1 Ian 1 - Библия - Пэ Балтитко Романи чиб (Романэс) 2019

¹ Пал дова́, со сыс англыпна́стыр, пал дова́, со амэ шундя́м, со дыкхцям пэ́скирэ якхэ́нца, со амэ роздыкхасас, и со чилавэнас амарэ́ васта́, дова́ и амэ пхэнасас пал Джиибна́скиро лав, –

² дава́ джиибэ́н сыс сыкадо, и амэ дыкхцям дава́ и амэ сам якхи́тка и амэ пхэна́са тумэ́нгэ пал дава́ ве́чно джиибэ́н, саво́ сыс Дадэ́са, и саво́ сыс сыкадо амэ́нгэ,

³ акэ, дова́-паць, со амэ дыкхцям и шундя́м, и пхэна́са тумэ́нгэ, соб (кай) тумэ́ндэ тэ явэ́н кхэтаныпэн амэ́нца, а амаро́ кхэтаныпэн исын Дадэ́са, и Лэ́скирэ чхавэ́са, Исусо́са Христосо́са.

⁴ И дава́ амэ чхинаса тумэ́нгэ, соб (кай) тумари́ ра́дыма тэ явэ́л пхэрды́.

Дэвэ́л исын Дуд (Свэ́то)

⁵ И, ґа́да, пал со исын мавлы́н (малва), сави́ амэ шундя́м Чхавэстыр и пхэна́са тумэ́нгэ: Дэвэ́л исын дуд (свэ́то) и нанэ нисаво́ калыпэ́н дрэ Лэ́стэ.

⁶ Ко́ли амэ ракираса, со амэ́ндэ исын кхэтаныпэн Лэ́са, а кокорэ́ псираса дро калыпэ́н, тэды амэ хохаваса и на псираса пир чачипэ́н.

⁷ А ко́ли амэ псираса дро Дэвлэ́скиро дуд, адя́кэ-паць сыр Христо́со исын дуд, тэды амэ́ндэ исын кхэтаныпэн екх екхэ́са, и Исусо́скиро Христосо́скиро рат, Лэ́скирэ чхавэ́скиро, жужакирэла (чыстинэла) амэн кажнонэ́ грэхэ́ндыр.

⁸ Ко́ли амэ ракираса, со амэ́ндэ нанэ грэ́хо, тэды амэ хохаваса кокорэ́ пэс, и нанэ амэ́ндэ чачипэ́н.

⁹ Ко́ли амэ приґалёваса амарэ́ грэ́хи анги́л Дэвлэ́стэ, тэды Ёв выжужакирэ́ла амаро́ начачипэ́н, пал-дова́ со Ёв исын патяибны́тко, и чачуно́.

¹⁰ Ко́ли амэ ракираса, со амэ на кэрдя́м грэ́хи, тэды амэ кэра́са Лэ́стыр Хохаибнарис, и нанэ Лэ́скиро лав амэ́ндэ.