1 Ian 3 - Библия - Пэ Балтитко Романи чиб (Романэс) 2019

Дэвлэ́скирэ Чхаворэ́

¹ Дыкхэ́н! Сави́ бари ра́дыма дыя́ амэ́нгэ Дад, соб (кай) тэ кхарэ́н амэн Дэвлэ́скирэ чхаворэнца. Палдава́ свэ́то на джинэ́ла тумэн, пал-дова́ со на приґалыя Лэс.

² Дро́га мирэ́! Амэ сам какана́ Дэвлэ́скирэ чхавэ́, нэ ишчо (инкэ́) на сыкадыя́ амэ́нгэ, савэ́ амэ ява́са анги́л. Амэ екх джина́са, со ке́ли Христо́со сыкадёла, амэ ячасапэ кадасавэ́-паць, сыр Ёв исын, пал-дова́ со амэ ява́са тэ дыкхас, саво́ Ёв явэ́ла.

³ И кажно ману́ш, конэ́стэ исын наде́я пэ Лэ́стэ, выжужакирэ́ла (вычыстинэла) пэс, пал-дова́ со Христо́со исын жужо́.

⁴ Кажно (сва́ко) ману́ш, кон кэрэ́ла грэ́хи, кэрэ́ла проти Дэвлэ́скиро Зако́но; и грэ́хо исын дова́, ке́ли пхагирэна Зако́но.

⁵ И тумэ́ джинэ́на, со Ёв явдя́ ваш дова́, соб (кай) тэ лэл амарэ́ грэ́хи, и со нанэ грэ́хо дрэ Лэ́стэ.

⁶ Кажно ману́ш, кон дживэ́ла дро екхипэ́н Исусо́са, на кэрэ́ла грэ́хи, а кажно, кон кэрэ́ла грэ́хи, кодова́ ману́ш на дыкхця́ Лэс и на приґалыя Лэс.

⁷ Бияторалэ! Мэк нико́н тэ на лыджа́л тумэн дро блэ́ндо. Кон кэрэ́ла пир чачипэ́н, одова́ исын кадасаво́ чачуно́, сыр Ёв исын чачуно́.

⁸ Кодова́, кон кэрэ́ла грэ́хи, исын налачхэстыр, пал-дова́ со на́лачхо кэрдя́ грэ́хи англыпна́стыр. Ваш дава́ и явдя́ Дэвлэ́скиро Чхаво́, соб (кай) тэ пхаравэл налачхэскирэ бутя́.

⁹ Кажно ману́ш, саво́ яця́ Дэвлэ́скирэ чхавэ́са, на кэрэ́ла буты́р грэ́хи, пал-дова́ со Дэвлэ́скири зя́рка исын дрэ Лэ́стэ, и ёв на могинэ́ла тэ кэрэ́л грэ́хи, пал-дова́ со Дэвэ́л яця́ лэ́скирэ Дадэ́са.

¹⁰ Ѓа́да, сыр Дэвлэ́скирэ чхавэ́ и налачхэскирэ чхавэ́ исын бицялэ: кажно (сва́ко), кон кэрэ́ла на пир чачипэ́н, одова́ нанэ Дэвлэ́стыр и адя́кэ-паць, сыр кодова́, кон на кэрэ́ла паты́в пэ́скирэ пшалэ́скэ.

¹¹ Палдава́ дасави́ исын мавлы́н (малва), сави́ амэ шундя́м англыпна́стыр, соб (кай) амэ тэ дас паты́в екх екхэ́скэ,

¹² нэ на адя́кэ, сыр Каино, саво́ сыс налачхэстыр и саво́ замардя́ (мулякирдя́) пэ́скирэ пшалэ́с. Пал со ж ёв замардя́ лэс? Пал-дова́ со лэ́скирэ рэ́нды сыс фуй, а лэ́скирэ-пшалэ́скирэ рэ́нды сыс чачунэ́.

¹³ На дивинэн, пша́ла мирэ́, ко́ли мануша́ свэто́стыр явэ́на тэ бидыкхэн (тэ ненавидинэн) тумэн.

¹⁴ Амэ джина́са, со амэ пиригиям мэрибна́стыр дро джиибэ́н, пал-дова́ со амэ даса паты́в пшалэ́нгэ. Кон на дэ́ла паты́в пшалэ́скэ, кодова́ исын ишчо (инкэ́) тэл мэрибнаскири зор.

¹⁵ Кажно (сва́ко) ману́ш, кон на дэ́ла паты́в пэ́скирэ пшалэ́скэ, исын замарибнари (умарибнари), а тумэ́ джинэ́на, со ни екхэ замарибнарискэ на явэ́ла ве́чно джиибэ́н.

¹⁶ Амэ уджинаса пшалы́тко паты́в дро дава́, со Христо́со отдыя́ Пэ́скиро джиибэ́н пал амэ́ндэ; и амэ сам бангэ́ тэ отдас пэ́скиро джиибэ́н пал пшалэ́ндэ.

¹⁷ А ко́ли вари-конэ́стэ исын саро́, со трэй ваш джиибэ́н дро дава́ свэ́то, а ёв дыкхэ́ла, со лэ́скирэ пшалэ́скэ трэй вари-со ваш джиибэ́н и ёв зачхакирэла пэ́скиро ило́ лэ́стыр, тэды сави́ жа исын Дэвлэ́скири ла́ска дрэ Лэ́стэ?

¹⁸ Бияталэ, ява́са тэ дас паты́в на лавэ́са ци чиба́са, а рэндоса (делоса) и чачипна́са.

¹⁹ И пир дава́, сыр амэ кэра́са, амэ уджинаса, со амэ сам чачипнаскирэ и штылякираса амарэ́ илэ анги́л Лэ́стэ;

²⁰ пал-дова́ со, ко́ли амаро́ ило́ ракирэ́ла маму́й проти амэ́ндэ, тэды Дэвэ́л джинэ́ла саро́, пал-дова́ со Ёв исын бутэды́р илэ́стыр, и Ёв джинэ́ла саро́.

²¹ Дро́га мирэ́! Ко́ли амаро́ ило́ на ракирэ́ла маму́й проти амэ́ндэ, тэды амэ́ндэ исын муршыпэн тэ рисёвас кэ Дэвэ́л.

²² И со амэ тэ на помангас Лэ́стыр, явэ́ла дыно́ амэ́нгэ, пал-дова́ со амэ ракхаса Лэ́скирэ припхэныбэна́ и кэра́са дова́, со исын пир ило́ Дэвлэ́скэ.

²³ А припхэныбэ́н Лэ́скиро исын дасаво: соб (кай) амэ тэ патяс дро лав Лэ́скирэ-Чхавэ́скирэ, Исусо́скирэ Христосо́скиро, и соб (кай) тэ дас паты́в екх екхэ́скэ, сыр Ёв припхэндя́ амэ́нгэ.

²⁴ И кон ракхэ́ла Лэ́скирэ припхэныбэна́, одова́ дживэ́ла дро екхипэ́н Лэ́са, и Дэвэ́л исын дро екхипэ́н Лэ́са. И дова́, со Дэвэ́л дживэ́ла дро екхипэ́н Лэ́са, амэ уджинаса пир Ду́хо (Фа́но), Саво́ Ёв дыя́ амэ́нгэ.