1 Ian 5 - Библия - Пэ Балтитко Романи чиб (Романэс) 2019

Амэ́ Пиризорьякирдя́м Свэ́то

¹ Кажно (сва́ко) ману́ш, кон патя́ла, со Ису́со исын Христо́со (Месия), исын Дэвлэ́скиро чхаво́, и кажно ману́ш, конэ́скэ исын дро́го Дад, лэ́скэ адя́кэ-паць исын дро́го Лэ́скиро Чхаво́.

² Пир дава́ амэ уджинаса, со амэ́нгэ исын дро́га Дэвлэ́скирэ чхавэ́: ко́ли амэ рикираса сыр Дро́гима дро ило́ Дэвлэ́с и кэра́са пир Лэ́скирэ припхэныбэна́.

³ И амари́ паты́в и ило́ кэ Дэвэ́л исын кадасавэ́; соб (кай) амэ тэ ракхас Лэ́скиро припхэныбэ́н. И Лэ́скирэ припхэныбэна́ исын напхарэ.

⁴ Пал-дова́ со кажно ману́ш, кон исын Дэвлэ́скиро чхаво́, пиризорьякирэла свэ́то. И амэ пиризорьякираса дава́ свэ́то амарэ́ патяибна́са.

⁵ Кон исын кодова́, саво́ пиризорьякирэла свэ́то: ґа́да (акэ), исын одова́, кон патя́ла, со Ису́со исын Дэвлэ́скиро Чхаво́.

Допхэныбэ́н пал Исусо́стэ Христосо́стэ

⁶ Дава́ исын Ёв, Ису́со Христо́со, Саво́ явдя́ пане́са, ке́ли Ёв болдяпэ: и ратэ́са, ке́ли Ёв мыя́. Ёв явдя́ на фэ́ни (то́ка) пане́са, нэ пане́са и ратэ́са. И Ду́хо (Фа́но) Кокоро́ допхэнэ́ла пал дава́, пал-дова́ со Ду́хо (Фа́но) исын чачипэ́н.

⁷ Палдава́ исын трин якхи́тка пэ болыбэ́н:

⁸ Дад, Лав и Свэ́нто Ду́хо (Фа́но), и адалэ́ трин исын сыр екх допхэныбэ́н.

⁹ И ко́ли амэ приласа манушы́тко допхэныбэ́н, тэды Дэвлэ́скиро допхэныбэ́н исын зоралэды́р, пал-дова́ со Дэвэ́л допхэнэ́ла пал Пэ́скирэ Чхавэ́стэ.

¹⁰ Кон патя́ла дрэ Дэвлэ́скирэ Чхавэ́стэ, кодолэстэ исын допхэныбэ́н дро пэ́скиро ило́. А кон на патя́ла Дэвлэ́скэ, одова́ кэрдя́ Лэс Хохаибнариса, пал-дова́ со ёв на упатяндыя дро допхэныбэ́н, савэ́са Дэвэ́л допхэнэ́ла пал Пэ́скирэ Чхавэ́стэ.

¹¹ Дава́ допхэныбэ́н исын дро дова́, со Дэвэ́л дыя́ амэ́нгэ ве́чно джиибэ́н и дая́ джиибна́скири ґанынгори исын дрэ Лэ́скирэ Чхавэ́стэ.

¹² Конэ́стэ исын Чхаво́, кодолэстэ исын дава́ джиибэ́н; конэ́стэ нанэ Дэвлэ́скирэ Чхавэ́с, кодолэстэ нанэ джиибэ́н.

Ве́чно Джиибэ́н

¹³ Далэ́ чачипэна́ мэ чхиндём тумэ́нгэ, кон патя́ла дро Дэвлэ́скирэ-Чхавэ́скиро лав, соб (кай) тумэ́ тэ джинэ́н, со тумэ́ндэ исын ве́чно джиибэ́н.

¹⁴ И ґа́да, исын муршыпэн, саво́ исын амэ́ндэ дрэ Дэвлэ́стэ, со ко́ли амэ мангаса вари-со пир Лэ́скири во́ля, Ёв шунэ́ла амэн.

¹⁵ И ко́ли амэ джина́са, со Ёв шунэ́ла амэн, пал со амэ мангаса, амэ джина́са и дова́, со Ёв кандэ́ла амаро́ мангипэ́н, ке́ли амэ мангдям Лэс.

¹⁶ Ко́ли вари-кон бидыкхэла пэ́скирэ пшалэ́с, саво́ кэрэ́ла грэ́хо на кэ мэрибэ́н, мэк ёв тэ мангэ́лпэ Дэвлэ́скэ, и Ёв дэ́ла одолэ́скэ джиибэ́н. Дава́ исын ваш одолэ́нгэ, кон на кэрэ́ла грэ́хо кэ мэрибэ́н. Нэ исын грэ́хо кэ мэрибэ́н: и мэ на ракира́ва пал дава́, соб (кай) ёв тэ мангэ́лпэ Дэвлэ́скэ пал дасаво грэ́хо.

¹⁷ Кажно хохаибэ́н исын грэ́хо, нэ исын грэ́хо, саво́ исын на кэ мэрибэ́н.

¹⁸ Амэ джина́са, со кажно ману́ш, кон исын Дэвлэ́скиро чхаво́, на кэрэ́ла грэ́хи, нэ кон исын Дэвлэ́скиро чхаво́, кодова́ ракхэ́ла пэс, и на́лачхо на чилавэ́ла лэс.

¹⁹ Амэ джина́са, со амэ сам Дэвлэ́скирэ, и со саро́ свэ́то исын тэл налачхэскири зор.

²⁰ Амэ джина́са, со Дэвлэ́скиро Чхаво́ явдя́ и дыя́ амэ́нгэ годы́, соб (кай) амэ тэ уджинас, кон исын чачуно́ Дэвэ́л, и соб (кай) амэ́нгэ тэ явас дро екхипэ́н чачунэ́ Дэвлэ́са, Лэ́скирэ Чхавэ́са, Исусо́са Христосо́са. Дава́ исын чачуно́ Дэвэ́л и ве́чно джиибэ́н.

²¹ Чхаворалэ! Ракхэ́н пэс идолэндыр. Ами́нь.