1 Ian 2 - Библия - Пэ Балтитко Романи чиб (Романэс) 2019

Христо́со Помогинэ́ла Амэ́нгэ

¹ Чхаворалэ мирэ́! Мэ чхина́ва дава́ тумэ́нгэ, соб (кай) тумэ́ тэ на кэрэ́н грэ́хо, и ко́ли вари-кон кэрэ́ла грэ́хо, амэ́ндэ исын Екх тэ тэрдёл пал амэ́ндэ анги́л Дадэ́стэ-Ису́со Христо́со, Чачипна́скиро;

² и Ёв исын Кодова́, Кон пирилыджия пхарипэ́н кэ мэрибэ́н Пэ́скирэ ратэ́са пал амарэ́ грэ́хи сы́рбы свэ́нто дыибэ́н, и на фэ́ни (то́ка) пал амарэ́, а адя́кэ-паць пал грэ́хи сарэ́ свэто́скирэ.

³ И адя́кэ амэ уджинаса, со амэ джина́са Лэс, ко́ли амэ ракхаса Лэ́скирэ припхэныбэна́.

⁴ Кон ракирэ́ла: “Мэ уджиндём Лэс” и на ракхэ́ла Лэ́скирэ припхэныбэна́, одова́ ману́ш исын хохаибнари, и нанэ нисаво́ чачипэ́н дрэ лэ́стэ;

⁵ а кон ракхэ́ла Лэ́скиро лав, кодолэстэ исын бидошакиры паты́в кэ Дэвэ́л. Адя́кэ амэ уджинаса, со амэ сам дро кхэтаныпэн Дэвлэ́са.

⁶ Кон ракирэ́ла, со ёв дживэ́ла дро екхипэ́н Дэвлэ́са, кодолэ́скэ трэй адя́кэ-паць тэ дживэ́л сыр Христо́со дживдя́.

⁷ Дро́га мирэ́! Мэ чхина́ва на нэво́ припхэныбэ́н тумэ́нгэ, а пхурано́ припхэныбэ́н, саво́ исын тумэ́ндэ англыпна́стыр. Пхурано́ припхэныбэ́н исын лав, саво́ тумэ́ шундлэ́ англыпна́стыр.

⁸ Нэ дава́ исын дава́-паць и нэво́ припхэныбэ́н, со мэ чхина́ва тумэ́нгэ, пал-дова́ со дава́ чачипэ́н сыс бицяло́ и дрэ Христосо́стэ и дрэ тумэ́ндэ: пал-дова́ со калыпэ́н проджа́ла и чачуно́ дуд какана́ хачола.

⁹ Кон ракирэ́ла, со ёв исын дро дуд, а лэ́скэ исын надрого пэ́скиро пшал, одова́ исын ишчо (инкэ́) дро калыпэ́н.

¹⁰ Конэ́скэ исын дро́го лэ́скиро пшал, одова́ ячэ́лапэ дро дуд, и нанэ бар пэ дром лэ́стэ, соб (кай) ёв тэ пэрэ́л дро грэ́хо;

¹¹ а конэ́скэ исын надрого пэ́скиро пшал, одова́ исын дро калыпэ́н, и псирэ́ла дро калыпэ́н, и ёв на джинэ́ла, карик ёв джа́ла, пал-дова́ со калыпэ́н корьякирдя якха́ лэ́скэ.

¹² Мэ чхина́ва тумэ́нгэ, чхаворэ́, пал-дова́ со отмэкнэ тумарэ́ грэ́хи пир Христосо́скиро лав.

¹³ Мэ чхина́ва тумэ́нгэ, дада́, пал-дова́ со тумэ́ прилынэ́ Одолэ́с, Саво́ исын англыпна́стыр. Мэ чхина́ва тумэ́нгэ, тэрнэ́ мануша́лэ, пал-дова́ со тумэ́ пиризорьякирдэ налачхэ́с. Мэ чхина́ва тумэ́нгэ, бияталэ, пал-дова́ со тумэ́ приджиндлэ Дадэ́с.

¹⁴ Мэ чхиндём тумэ́нгэ, дадолэ, пал-дова́ со тумэ́ уджиндлэ́ Одолэ́с, Кон исын усады (сак) англыпна́стыр [Дадэ́стэ-ю.о.]. Мэ чхиндём тумэ́нгэ, тэрнэ́ мануша́лэ, пал-дова́ со тумэ́ сан зоралэ́; и Дэвлэ́скиро лав ячэ́лапэ дрэ тумэ́ндэ и тумэ́ пиризорьякирдэ налачхэ́с.

¹⁵ На дэн паты́в свэтоскэ, и дова́, со исын дро свэ́то: кон дэ́ла паты́в свэтоскэ, кодолэ́ манушэ́скэ исын надрого Дад:

¹⁶ пал-дова́ со саро́, со исын дро свэ́то: лочакиро тырдыпэ́н кэ грэ́хо, грэхоскиро камибэн дрэ якха́, пхутькирибэ́н пэ́скирэ джиибнаса, дава́ саро́ нанэ Дадэ́стыр, а джа́ла свэто́стыр.

¹⁷ Свэ́то проджа́ла и адя́кэ-паць и грэхоскирэ камибэна, нэ одова́, кон кэрэ́ла пир Дэвлэ́скири во́ля, явэ́ла тэ дживэ́л ве́чнэс.

Христосо́скиро Вэ́рго

¹⁸ Тэрнэ́ мануша́лэ! Дава́ исын палатуно́ (последнё) часо. И пал-дова́ со тумэ́ шундлэ́, со явэ́ла антихристо и какана́ явнэ́ пэ якха́ бут антихристы, амэ джина́са далэ́стыр, со явдя́ палатуно́ часо.

¹⁹ Ёнэ выгинэ́ амэ́ндыр, нэ ёнэ на сыс амарэ́; пал-дова́ со, ко́ли ёнэ тэ явэ́н амарэ́, тэды ёнэ ячэнас амэ́нца, нэ ёнэ выгинэ́ амэ́ндыр ваш дова́, соб (кай) тэ явэ́л сыкадо, со ние́кх лэ́ндыр нанэ амаро́.

²⁰ Нэ тумэ́ дорэснэ́ Свэ́нто Ду́хо (Фа́но) Христосостыр, и тумэ́ джинэ́на саро́ чачипэ́н.

²¹ Мэ чхиндём тумэ́нгэ на палдова́ со тумэ́ на джинэ́на чачипэ́н, нэ пал-дова́ со тумэ́ джинэ́на лэс, адя́кэ-паць сыр и дова́, со кажно хохаибэ́н нанэ чачипнастыр.

²² Кон хохавэла? Адава́ исын одова́ ману́ш, кон на приґалёла, со Ису́со исын Христо́со? Дава́ исын антихристо, саво́ на приґалёла ни Дадэ́с, ни Чхавэ́с.

²³ Кажно ману́ш, кон на приґалёла Чхавэ́с, лэ́стэ нанэ и Дадэ́с, а кон приґалёла Чхавэ́с, одолэ́ манушэ́стэ исын и Дад.

²⁴ Тэды тумэ́, со тумэ́ шундлэ́ англыпна́стыр, мэк дова́ тэ явэ́л дрэ тумэ́ндэ; ко́ли явэ́ла дрэ тумэ́ндэ, дова́, со тумэ́ шундлэ́ англыпна́стыр, тэды тумэ́ явэ́на дро екхипэ́н Чхавэ́са и Дадэ́са.

²⁵ И, акэ, исын дова́, пал со Христо́со Кокоро́ дыя́ лав, дава́ исын ве́чно джиибэ́н.

²⁶ Дава́ чхиндём мэ тумэ́нгэ пал одолэ́ндэ, савэ́ камэ́на тэ лыджа́н тумэн дро блэ́ндо:

²⁷ нэ помакхибэн, Свэ́нто Ду́хо (Фа́но), Саво́ тумэ́ дорэснэ́ Христосостыр, ячэ́лапэ дрэ тумэ́ндэ, и тумэ́ндэ нанэ трэ́бима, соб (кай) вари-кон тэ сыклякирэ́л тумэн. И дава́ Свэ́нто Ду́хо (Фа́но) сыклякирэ́ла тумэн, и Ёв сыс чачуно́ и нанэ хохано́. И сыр Свэ́нто Ду́хо (Фа́но) высыклякирдя тумэн, ячэ́нпэ дро екхипэ́н Христосо́са.

²⁸ Ѓа́да, бияты, ячэ́нпэ дро екхипэ́н Христосо́са, соб (кай) Ёв, ке́ли сыкадёла, тэ явэ́л амэ́ндэ зорало́ патяибэ́н и тэ на явэ́л ладжаво анги́л Лэ́стэ, ке́ли Ёв явэ́ла.

²⁹ И ко́ли тумэ́ джинэ́на, со Христо́со исын чачуно́, джинэ́н и дова́, со кажно ману́ш, кон кэрэ́ла пир чачипэ́н, исын Дэвлэ́скиро чхаво́.