1 Фесалоникийцэнгэ 3 - Библия - Пэ Балтитко Романи чиб (Романэс) 2019

¹ Пал-дова́ со амэ на могиндям буты́р тэ вырикирас, амэ закамдям тэ ячаспэ кэ Афины екхджинэ,

² и бичхадям Химас, амарэ́ пшалэ́с и малэс пир буты́ тэ роспхэнэл Христососкири бахталы́ зан (звесь), соб (кай) ёв тэ подрикирэ́л зоралэды́р тумэн и тэ подрикирэ́л тумаро́ ду́хо (фа́но) дро патяибэ́н,

³ соб (кай) ние́кх тумэ́ндыр тэ на кунинэлпэ дрэ далэ́ биды: пал-дова́ со тумэ́ кокорэ́ джинэ́на, со амэ́нгэ адя́кэ трэиндя́ тэ явэ́л пир Дэвлэ́скири во́ля;

⁴ пал-дова́ со, ке́ли амэ са́мас кэ тумэ́, заґарэдыр ракирдям тумэ́нгэ, со амэ́ндэ явэ́ла бари би́да, сыр и выгия́, и тумэ́ кокорэ́ джинэ́на пал дава́.

⁵ Пал-дова́ и мэ адя́кэ-паць на могиндём тэ вырикирав буты́р и бичхадём Химас тэ уджинэл пал тумаро́ патяибэ́н, соб (кай) тэ на злыджал тумэн на́лачхо и сари́ амари́ буты́ ваш Дэвлэ́скэ тэ на явэ́л ивья́ (напра́снэс).

⁶ Нэ какана́, ке́ли Хима явдя́ тумэ́ндыр кэ амэ, ёв роспхэндя́ амэ́нгэ лачхо́ нэвипэн пал тумаро́ патяибэ́н и паты́в кэ яви́р мануша́, и со тумэ́ саро́ часо рипирэна пал амэ́ндэ, и адя́кэ-паць нэвэ́стыр камэ́на тэ дыкхэ́н амэн, сыр и амэ тумэн,

⁷ Тэды, пшала́лэ, амэ са́мас древа́н подрикирдэ пир тумаро́ патяибэ́н дрэ амари́ би́да и пхаро́ джиибэ́н,

⁸ Палдава́ амэ какана́ сам чачунэ́с джидэ́, ко́ли тумэ́ сан твардэс тэрдэ́ дро тумаро́ патяибэ́н дрэ Растэ-Дэвлэ́стэ.

⁹ Пал-дова́ со, сыр какана́ амэ могинаса тэ парикирас Дэвлэ́скэ пал тумэ́ндэ, пал сари́ ра́дыма, савья́са амэ радынасапэ пал тумэ́ндэ анги́л амарэ́ Дэвлэ́стэ,

¹⁰ рат и дывэ́с амэ мангасапэ Дэвлэ́скэ пал-дова́, соб (кай) нэвэ́стыр тэ дыкхаспэ тумэ́нца и буты́р тэ дас дова́, со на ухты́лла тумарэ́ патяибнаскэ.

¹¹ Нэ мэк амаро́ Дэвэ́л и Дад Кокоро́ и амаро́ Рай Дэвэ́л, Ису́со Христо́со тэ чхувэ́л дром амэ́нгэ кэ тумэ́.

¹² Нэ мэк Рай Дэвэ́л тэ пхэрдякирэл тумаро́ ило́ екх кэ екх и кэ сарэ́ мануша́ ишчо (инкэ́) барэды́р ласкаса, сави́ амэ́ндэ исын кэ тумэ́,

¹³ соб (кай) тэ подрикирэ́л тумарэ́ илэ тэ явэ́н тумэ́ бидошакирэ и свэ́нта анги́л амарэ́ Дэвлэ́стэ и Дадэ́стэ, ке́ли явэ́ла амаро́ Рай Дэвэ́л, Ису́со Христо́со сарэ́ Пэ́скирэ свэнтонэнца. Ами́нь.