1 Фесалоникийцэнгэ 2 - Библия - Пэ Балтитко Романи чиб (Романэс) 2019

Павли́скири Буты́ дрэ Фесало́ника

¹ Пшала́лэ, тумэ́ джинэ́на, кокорэ́, со амаро́ явибэн кэ тумэ́ на сыс ивья́ (напра́снэс),

² а сыр тумэ́ джинэ́на, со анги́л дава́ амэ́нгэ пригияпэ бут тэ пиридживас мэ́ньки и ладжаипэ́н дрэ Филипы, нэ Дэвэ́л дыя́ амэ́нгэ зор тэ роспхэнас Лэ́скири бахталы́ зан, на дыкхи́ пэ саро́ пхарипэ́н проти амэ́ндэ.

³ Пал-дова́ со дро амаро́ сыклякирибэ́н нанэ нисави́ дош, ни нисави́ нажужы мысля, ни хохаибэ́н,

⁴ нэ, сыр Дэвэ́л выкэдыя́ амэн ваш дава́, соб (кай) тэ роспхэнас бахталы́ зан (звесь), адя́кэ амэ и ракираса на ваш манушэ́нгиро ило́, нэ сыр трэй Дэвлэ́скэ, Саво́ пропатякирэла амарэ́ илэ.

⁵ Тумэ́ джинэ́на, со амэ ние́кхвар на са́мас анги́л тумэ́ндэ хоханэ́ ракирибнаса, ци вари-савэ́ бокхаса кэ ловэ́ ваш пэ́скэ: Дэвэ́л исын якхи́тко (свидетелё) далэ́ сарэскэ.

⁶ Амэ на родаса манушы́тко шарибэ́н, ни тумэ́ндыр, ни явирэндыр,

⁷ амэ могиндям тэ явас кэ тумэ́ минаса сыр Христосо́скирэ Апо́столы, нэ амэ са́мас штыл (тиха) машки́р тумэ́ндэ, адя́кэ сыр дай ласкаса отлыджалапэ пэ́скирэ чхавэ́нца,

⁸ адя́кэ амэ, барэ́ тырдыпнастыр кэ тумэ́, закамдям тэ пиридас тумэ́нгэ на екх со Дэвлэ́скири бахталы́ зан (звесь), нэ и амаро́ джиибэ́н, адя́кэ тумэ́ сан дро́га амэ́нгэ.

⁹ Пал-дова́ со тумэ́ рипирэна амари́ буты́ и кхиныпэн: амэ кэрдя́м буты́ раты́ и дывэсэ́, соб (кай) тэ на явас дро пхарипэ́н тумэ́нгэ, амэ роспхэнасас Дэвлэ́скири бахталы́ зан тумэ́нгэ.

¹⁰ Тумэ́ и Дэвэ́л сан якхи́тка амэ́нгэ, со сыр амэ са́мас машки́р тумэ́ндэ, саро́ кэрдя́м сыр свэ́нта и чачунэ́ и бидошэнгирэ.

¹¹ Пал-дова́ со тумэ́ джинэ́на, ке́ли амэ отлыджасаспэ тумэ́нца, сыр дад джинэ́ла пэ́скирэ чхавэ́н: амэ сыклякирдям кажнонэ́ тумэ́ндыр и подрикирдям и мангдям тумэн;

¹² соб (кай) тумэ́ тэ дживэ́н, сыр трэй Дэвлэ́скэ, Саво́ кхардя́ тумэн дрэ Лэ́скиро Кралипэ́н и сла́ва.

¹³ Палдава́ и амэ адя́кэ-паць ўса́ды (сак) парикираса Дэвлэ́скэ, со тумэ́ прилынэ́ Дэвлэ́скиро лав, саво́ амэ роспэндям, тумэ́ прилынэ́ лэс на сы́рбы манушэ́нгиро лав, нэ сыр Дэвлэ́скиро лав, пир чачипэ́н, саво́ кэрэ́ла буты́ дрэ тумэ́ндэ патяибнаскирэндэ.

¹⁴ Палдава́ со тумэ́нца, пшала́лэ, кэрдя́пэ дова́-паць, со и Дэвлэ́скирэ кхангирьенца, савэ́ исын кэ Юдэ́я дрэ Исусо́стэ Христосо́стэ, адя́кэ-паць и пэ́скирэ мануша́ мэнчындлэ тумэн, сыр и лэн Юды,

¹⁵ кадалэ́ мануша́ замардэ́ (мулякирдэ́) и Рас-Дэвлэ́с, Исусо́с и пророкэ́н, и амэн, ёнэ нанэ лачхэ́ Дэвлэ́скэ, и исын вэ́рги (вроги) сарэ́ манушэ́нгэ,

¹⁶ савэ́ сыс тэрдэ́ пэ дром тэ ракирас Наюдэ́нгэ пал зракхибэ́н, и пир дава́ саро́ кэрэ́на барэды́р пэ́скирэ грэ́хи: нэ какана́ Дэвлэ́скири холы́ явдя́ пэ лэ́ндэ.

Па́вли Нэвэ́стыр Мангэ́ла тэ Явэл кэ Ёнэ

¹⁷ Нэ амэ, пшала́лэ, сыр розяцямпэ тумэ́нца пэ набаро́ часо (цы́ро) мо́са, нэ на илэ́са, амэ причхудям зор, и кэрасас саро́, соб (кай) тэ дыкхаспэ тумэ́нца;

¹⁸ палдава́ мэ древа́н камдём тэ явас кэ тумэ́, аж мэ, Па́вли, екх яви́р мо́ло скэдаваспэ тэ явав кэ тумэ́, нэ на́лачхо на мэкця́ амэн.

¹⁹ Кон могинэ́ла тэ явэ́л амарэ́ лачхэ́ ужакирибнаса, ци радыма́са, ци шарибнытконэ вянкаса (коронаса)? Ци дава́ исын на тумэ́ анги́л амарэ́ Растэ – Дэвлэ́стэ, Исусо́стэ Христосо́стэ, сыр Ёв явэ́ла.

²⁰ Тумэ́ сан амари́ сла́ва и ра́дыма.