Tito 2 - Nuevo Testamento Romané 2007

So morabi te sikavelpe

¹ Sogo ka ppene morabi te avel prema o lacho sikadipe.

² E ppure morabi te na aven perasenge, morabi te aven ando liubao ta te llanen te mislinpe; te avel chacho lengo pachape, lengo volipe ta lengi zor te cherel len te terpin e patnia.

³ Ta i e ppuria si te avel len liubao, ta te na inllaren orbe cher cherete, ta te na maton. Morabi te sikon lendar e llene

⁴ ta te sikaven e mai ternen te volin pe rome ta pe chaurren,

⁵ te aven bizai, chache, te arakken pi chara, te aven postene ta te kanden pe rome, te na del niko bilache orba katar e orba e Devleki.

⁶ De zor i e ternen te aven bizai

⁷ ande suako ezgoda, ta te sikon tutar te sai cheren o lachipe. Kana ka sikave len, cherle chachimaia ta bi perasenchar,

⁸ de orba lachimaia, te na dosarel tut niko. Gia vareko te mangela te jalpe amenchar ka avel leke lallao, soke nasti ka ppenel amendar niso bilacho.

⁹ Ppen e eslugenge te kanden pe gazden ande suako ezgoda; te aven pachivale ta te na janpe lenchar.

¹⁰ Ta te na aven chorane, te aven but chache, golea te sikadol ande suako ezgoda kai si but sukar o sikadipe kai del amen o Del amaro Braduimari.

¹¹ Soke kana o Del dia po braduipe sa e suetoke, sikada amenge kai vou volil amen.

¹² Gua volipe e Devleko sikavel amen te muka o bilachipe ta o zelnipe pe ezgode e suetoke, ta cherel ande gava vreme te ava bizai, te ava chache, ta te avel amen zalba,

¹³ gia adurichara te avel gua veselo llive, kana ka irilpe amaro Del ta amaro Braduimari o Jesukristo.

¹⁴ Vou mulo pala amende te ikanel amen katar o bilachipe, te chistol amen ta te cherel amen te ava leko foro, ta te ava vrene te chera o lachipe.

¹⁵ E gua morabi te sikave, de zor, ortosar gazdarimaia. Niko te na mukel tut pe iek rig