⁸ и Дэвэ́л выкэдыя́ буты́р дова́, со свэ́то гинэ́ла пал наджиндлыпэн и дыкхэ́ла вучипна́стыр и гинэ́ла ни палсо́, тэ чхувэ́л тэлэ́ свэтоскиро раипэн,

²⁹ соб (кай) ние́кх ману́ш тэ на шарэлпэ анги́л Дэвлэ́стэ.

³⁰ Нэ адава́ Дэвэ́л чхудя́ тумэн дро кхэтаныпэн Исусо́са Христосо́са амарэса и Ёв кэрдя́ Христосо́с сыр амаро́ годыпэ́н, чачипэ́н; пал Лэ́стэ амэ яця́м Дэвлэ́скирэ свэнтонэ́ и вольнонэ манушэ́нца,

³¹ соб (кай) тэ явэ́л адя́кэ, сыр исын чхиндло́: “Мэк одова́, кон шарэлапэ, тэ шарэлпэ Дэвлэ́са.”