1 Фесалоникийцэнгэ 4 - Библия - Пэ Балтитко Романи чиб (Романэс) 2019

Джиибэ́н, Саво́ исын Лачхо́ Дэвлэ́скэ

¹ Пшала́лэ, какана́ амэ мангаса и примангаса тумэн ваш Исусо́скэ Христосо́скэ, со дова́, со какана́ тумэ́ высыклынэ амэ́ндыр, сыр трэй тэ дживэ́н и тэ кэрэ́н пир чачипэ́н Дэвлэ́скэ, соб (кай) адя́кэ и дурэды́р тэ дживэ́н.

² Тумэ́ джинэ́на, савэ́ припхэныбэна́ амэ дыям тумэ́нгэ амарэ́ Ра́стыр-Дэвлэ́стыр Исусо́стыр.

³ Дэвэ́л выкэдэ́ла, соб (кай) тумэ́ тэ явэ́н свэ́нта и тэ ракхэ́нпэ джиибнастыр би совлакиро;

⁴ соб (кай) кажно ману́ш тумэ́ндыр тэ джинэ́л, сыр тэ зрикирэл пэ́скиро кхоро́ налачхэ́ тырдыпнастыр дрэ свынтыма и жужыпэн (чыстота),

⁵ и тэ на поддэнпэ грэхитконэ́ тырдыпнаскэ, сыр дава́ кэрэ́на На́юды, савэ́ на джинэ́на Дэвлэ́с,

⁶ соб (кай) ние́кх тумэ́ндыр тэ на кэрэ́л чорипэ́н пэ́скирэ пшалэ́скэ и тэ на барвалёл пал лэ́скиро допатяибэн, пал далэ́ грэ́хи Дэвэ́л чхувэ́ла ка́ра, сыр англэды́р амэ ракирдям тумэ́нгэ и допхэнасас.

⁷ Дэвэ́л кхардя́ амэн на кэ нажужо джиибэ́н, нэ кэ чачуно́.

⁸ И ко́ли вари-кон на прилэ́ла дава́ сыклякирибэ́н, ёв прилэ́ла на, со манушэ́с, а Дэвлэ́с, Саво́ и дыя́ тумэ́нгэ Пэ́скиро Свэ́нто Ду́хо (Фа́но).

⁹ Мэ гинава, со пал пшалэнгири паты́в на трэй тумэ́нгэ буты́р тэ чхинав, пал-дова́ со Дэвэ́л сыклякирдя́ тумэн кокорэн тэ сыкавэ́н паты́в екх екхэ́скэ.

¹⁰ Тумэ́ адя́кэ-паць и кэрэ́на сарэ́нгэ пэ́скирэ пшалэ́нгэ пир сари́ Македония; нэ амэ примангаса тумэн, пшала́лэ, тэ кэрэ́н адя́кэ бутэды́р;

¹¹ и тэ причхувэ́н зор тэ дживэ́н штылэ́с, тэ дыкхэ́н кажно пэ́скиро рэ́ндо, и тэ кэрэ́н буты́ пэ́скирэ вастэ́нца, сыр амэ ракирдям тумэ́нгэ англэды́р;

¹² тэ дживэ́н патывалэс адя́кэ, соб (кай) мануша́, савэ́ исын надэвлытка, тэ кутякирэн тумэн, и соб (кай) тумэ́ тэ на явэ́н вужлэ ни дро со явирэ манушэ́нгэ.

Сыр Рай Дэвэ́л Явэ́ла

¹³ Пшала́лэ, мэ кама́м, соб (кай) тумэ́ тэ джинэ́н саро́ чачипэ́н, пал манушэ́ндэ, савэ́ мынэ́, соб (кай) тумэ́ на тугинэн, сыр яви́р мануша́, савэ́ндэ нанэ наде́я пал ве́чно джиибэ́н.

¹⁴ Нэ ко́ли амэ патя́са, со Ису́со мыя́ и отджидыя́ мулэ́ндыр, тэды и манушэ́н, савэ́ мынэ́ патяибна́са дрэ Исусо́стэ, Дэвэ́л янэ́ла палэ кхэтанэ́ Лэ́са.

¹⁵ Амэ ракираса дава́ тумэ́нгэ Ра́скирэ-Дэвлэ́скирэ лавэ́са, со амэ, савэ́ ява́са джидэ́ кэ / жы́ко Христосо́скиро явибэн, усае́кх на ява́са англэды́р одолэ́ндыр, кон мыя́;

¹⁶ пал-дова́ со Рай Дэвэ́л Кокоро́ явэ́ла Болыбна́скирэ Раёстыр и Лэ́скиро явибэн сыкавэ́ла сарэ́нгэ тэ шунэ́н Архангелоскири зан, зоралы́ сыр Дэвлэ́скиро ро́го (труба), и кон пэ́рво мыя́ патяибна́са дрэ Христосо́стэ, отджидёла мулэ́ндыр;

¹⁷ тэ́ньчи амэ, сэвэ явэ́на джидэ́ дро дова́ часо, ява́са ґаздынэ́ пхувья́тыр, кхэтанэ́ лэ́нца пэ о́блоки тэ стрэнинас (тэ пирилас) Рас-Дэвлэ́с и амэ саро́ часо ява́са кхэтанэ́ Лэ́са.

¹⁸ Подрикирэн екх екхэ́с далэ́ лавэ́нца.