Tito 3 - Nuevo Testamento Romané 2007

So morabi te cheren sa e llene kai pachan

¹ Ppen e pplalenge te kanden e kralionen ta e sudonen kai gazdarin ando foro, ta te mangen te cheren o lachipe suako llive.

² Te na den nikaki orba bilachi, te na janpe ta te aven pachivale, te achardol kai inai barikane ta te aven lache saurrenchar.

³ Soke omanglal i amen sama dile ta ni kandaia nika; ppiraia jasarde ta sama ppangle ande suako ezgoda bilachi kai saia amenge drago. Zivia ando bilachipe ta saia amenge joli kana avere llene saia le vareso, o sueto murzila pe amende ta i amen murzia iek pe aver.

⁴ A o Del amaro Braduimari sikada amenge kai si lacho ta kai volil e sueto,

⁵ amen ni cherdam nisavo lachipe, a vou braduisarda amen soke avila leke zalba amendar, kosla amaro bilachipe, nevarda amen sargo kana biandilam pale gava cherdale e Santone Duoa.

⁶ Soke o Jesukristo kai si amaro Braduimari cherda te avel amen but katar o Santo Duo,

⁷ ta gia kana ka llinel amen chache pala e zalba kai si le pe amende, ka del amen o zivoto ostade kai adurichardam letar bute bursenchar.

⁸ Gala alava si but chache, goleke mangau tutar te de lenge but gaia orba, ta gia e llene kai pachan ando Del ka trudinpe te cheren o lachipe. Gala orbe si lache ta trubun saurren.

⁹ Na ja tut pala e orbe dile, ni pala e paramiche kai den orba katar e purane, ni pala o zakono e Moiseseko; gola orbe ni inllaren tut ninde.

¹⁰ Vareko te cherela te fuladon e llene katar e kkanlliri, morabi de pe lete iek ta i dui droma, a te na ttoda chuke sama trade le katar e kkanlliri,

¹¹ morabi te llane kai gola llene ni pachan ando chachipe, ta kai isto lengo bilachipe dosarel len.

O Pablo del orba e Titoke

¹² Ka bichalau chuke e Artemase o e Tikiko ta kana ka aven tute, sigar te ave ande Nikopolis te dikke man, soke kote ka nakkau o viend.

¹³ Cher so sai te pomozi e Zenase ta i e Apolo, de len sa so trubul len te llan e dromeke.

¹⁴ Ta te sikon amare llene te cheren o lachipe ta te pomozin kana trubul vareka.

Salami

¹⁵ Sa e llene kai si manchar bichalen chuke salami. Bichal iek salami e llenenge kai volin amen ando pachape.